ശബരിമല, ചര്ച്ച് ആക്ട്, സുന്നിപള്ളികളിലെ സ്ത്രീ പ്രവേശനം എന്നീ വിവാദങ്ങള്ക്ക് പിന്നാലെ സര്ക്കാര് വീണ്ടും വിവാദത്തില്
ശബരിമല, ചര്ച്ച് ആക്ട്, സുന്നിപള്ളികളിലെ സ്ത്രീ പ്രവേശനം എന്നീ വിവാദങ്ങള്ക്ക് പിന്നാലെ സര്ക്കാര് വീണ്ടും വിവാദത്തില്. കേരള ലളിതകലാ അക്കാദമി പുരസ്കാരത്തിനായി തെരഞ്ഞെടുത്ത കാര്ട്ടൂണ് ക്രിസ്തീയ മതചിഹ്നങ്ങളെ അവഹേളിക്കുന്നതാണെന്ന് കെ.സി.ബി.സി. സംഭവം വിവാദമായതോടെ പുരസ്ക്കാര നിര്ണയം പുനര്നിര്ണയിക്കുമെന്ന് സാംസ്കാരിക മന്ത്രി എ.കെ ബാലന് വ്യക്തമാക്കി. ബിഷപ്പിനെ കളിയാക്കുന്നതില് തെറ്റില്ല, എന്നാല് മതചിഹ്നങ്ങളെ പരിഹസിക്കാന് പാടില്ല. ഇക്കാര്യത്തില് ജൂറിക്ക് തെറ്റ് പറ്റിയിട്ടുണ്ടോ എന്ന് അവര് പരിശോധിക്കണം. അവാര്ഡ് നിശ്ചയിച്ചത് ജൂറിയുടെ സ്വതന്ത്ര തീരുമാനമായിരുന്നു. സര്ക്കാര് ഈ തീരുമാനത്തില് കൈ കടത്തിയിട്ടില്ല. സുഭാഷ് കെ കെ വരച്ച കാര്ട്ടൂണിനെതിരെയാണ് കെ.സി.ബി.സി രംഗത്തെത്തിയത്. .
മതചിഹ്നങ്ങളെ അവഹേളിക്കുന്ന കാര്ട്ടൂണ് അംഗീകരിക്കാനാവില്ലെന്നും മന്ത്രി പറഞ്ഞു. അവാര്ഡ് നിര്ണയം പുനഃപരിശോധിക്കണം. ഫ്രാങ്കോ മുളയ്ക്കലിനെ അപഹസിച്ച് ചിത്രീകരിച്ച കാര്ട്ടൂണാണിത്. അതില് എതിര്പ്പില്ലെന്നും മന്ത്രി പറഞ്ഞു. മുഖ്യമന്ത്രി പിണറായി വിജയനെ അവഹേളിച്ച കാര്ട്ടൂണിന് 2018ല് മുഖ്യമന്ത്രി തന്നെ അവാര്ഡ് കൊടുത്തിരുന്നു. അതാണ് സര്ക്കാര് നിലപാട്. കെസിബിസിയുടെ വികാരം ശരിയാണ്. എന്നാല്, തെരെഞ്ഞെടുപ്പ് ഫലം അടിസ്ഥാനമാക്കി മത ന്യൂനപക്ഷത്തോടുള്ള വിദ്വേഷമാണെന്ന ആരോപണം തെറ്റെന്നും എ കെ ബാലന് പറഞ്ഞു.
ക്രിസ്തീയ മതപ്രതീകങ്ങളെ അവഹേളിക്കുക എന്ന ലക്ഷ്യത്തോടെ കേരള ലളിതകലാ അക്കാദമി പുരസ്കാരത്തിനായി തിരഞ്ഞെടുത്തിരിക്കുന്ന കാര്ട്ടൂണ് അങ്ങേയറ്റം പ്രകോപനപരവും പ്രതിക്ഷേധാര്ഹവുമാണെന്ന് കെ.സി.ബി.സി വക്താവ് ഫാ. വര്ഗീസ് വള്ളിക്കാട്ട് ആരോപിച്ചു. ക്രിസ്ത്യന് ന്യൂനപക്ഷം ഇലക്ഷനില് ഒപ്പം നിന്നില്ല എന്ന മാര്ക്സിസ്റ്റു പാര്ട്ടിയുടെ വിലയിരുത്തലാണോ കാര്ട്ടൂണ് പുരസ്കാര പ്രഖ്യാപനത്തിന്റെ പിന്നിലുള്ള പ്രചോദനം എന്നു സംശയിക്കുന്നു. ബിഷപ് ഫ്രാങ്കോയുടെ പേരുപറഞ്ഞു ക്രൈസ്തവ വിശ്വാസ പ്രതീകമായ നല്ല ഇടയന്റെ പ്രതീകത്തെയാണ് കുരിശിനുപകരം അപമാനകരമായ ചിഹ്നം വരച്ചു അവഹേളിച്ചിരിക്കുന്നത്. ഈ വികല ചിത്രത്തിനാണ് കേരളത്തിലെ ഇടതു സര്ക്കാര് പുരസ്കാരം നല്കി ആദരിച്ചിരിക്കുന്നത്. പുരസ്കാരം പിന്വലിച്ചു, ജനങ്ങളുടെ നികുതിപ്പണം ദുരുപയോഗിച്ചതിനു പൊതുസമൂഹത്തോടും, മത പ്രതീകത്തെ അപമാനിച്ചതിന് ക്രിസ്തീയ സമൂഹത്തോടും മാപ്പുപറയാന് കേരള ലളിതകലാ അക്കാദമി ഭാരവാഹികള് തയ്യാറാകണം. ഇതാണോ ഇടതു സര്ക്കാരിന്റെ ന്യൂനപക്ഷ സംരക്ഷണവും മതേതരത്വവും എന്നു സാംസ്കാരിക വകുപ്പ് മന്ത്രി വ്യക്തമാക്കണമെന്നും ഫാ. വര്ഗീസ് വള്ളിക്കാട്ട് ആവശ്യപ്പെട്ടു.
ബിഷപ്പ് ഫ്രാങ്കോയ്ക്ക് പൂവന് കോഴിയുടെ മുഖം, കോഴിയുടെ നില്പ്പ് പൊലീസിന്റെ തൊപ്പിക്ക് മുകളിലും തൊപ്പി പിടിക്കുന്നത് പിസി ജോര്ജ്ജുമാണ്. കാര്ട്ടൂണില് പ്രധാനമായും കാണുന്നത്. പീഡന കേസില് പ്രതിചേര്ക്കപ്പെട്ട ബിഷപ്പ് ഫ്രാങ്കോയുടെ കയ്യിലെ അംശവടിയില് സ്ത്രികളുടെ അടിവസ്ത്രത്തിന്റെ ചിത്രം ചേര്ത്തിട്ടുണ്ട്. അത് വിവാദമായത്. കാര്ട്ടൂണില് ഷൊര്ണ്ണൂര് എംഎല്എ പികെ ശശിയുടെ തലയില് പൂവന്കോഴിയുടെ തൊപ്പിവെച്ചിട്ടുണ്ട്. കേരള ശബ്ദത്തിന്റെ സഹ പ്രസിദ്ധീകരണമായ ഹാസ്യകൈരളിയിലാണ് കാര്ട്ടൂണ് പ്രസിദ്ധീകരിച്ചിരുന്നത്.
https://www.facebook.com/Malayalivartha
