സാധാരണ, അത്യാവശ്യക്കാര്‍ പലരും അമിതവേഗത്തോടെയും അശ്രദ്ധയോടെയുമാണ് വാഹനമോടിക്കാറുള്ളത്. പക്ഷേ ഒരു സെക്കന്റിലെ അശ്രദ്ധ ഒരു ജീവിതത്തെ ഇല്ലാതാക്കുകയോ ഭംഗിയോടെ ജീവിതം ആസ്വദിക്കാനുള്ള അവസരത്തെ നശിപ്പിക്കുകയോ ചെയ്യുമെന്ന് വാഹനമെടുത്ത് ഇറങ്ങുന്ന ഓരോ തവണയും എല്ലാവരും ഓര്‍ക്കേണ്ടതാണ്.

പക്ഷേ ലക്ഷ്യസ്ഥാനത്തെത്തുക എന്ന ചിന്ത മാത്രമാവുമ്പോള്‍ റോഡില്‍ മറ്റ് വാഹനങ്ങള്‍ ഉണ്ടെന്ന ബോധം തീരെയുണ്ടാവില്ല. ഇത്തരത്തിലൊരു അശ്രദ്ധയാണ് കരുനാഗപ്പള്ളിയിലുണ്ടായ അപകടത്തിനും കാരണം.

ഒന്നും നോക്കാതെ മറ്റൊരു വണ്ടിയെ മറികടക്കാന്‍ ശ്രമിച്ച കാറാണ് ഒരു ഭാഗത്ത് വില്ലനായതെങ്കില്‍ ബ്രേക്ക് പിടിച്ചിട്ടും അമിതവേഗത ആയിരുന്നതിനാല്‍ ബൈക്ക് നിര്‍ത്താന്‍ പറ്റാത്തതാണ് മറുഭാഗത്ത് പ്രശ്‌നം സൃഷ്ടിച്ചത്.

തെറ്റായ ദിശയില്‍ കാര്‍ വരുന്നത് കണ്ട് ബൈക്കുകാരന്‍ ബ്രേക്ക് പിടിച്ചെങ്കിലും ഇടി കഴിഞ്ഞാണ് ബൈക്ക് നിന്നതെന്ന് വീഡിയോയില്‍ വ്യക്തം. കരുനാഗപ്പള്ളി ചിറ്റുമൂലയിലാണ് അപകടമുണ്ടായത്.