ഞായറാഴ്ച ഇന്ത്യയിലെ എല്ലാ മാധ്യമങ്ങളും നടത്തിയ എക്‌സിറ്റ് പോള്‍ സര്‍വേയില്‍ സിപിഎമ്മിന്റെ പതനവും യുഡിഎഫിന്റെ തരംഗവുമാണ് പ്രവചിച്ചത്. അതേസമയം ബിജെപി അക്കൗണ്ട് തുറക്കുമെന്നും പ്രവചിച്ചു. ഈ സര്‍വേ കണ്ട് സര്‍വമാന പാര്‍ട്ടി സഖാക്കളും ഞെട്ടിത്തരിച്ചിരിക്കെ ദേ വരുന്നു പാര്‍ട്ടി ചാനലായ കൈരളിയുടെ വക സര്‍വേ. വീവേഴ്‌സ് അധികമില്ലെങ്കിലും ഞെട്ടാന്‍ തയ്യാറായാണ് പാര്‍ട്ടിക്കാരല്ലാത്ത ആകാക്ഷക്കാര്‍ ചാനല്‍ വച്ചത്. കൈരളി പീപ്പിളിന്റെ പേര് കൈരളി ന്യൂസെന്ന് മാറ്റിയതിന് പിന്നാലെയാണ് ആഘോഷപൂര്‍വം സര്‍വേ വന്നത്. 

ലോക്‌സഭാ തിരഞ്ഞെടുപ്പില്‍ കേരളത്തില്‍ യുഡിഎഫിന് അനുകൂലമെന്ന ദേശീയ മാധ്യമങ്ങളയുടേതടക്കമുള്ള എക്‌സിറ്റ് പോളുകളെ തള്ളി കൈരളി ന്യൂസ്‌സിഇഎസ് സര്‍വേ വന്നത്. എല്‍ഡിഎഫിനും യുഡിഎഫിനും എട്ട് മുതല്‍ 12 സീറ്റുകള്‍ വരെ ലഭിക്കുമെന്നാണ് സര്‍വേ പ്രവചിക്കുന്നത്. ബിജെപി ഇത്തവണ അക്കൗണ്ട് തുറക്കില്ല. ശക്തമായ ത്രികോണ മത്സരം നടക്കുന്ന തിരുവനന്തപുരം, പത്തനംതിട്ട, തൃശൂര്‍ തുടങ്ങി എല്ലാ മണ്ഡലങ്ങളിലും എന്‍ഡിഎ മുന്നണി മൂന്നാം സ്ഥാനത്ത് മാത്രമേ വരൂ എന്നാണ് പ്രവചിക്കുന്നത്.

നിര്‍ണായക മത്സരം നടക്കുന്ന പത്തനംതിട്ട, കൊല്ലം, വടകര തുടങ്ങിയ മണ്ഡലങ്ങളില്‍ എല്‍ഡിഎഫ് ജയിക്കുമെന്നും തിരുവനന്തപുരത്ത് യുഡിഎഫ് ജയിക്കുമെന്നും കൈരളിയുടെ സര്‍വേ പറയുന്നു. എല്‍ഡിഎഫിന്റെയും വോട്ട് വിഹിതത്തില്‍ നേരിയ വ്യത്യാസം മാത്രമേയുള്ളൂ. കഴിഞ്ഞ നിയമസഭാ തിരഞ്ഞൈടുപ്പില്‍ ലഭിച്ചതിനേക്കാള്‍ വോട്ട് വിഹിതം ബിജെപിക്കുണ്ടാവില്ലെന്നും പറയുന്നു. 

എല്‍ഡിഎഫിന്റെ വോട്ട് വിഹിതം 40.3% മുതല്‍ 42.7% ശതമാനം വരെയും യുഡിഎഫിന് 40.8 % മുതതല്‍ 43.2% വരെയും എന്‍ഡിഎക്ക് 13.5 മുതല്‍ 15.9 ശതമാനം വരെയും വോട്ട് സാധ്യതയാണ് സര്‍വേ കല്പ്പിക്കുന്നത്. ആറോളം മണ്ഡലങ്ങളില്‍ ഇഞ്ചോടിഞ്ച് പോരാട്ടമാണ് നടക്കുന്നതെന്നും സര്‍വേ പറയുന്നു.

അതേ സമയം എക്‌സിറ്റ് പോള്‍ സര്‍വേകള്‍ യാഥാര്‍ഥ്യവുമായി പൊരുത്തപ്പെടുന്നവയല്ലെന്ന് സിപിഐ എം സംസ്ഥാന സെക്രട്ടറി കോടിയേരി ബാലകൃഷ്ണനും പറഞ്ഞു. ലോക്‌സഭാ തെരഞ്ഞെടുപ്പുമായി ബന്ധപ്പെട്ട് പുറത്തുവന്ന എക്‌സിറ്റ് പോളുകള്‍ ജനവികാരം പ്രതിഫലിപ്പിക്കുന്നവയല്ലെന്നും അദ്ദേഹം പറഞ്ഞു. സിപിഐ എം കീഴ്പള്ളി ലോക്കല്‍ കമ്മിറ്റി ഓഫീസ് ഉദ്ഘാടനംചെയ്ത് സംസാരിക്കുകയായിരുന്നു കോടിയേരി. വിദേശരാജ്യങ്ങളിലാണ് എക്‌സിറ്റ് പോള്‍ സര്‍വേ രീതികള്‍ ആദ്യം ഉടലെടുത്തത്. അമേരിക്കന്‍ പ്രസിഡന്റ് തെരഞ്ഞെടുപ്പില്‍ ഹിലാരി ക്ലിന്റന്‍ വിജയിക്കുമെന്നാണ് എക്‌സിറ്റ് പോള്‍ പ്രവചിച്ചതെങ്കിലും ജയിച്ചത് ട്രംപായിരുന്നു. 

എ ബി വാജ്‌പേയ് സര്‍ക്കാര്‍ വീണ്ടുമധികാരത്തിലെത്തുമെന്ന് പ്രഖ്യാപിച്ച അക്കാലത്തെ എക്‌സിറ്റ് പോള്‍ ഫലങ്ങളും തകിടംമറിഞ്ഞു. കോര്‍പ്പറേറ്റ് താല്‍പ്പര്യങ്ങളാണ് ഇത്തരം ഫലങ്ങളിലൂടെ പുറത്തുവരുന്നത്. ഇത് ജനഹിതവുമായി പൊരുത്തപ്പെട്ടുപോകാറില്ല. ചെങ്ങന്നൂര്‍ ഉപതെരഞ്ഞെടുപ്പ് ഘട്ടത്തിലും ചില പ്രവചനക്കാര്‍ക്ക് തെറ്റുപറ്റി. 

ഉമ്മന്‍ ചാണ്ടി സര്‍ക്കാര്‍ വീണ്ടും അധികാരത്തിലെത്തുമെന്ന് കഴിഞ്ഞ നിയമസഭാ തെരഞ്ഞെടുപ്പുകാലത്ത് പ്രവചനം വന്നു. 140 സീറ്റിലെയും വോട്ടെണ്ണിക്കഴിഞ്ഞ ശേഷമേ ഉമ്മന്‍ചാണ്ടിക്ക് യാഥാര്‍ഥ്യം ബോധ്യമായുള്ളൂവെന്നും കോടിയേരി പറഞ്ഞു. എല്‍ഡിഎഫ് പ്രതിപക്ഷത്താവുമെന്ന എക്‌സിറ്റ്‌പോള്‍ ഫലം തിരുത്തി 91 സീറ്റ് നേടി എല്‍ഡിഎഫ് അധികാരമേറ്റത് ജനങ്ങള്‍ക്കറിയാം. ഇടതുപക്ഷത്തിന് സീറ്റില്ലാത്ത സംസ്ഥാനമായി കേരളത്തെ കാണാന്‍ ആഗ്രഹിക്കുന്നവരുടെ മനോവികാരമാണ് ഇത്തരം ഫലങ്ങളായി പുറത്തുവരുന്നത്. ജയപരാജയങ്ങള്‍ സിപിഐ എമ്മിന് പുതിയ കാര്യമല്ല. തോറ്റാല്‍ കരഞ്ഞിരിക്കലും ജയിച്ചാല്‍ അമിതാവേശം പ്രകടിപ്പിക്കലും പാര്‍ടിരീതിയുമല്ല. 

77ല്‍ ലോക്‌സഭയിലേക്ക് ഒരിടത്തും ജയിക്കാതിരുന്നിട്ടും മൂന്നുകൊല്ലം പിന്നിട്ടപ്പോള്‍ 1980ല്‍ കേരളത്തില്‍ അധികാരത്തിലെത്തിയ ചരിത്രമുള്ള പാര്‍ടിയാണിത്. മതേതര ജനാധിപത്യ ശക്തികളെ അധികാരത്തിലെത്തിക്കാനാണ് ഇടതുപക്ഷത്തിന്റെ പരിശ്രമം. ബിജെപി ഇതര പ്രധാനമന്ത്രിയാണ് ഇടതുപക്ഷത്തിന്റെ ലക്ഷ്യമെന്നും കോടിയേരി പറഞ്ഞു.