സി.ഒ.ടി നസീറിനെ കൊലപ്പെടുത്താന് ശ്രമിച്ച കേസില് പിണറായി പൊലീസ് എ.എന് ഷംസീര് എം.എല്.എയെ സംരക്ഷിക്കാന് ശ്രമിക്കുകയാണെന്ന് ആരോപണം
കണ്ണൂരിലെ സി.പി.എം വിമത നേതാവും വടകര പാര്ലമെന്റ് മണ്ഡലം സ്വതന്ത്ര സ്ഥാനാര്ത്ഥിയുമായിരുന്ന സി.ഒ.ടി നസീറിനെ കൊലപ്പെടുത്താന് ശ്രമിച്ച കേസില് പിണറായി പൊലീസ് എ.എന് ഷംസീര് എം.എല്.എയെ സംരക്ഷിക്കാന് ശ്രമിക്കുകയാണെന്ന് ആരോപണം. മുഖ്യമന്ത്രി നിയമസഭയില് പറഞ്ഞപോലെ തന്നെ ആക്രമിച്ചത് ഒറ്റപ്പെട്ട സംഭവമല്ലെന്ന് നസീര് മാധ്യമങ്ങളോട് പ്രതികരിച്ചു. ഷംസീറിന്റെ നിര്ദ്ദേശപ്രകാരം പ്രാദേശിക നേതാക്കളാണ് അക്രമം നടത്തിയത്. പ്രദേശവാസികളും തന്നെ അറിയാവുന്നവരുമായ നിരവധി പേര് ആക്രമണം കണ്ടിട്ടും തടയാനാകാതെ നിസഹായരായി സ്ഥലംവിട്ടു. ജീവനില് ഭയം ഉള്ളത് കൊണ്ടാണ് അവരാരും സഹായിക്കാന് എത്താഞ്ഞത്. കണ്ണൂരില് ആളുകള് ഭീതിയിലാണ് കഴിയുന്നത്. രാഷ്ട്രീയ അക്രമങ്ങളും കൊലപാതകങ്ങളും സമാധാനജീവിതം നശിപ്പിക്കുന്നു. എന്നിട്ട് ഒറ്റപ്പെട്ട സംഭവമാണെന്ന് മുഖ്യമന്ത്രി പറയുന്നത് യാഥാര്ത്ഥ്യത്തിന് നിരക്കാത്തതാണെന്നും നസീര് പറഞ്ഞു.
എഎന് ഷംസീര് എംഎല്എയുടെ പങ്കിനെ കുറിച്ച് പൊലീസിനോട് വ്യക്തമായി പറഞ്ഞതാണെന്നും സിഒടി നസീര് പറഞ്ഞു. മൂന്ന് തവണ പൊലീസ് മൊഴിയെടുത്തു. മൂന്നാംതവണ മൊഴി വായിച്ച് കേള്പ്പിച്ച് പോലുമില്ല. ബ്ലാങ്ക് പേപ്പറില് ഒപ്പിട്ട് വാങ്ങാനും പൊലീസ് ശ്രമിച്ചു. അന്വേഷണം ചിലരില് മാത്രം ഒതുക്കാന് ശ്രമിച്ചു. ഗൂഢാലോചന സംബന്ധിച്ച് കൃത്യമായ വിവരങ്ങള് നല്കി. പൊലീസ് ആശയക്കുഴപ്പം ഉണ്ടാക്കാനാണ് ശ്രമിച്ചത്. ആശയഭിന്നതയുള്ളവരെ ആക്രമിച്ച് കീഴ്പ്പെടുത്തുന്നതാണ് ചിലരുടെ ശൈലി. തലശേരി സിഐ വിശ്വംഭരന് വീട്ടില് എത്തിയാണ് മൊഴിയെടുത്തത്. പക്ഷെ, ഷംസീറിന്റെ പങ്കിനെ കുറിച്ച് പറഞ്ഞ കാര്യം പൊലീസ് പുറത്ത് പറയുന്നില്ലെന്നും സിഒടി നസീര് ആരോപിക്കുന്നു. അന്വേഷണം തൃപ്തികരമല്ലെങ്കില് നിയമനടപടി സ്വീകരിക്കുമെന്നും നസീര് മാധ്യമങ്ങളോട് വ്യക്തമാക്കി.
വടകരയില് സ്വതന്ത്രസ്ഥാനാര്ത്ഥിയായി മത്സരിക്കാന് തീരുമാനിച്ച ശേഷം ഷംസീര് തന്റെ ഓഫീസിലേക്ക് വിളിച്ച് വരുത്തി ഭീഷണിപ്പെടുത്തിയെന്ന് സിഒടി നസീര് ആരോപിച്ചിരുന്നു. ഇതൊക്കെ അറിയാമായിരുന്നിട്ടും അതെല്ലാം മറച്ചുവെച്ചാണ് മുഖ്യമന്ത്രി നിയമസഭയില് എഎന് ഷംസീറിനെ സംരക്ഷിക്കുന്ന നിലപാട് സ്വീകരിച്ചത്. നസീറിന്റെ ആരോപണങ്ങള് പ്രതിപക്ഷം പലതവണ ഓര്മ്മിപ്പിച്ചെങ്കിലും മുഖ്യമന്ത്രി അതിനോട് പ്രതികരിച്ചില്ല. സിഒടി നസീറിനെ ആക്രമിക്കുന്ന ദൃശ്യങ്ങള് പുറത്ത് വന്നിരുന്നു. ആക്രമണത്തില് പി. ജയരാജന് പങ്കില്ലെന്നും നസീര് വ്യക്തമാക്കിയിരുന്നു. താന് സി.പി.എം പ്രവര്ത്തകനായിട്ടും കോണ്ഗ്രസ് പ്രവര്ത്തകര് പിന്തുണ നല്കുന്നതില് സന്തോഷമുണ്ടെന്നും നസീര് പറഞ്ഞു.
ഒറ്റപ്പെട്ട സംഭവം രാഷ്ട്രീയ ലാഭത്തിന് ഉപയോഗിക്കരുതെന്നായിരുന്നു മുഖ്യമന്ത്രി നിയമസഭയില് ആവശ്യപ്പെട്ടത്. പ്രതിപക്ഷത്തിന്റെ അടിയന്തര പ്രമേയ നോട്ടീസിന് മറുപടി നല്കുകയായിരുന്നു മുഖ്യമന്ത്രി. കേസില് മൂന്ന് പ്രതികളെ അറസ്റ്റ് ചെയ്തിട്ടുണ്ട്. നസീറിന്റെ മൊഴി മൂന്ന് തവണ രേഖപ്പെടുത്തി. മൂന്ന് തവണയും മൊഴി നസീറിനെ വായിച്ച് കേള്പ്പിച്ചു. അന്വേഷണ ഉദ്യോഗസ്ഥനെ മാറ്റിയിട്ടില്ലെന്നും മുഖ്യമന്ത്രി നിയമസഭയില് വ്യക്തമാക്കി. എന്നാല് മുഖ്യമന്ത്രിയുടെ വാദങ്ങള് നസീര് തള്ളിക്കളഞ്ഞു. സംഭവത്തില് യഥാര്ത്ഥ പ്രതികളെ പിടികൂടണമെന്നും ഷംസീര് എം.എല്.എയുടെ പങ്ക് അന്വേഷിക്കണമെന്നും പൊലീസ് അദ്ദേഹത്തെ സംരക്ഷിക്കുന്ന നിലപാട് മാറ്റണമെന്നും നസീര് ആവശ്യപ്പെട്ടു.
https://www.facebook.com/Malayalivartha
