നല്ലൊരു ലാപ്‌ടോപ്പും സ്മാട്‌ഫോണും ഉണ്ടെങ്കില്‍ കിടിലം ഓഫീസ് ഉണ്ടാക്കാവുന്ന കാലത്ത്, കേരള പുനര്‍നിര്‍മിതിയുടെ ഓഫീസ് മോഡിപിടിപ്പിക്കാന്‍ സംസ്ഥാന സര്‍ക്കാര്‍ 88 ലക്ഷം രൂപ ചെലവഴിച്ചു. നവകേരള നിര്‍മിതിക്കായി അനുവദിച്ച 10 കോടി രൂപയില്‍ നിന്ന് ഓഫീസ് ആവശ്യത്തിന് മാത്രം 88.5 ലക്ഷം രൂപ ചെലവഴിച്ചുകഴിഞ്ഞതായി രേഖകകള്‍ വ്യക്തമാക്കുന്നു. പ്രളയക്കെടുതിയുടെ ദുരിതം ഇപ്പോഴും പലരും അനുഭവിക്കുമ്പോഴാണ് , അഴിമതിരഹിത ഭരണം എന്ന മുദ്രാവാക്യം ഉയര്‍ത്തിപ്പിടിച്ച സര്‍ക്കാര്‍ ഇത്തരത്തില്‍ ധൂര്‍ത്ത് നടത്തുന്നത് ചിലരെ സഹായിക്കാന്‍ കൂടിയാണ്. പ്രതിപക്ഷനേതാവ് രമേശ് ചെന്നിത്തലയാണ് ഇത് സംബന്ധിച്ച സര്‍ക്കാര്‍ ഉത്തരവ് ആദ്യം പുറത്ത് കൊണ്ടുവന്നത്. സെക്രട്ടറിയേറ്റിന് അടുത്ത് പുന്നംറോഡില്‍ ബില്‍ഡിംഗ് വാടകയ്‌ക്കെടുത്താണ് ഓഫീസ് തുടങ്ങുന്നത്. അതില്‍ തന്നെ വലിയ അഴിമതിയുണ്ടെന്നാണ് പ്രതിപക്ഷനേതാവ് ആരോപിക്കുന്നത്. 

സി.പി.എം നേതാവ് കോലിയക്കോട് കൃഷ്ണന്‍നായരുടെ സഹോദരന്‍ നാരായണന്‍ നായരുടെ ഉടമസ്ഥതയിലുള്ള ബില്‍ഡിംഗിലാണ് നവകേരള നിര്‍മിതിയുടെ ഓഫീസ് വാടകയ്‌ക്കെടുത്തത്. നാരായണന്‍ നായര്‍ നേതൃത്വം നല്‍കുന്ന ലാ അക്കാദമിക്കായി അനുവദിച്ച സ്ഥലത്താണ് ബില്‍ഡിംഗ് കെട്ടിയിരിക്കുന്നത്. വിദ്യാഭ്യാസ ആവശ്യത്തിന് മാത്രമേ ഈ കെട്ടിടം ഉപയോഗിക്കാവൂ എന്നാണ് നിയമം. എന്നാല്‍ അതെല്ലാം കാറ്റില്‍പറത്തിയാണ് ഫഌറ്റ് നിര്‍മിച്ച് സര്‍ക്കാരിന് തന്നെ വാടകയ്ക്ക് കൊടുത്തതെന്ന് പ്രതിപക്ഷം ആരോപിക്കുന്നു. സംഭവം വിവാദമായെങ്കിലും ഇതേക്കുറിച്ച് പ്രതികരിക്കാന്‍ സി.പി.എമ്മോ, സര്‍ക്കാരോ തയ്യാറായിട്ടില്ല. സംസ്ഥാന ആസൂത്രണ, സാമ്പത്തിക കാര്യ വകുപ്പാണ് 88. 5 ലക്ഷം മുടക്കി ഓഫീസ് നവീകരിക്കാന്‍ ഉത്തരവ് ഇറക്കിയിരിക്കുന്നത്. ഓഫീസ് പ്രവര്‍ത്തിക്കാന്‍ തിരുവനന്തപുരം നഗരമധ്യത്തില്‍ തന്നെ നിരവധി സര്‍ക്കാര്‍ കെട്ടിടങ്ങള്‍ ഉള്ളപ്പോഴാണ് ഈ ധൂര്‍ത്ത്. 

പ്രളയത്തില്‍ വീട് നഷ്ടപ്പെട്ടവര്‍ക്ക് പുനര്‍നിര്‍മാണത്തിന് നാല് ലക്ഷം രൂപയാണ് സര്‍ക്കാര്‍ അനുവദിക്കുന്നത്. അതേസമയം നവകേരള നിര്‍മിതിയുടെ ഓഫീസിന്റെ വാതിലുകള്‍ക്ക് മാത്രം 4.57 ലക്ഷം രൂപയായെന്ന് കോണ്‍ഗ്രസ് എം.എല്‍.എ വി.ടി ബല്‍റാം ഫെയിസ്ബുക്കില്‍ ആരോപിച്ചു. മുതിര്‍ന്ന സി.പി.എം നേതാവ് വി.എസ് അച്യൂതാനന്ദന്റെ പേഴ്‌സണല്‍ സ്റ്റാഫ് അംഗമായിരുന്ന കെ.എം ഷാജഹാനാണ് സര്‍ക്കാര്‍ ഉത്തരവ് ആദ്യം പുറത്ത് കൊണ്ടുവന്നത്. ഉയര്‍ന്ന വാടകയ്ക്ക് ലാ അക്കാദമി കെട്ടിടം വാടകയ്ക്ക് എടുത്തതിന് പിന്നില്‍ അക്കാദമി മാനേജ്‌മെന്റും മുഖ്യമന്ത്രിയുടെ ഓഫീസും തമ്മിലുള്ള ബന്ധമാണെന്നും ഷാജഹാന്‍ ആരോപിച്ചു. അതേസമയം പൊതുഭരണ വകുപ്പും പൊതുമാരാമത്ത് വകുപ്പ് അസിസ്റ്റന്റ് എഞ്ചിനിയറും പറയുന്നത് സെക്രട്ടറിയേറ്റിലോ, മറ്റ് സര്‍ക്കാര്‍ കെട്ടിടങ്ങളിലോ സ്ഥലം ഇല്ലാത്തത് കൊണ്ടാണ് നവകേരള നിര്‍മിതിയുടെ പ്രവര്‍ത്തനത്തിന് ഓഫീസ് വാടകയ്ക്ക് എടുത്തതെന്ന് വിശദീകരിക്കുന്നു. 

ഓഫീസില്‍ എസി വയ്ക്കുന്നതിന് 8.8 ലക്ഷം, സീലിംഗിനും ഫ്‌ളോറിംഗിനും 12.12 ലക്ഷം, വാതിലുകള്‍ക്ക് 4.57 ലക്ഷം, ഫര്‍ണിച്ചറുകള്‍ക്ക് 18.53 ലക്ഷം, വയറിംഗിനും മറ്റും 5.50 ലക്ഷം ആയെന്നാണ് സര്‍ക്കാര്‍ ഉത്തരവില്‍ പറയുന്നത്. മുഖ്യമന്ത്രിയുടെ ദുരിതാശ്വാസ നിധിയില്‍ നിന്ന് ഒരു രൂപ പോലും ചെലവഴിച്ചല്ല ഓഫീസ് മോഡി പിടിപ്പിച്ചതെന്ന് നവകേരള നിര്‍മിതി സി.ഇ.ഒ വി. വേണു പറഞ്ഞു. വിദ്യാഭ്യാസ ആവശ്യത്തിന് നല്‍കിയ ഭൂമി മറ്റ് കാര്യങ്ങള്‍ക്ക് വിനിയോഗിച്ചാല്‍ തിരിച്ച് പിടിക്കാന്‍ സര്‍ക്കാരിന് അധികാരമുണ്ട്. എന്നാല്‍ ആ സര്‍ക്കാര്‍ തന്നെ ആ ഭൂമിയിലെ കെട്ടിടം വാടകയ്ക്ക് എടുത്തു. വേലി തന്നെ വിളവ് തിന്നാല്‍ എങ്ങനിരിക്കും എന്ന് പറയേണ്ടതില്ലല്ലോ?