എക്‌സിറ്റ് പോള്‍ ഫലങ്ങള്‍ എന്‍ഡിഎയ്ക്ക് മികച്ച വിജയം പ്രവചിച്ചതോടെ സര്‍വത്ര മേഖലയിലും ഉണര്‍വി ദൃശ്യമായി. ഓഹരി വിപണി റെക്കോഡ് നേട്ടത്തില്‍ കുതിച്ചു. 2009നുശേഷം ഇതാദ്യമായാണ് വ്യാപാര ദിനത്തില്‍ സൂചികകള്‍ ഇത്രയും ഉയരുന്നത്.

സെന്‍സെക്‌സ് 1421.90 പോയന്റ് ഉയര്‍ന്ന് 39352.67ലും നിഫ്റ്റി 421.10 പോയന്റ് നേട്ടത്തില്‍ 11828.30ലുമാണ് വ്യാപാരം അവസാനിപ്പിച്ചത്. രാവിലെ വ്യാപാരം ആരംഭിച്ചപ്പോള്‍തന്നെ സെന്‍സെക്‌സ് 960 പോയന്റ് ഉയര്‍ന്നിരുന്നു. 

ബിഎസ്ഇയിലെ 2013 കമ്പനികളുടെ ഓഹരികള്‍ നേട്ടത്തിലും 613 ഓഹരികള്‍ നഷ്ടത്തിലുമായിരുന്നു. പൊതുമേഖല ബാങ്കുകള്‍, ഇന്‍ഫ്ര, വാഹനം, ഊര്‍ജം, എഫ്എംസിജി, ലോഹം, ഫാര്‍മ തുടങ്ങിയ വിഭാഗങ്ങളിലെ ഓഹരികളാണ് പ്രധാനമായും നേട്ടത്തിലായത്. 

ഇന്ത്യബുള്‍സ് ഹൗസിങ്, എസ്ബിഐ, യെസ് ബാങ്ക്, എല്‍ആന്റ്ടി, എച്ച്ഡിഎഫ്‌സി, മാരുതി സുസുകി, ഒഎന്‍ജിസി, ഐസിഐസിഐ ബാങ്ക്, ഏഷ്യന്‍ പെയിന്റ്‌സ്, സിപ്ല, ഹിന്‍ഡാല്‍കോ, ഭാരതി എയര്‍ടെല്‍, ഹീറോ മോട്ടോര്‍കോര്‍പ് തുടങ്ങിയ ഓഹരികള്‍ നേട്ടത്തിലായിരുന്നു.

ഡോ.റെഡ്ഡീസ് ലാബ്, സീ എന്റര്‍ടെയ്ന്‍മെന്റ്, ബജാജ് ഓട്ടോ, ടെക് മഹീന്ദ്ര, ഇന്‍ഫോസിസ് തുടങ്ങിയ ഓഹരികള്‍ നഷ്ടത്തിലുമായിരുന്നു.

ലോക രാഷ്ട്രങ്ങളും ഇന്ത്യയെ ഉറ്റുനോക്കുകയാണ്. പ്രത്യേകിച്ചും പാകിസ്ഥാന്‍. രണ്ടാമത് വരുന്ന മോദി കൂടുതല്‍ കരുത്തനാകുമെന്ന് എല്ലാവര്‍ക്കും അറിയാം. അതിനാല്‍ തന്നെ ഏറ്റവുമധികം ഞെട്ടുന്നത് പാകിസ്ഥാനാണ്.

അതേസമയം എന്‍.ഡി.എ.ക്ക് വന്‍വിജയം പ്രവചിച്ച എക്‌സിറ്റ് പോള്‍ ഫലങ്ങള്‍ നല്‍കിയ ആത്മവിശ്വാസത്തില്‍ ഭാവിനീക്കം സജീവമാക്കുകയാണ് ബി.ജെ.പി. തിരഞ്ഞെടുപ്പുഫലം പുറത്തുവരുന്നതിനു രണ്ടുദിവസംമുമ്പേ പാര്‍ട്ടി എന്‍.ഡി.എ. നേതാക്കളുടെ യോഗം വിളിച്ചു. തിരഞ്ഞെടുപ്പു പ്രവര്‍ത്തനങ്ങള്‍ വിലയിരുത്തുന്നതിനും ഭാവികാര്യങ്ങള്‍ ചര്‍ച്ചചെയ്യുന്നതിനുമായി ചൊവ്വാഴ്ച വൈകീട്ട് ഡല്‍ഹിയിലാണ് എന്‍.ഡി.എ. യോഗം.

ഞായറാഴ്ച പുറത്തുവന്ന 14 എക്‌സിറ്റ് പോളുകളില്‍ പന്ത്രണ്ടും എന്‍.ഡി.എ. ജയിക്കുമെന്നാണു പ്രവചിച്ചിരിക്കുന്നത്. എക്‌സിറ്റ് പോള്‍ ഫലം പോലെതന്നെയാവും യഥാര്‍ഥഫലവുമെന്ന കണക്കുകൂട്ടലിലാണ് ബി.ജെ.പി. ദേശീയനേതൃത്വത്തിന്റെ തയ്യാറെടുപ്പുകള്‍. അധ്യക്ഷന്‍ അമിത് ഷാ വിളിച്ചിരിക്കുന്ന യോഗത്തില്‍ പ്രധാനമന്ത്രി നരേന്ദ്ര മോദി പങ്കെടുക്കും. നേതാക്കള്‍ക്ക് അമിത് ഷായുടെ അത്താഴവിരുന്നുമുണ്ട്.

രാം വിലാസ് പാസ്വാന്‍ (എന്‍.ജെ.പി.), ഉദ്ധവ് താക്കറെ (ശിവസേന) എന്നിവരുള്‍പ്പടെയുള്ളവര്‍ യോഗത്തിനെത്തുമെന്ന് ബി.ജെ.പി. നേതാക്കള്‍ പറഞ്ഞു. കേരളത്തില്‍നിന്ന് എന്‍.ഡി.എ. അംഗമായ കേരളാ കോണ്‍ഗ്രസ് നേതാവ് പി.സി. തോമസ് പങ്കെടുക്കും.

എക്‌സിറ്റ് പോള്‍ ഫലം, വോട്ടണ്ണലിനുള്ള തയ്യാറെടുപ്പുകള്‍, സഖ്യവിപുലീകരണം തുടങ്ങിയ വിഷയങ്ങള്‍ യോഗം ചര്‍ച്ചചെയ്യും. ബി.ജെ.പി. മുന്നൂറിലേറെ സീറ്റു നേടുമെന്നും എന്‍.ഡി.എ. സര്‍ക്കാര്‍ രൂപവത്കരിക്കുമെന്നും അമിത് ഷാ പ്രഖ്യാപിച്ചിരുന്നു.

എന്‍.ഡി.എ.യില്‍ നിലവിലുള്ള കക്ഷികളായിരിക്കും സര്‍ക്കാര്‍ രൂപവത്കരണത്തില്‍ പങ്കാളികളാവുക. ബി.ജെ.പി.യുടെ അജന്‍ഡയോട് യോജിപ്പുള്ള ആര്‍ക്കും എന്‍.ഡി.എ.യിലേക്കു വരാമെന്നു ഷാ പറഞ്ഞിരുന്നു. പാര്‍ട്ടി ആസ്ഥാനത്ത് കഴിഞ്ഞ ദിവസം പ്രധാനമന്ത്രിക്കൊപ്പം നടത്തിയ പത്രസമ്മേളനത്തിലായിരുന്നു അദ്ദേഹത്തിന്റെ ക്ഷണം.

ഇപ്പോള്‍ എന്‍.ഡി.എ.യില്‍ ചെറിയകക്ഷികളുള്‍പ്പെടെ 41 പാര്‍ട്ടികളാണുള്ളത്. പുതിയ പാര്‍ട്ടികളെ ഉള്‍പ്പെടുത്താതെതന്നെ ഭരണംപിടിക്കാമെന്ന കണക്കുകൂട്ടലിലാണ് ബി.ജെ.പി. നേതൃത്വം.

സര്‍ക്കാരിന്റെ കാലാവധി തീരുന്നതിനാല്‍ മുതിര്‍ന്ന മന്ത്രിമാരുമായി പ്രധാനമന്ത്രി നരേന്ദ്ര മോദിയുടെ കൂടിക്കാഴ്ചയും നിശ്ചയിച്ചിട്ടുണ്ട്. ചൊവ്വാഴ്ച വൈകീട്ട് നാലിനാണിത്. വോട്ടെണ്ണലിനു മുന്നോടിയായി ബി.ജെ.പി. ആസ്ഥാനത്ത് പന്തലുള്‍പ്പെയുടെയുള്ള സജ്ജീകരണങ്ങളൊരുങ്ങിത്തുടങ്ങി.