പെരുമ്പാവൂരിലുണ്ടായ കാറപകടത്തില്‍ ഗുരുതരമായി പരുക്കേറ്റു ചികിത്സയിലിരുന്ന നിബിയ ഏഴു പേര്‍ക്ക് പുതുജീവന്‍ നല്‍കി മരണത്തിന് കീഴടങ്ങി. പെരുമ്പാവൂര്‍ മാറമ്പിള്ളിയിലുണ്ടായ കാറപകടത്തില്‍ ഗുരുതരമായി പരുക്കേറ്റു ചികിത്സയിലിരുന്ന ഇടുക്കി വണ്ടന്‍മേട് ചേറ്റുകുഴി കരിമ്ബനയ്ക്കല്‍ നിബിയ മേരി ജോസഫാണ് (25) ഇന്നലെ മരണത്തിനു കീഴടങ്ങിയത്. രാവിലെ 7ന് മസ്തിഷ്‌ക മരണം സ്ഥിരീകരിച്ചതോടെയാണു ബന്ധുക്കള്‍ അവയവദാനത്തിനു തയ്യാറായത്. ഈ മാസം 10ന് ആയിരുന്നു അപകടം നടന്നത്.
കാറിലുണ്ടായിരുന്ന നിബിയയുടെ പിതാവ് ജോസഫ് ചാക്കോ സംഭവദിവസം തന്നെ മരിച്ചു. കാര്‍ ഓടിച്ചിരുന്ന സഹോദരന്‍ നിധിന്‍ ചികിത്സയില്‍ തുടരുന്നു. ആസ്റ്റര്‍ മെഡ്‌സിറ്റിയില്‍ രാവിലെ 11ന് അവയവദാന ശസ്ത്രക്രിയ ആരംഭിച്ചു.ഡോ. മാത്യു ജേക്കബ്, ഡോ. ഷെജോയ് പി. ജോഷ്വ, ഡോ. എസ്. റോമല്‍, കോട്ടയം മെഡിക്കല്‍ കോളജിലെ ഡോ. ടി.കെ. ജയകുമാര്‍ എന്നിവര്‍ നേതൃത്വം നല്‍കി. ഉച്ചയ്ക്ക് 1.45 നു മരണം സ്ഥിരീകരിച്ചു.

ജോസഫ് ചാക്കോയെ അടക്കിയ പഴയ കൊച്ചറ സെന്റ് ജോസഫ് പള്ളിയിലെ കല്ലറയില്‍ ഇന്നു വൈകിട്ട് 4.30ന് നിബിയയുടെയും സംസ്‌കാരം നടത്തും. നിര്‍മലയാണു നിബിയയുടെ മാതാവ്. നിലീന സഹോദരി. ചേറ്റുകുഴിയിലെ എവര്‍ഗ്രീന്‍ എന്റര്‍െ്രെപസസ് എന്ന സ്ഥാപന ഉടമയായിരുന്നു ജോസഫ്. ചെന്നൈ അപ്പോളോ ആശുപത്രിയില്‍ 2 വര്‍ഷം നഴ്‌സായി ജോലി ചെയ്ത നിബിയ ഒന്നരവര്‍ഷമായി വിദേശത്തേക്കു പോകാനുള്ള ശ്രമത്തിലായിരുന്നു. കോതമംഗലത്തെ ബന്ധുവീട്ടില്‍ നിന്നു ഷോപ്പിങ്ങിനായി കൊച്ചിയിലേക്കു വരുമ്പോഴായിരുന്നു അപകടം. ബൈക്ക് യാത്രക്കാരനെ ഇടിച്ചു വീഴ്ത്തിയ ശേഷം അമിത വേഗത്തില്‍ പാഞ്ഞ കാര്‍ നിയന്ത്രണം വിട്ടു നിബിയയും പിതാവും സഹോദരനും യാത്ര ചെയ്ത കാറിലും തുടര്‍ന്നു സ്‌കൂള്‍ ബസിലും ഇടിക്കുകയായിരുന്നു.