എറണാകുളം സെന്‍ട്രല്‍ പൊലീസ് സി.ഐയെ ഒളിവില്‍ പോകാന്‍ കാരണക്കാരനായ എ.സി.പി പി.എസ് സുരേഷ് ആളത്ര ശരിയല്ലെന്ന് പരാതി. സംവിധായകന്‍ മേജര്‍ രവിയുടെ സഹോദരനും നടനുമായ കണ്ണന്‍പട്ടാമ്പിയുടെ ഭാര്യയെ കടന്ന് പിടിക്കാന്‍ സുരേഷ് ശ്രമിച്ചെന്ന് പരാതി. ഇയാള്‍ക്കെതിരെ പരാതി നല്‍കിയിട്ടും ഉന്നത ഉദ്യോഗസ്ഥര്‍ രക്ഷിക്കുന്ന നിലപാടാണ് സ്വീകരിച്ചതെന്ന് കണ്ണന്‍ പട്ടാമ്പി ആരോപിച്ചു. 2017ലാണ് സംഭവം നടന്നത്. കണ്ണന്‍ പട്ടാമ്പിയുടെ വീട്ടില്‍ വന്ന സുരേഷ് ഭാര്യയോട് വെള്ളം ചോദിച്ചു. എടുക്കാനായി അടുക്കളയിലേക്ക് പോയപ്പോഴാണ് പിന്നില്‍ നിന്ന് വന്ന് കടന്ന് പിടിക്കാന്‍ ശ്രമിച്ചത്. ഈ സമയം കണ്ണന്‍ വീട്ടിലില്ലായിരുന്നു. സുരേഷിനെ ഭയന്ന് ഭാര്യ ഇക്കാര്യം മറച്ചുവെച്ചെങ്കിലും പിന്നീട് പറഞ്ഞപ്പോഴാണ് പരാതി നല്‍കിയത്. 

2017ല്‍ പൊലീസ് കംപ്ലെയ്ന്റ് സെല്ലിലാണ് കണ്ണന്‍ പട്ടാമ്പിയുടെ ഭാര്യ പരാതി നല്‍കിയത്. എന്നാല്‍ യാതൊരു നടപടിയും ഉണ്ടായില്ല. കഴിഞ്ഞ മാര്‍ച്ചില്‍ പാലക്കാട് തൃത്താല സ്്‌റ്റേഷനിലും പരാതി നല്‍കി. എസ്.പി ആലത്തൂര്‍ ഡിവൈ.എസ്.പിക്ക് അന്വേഷണ ചുമതലയും നല്‍കി. പൊലീസുകാര്‍ ഒത്തുകളിച്ച് കേസ് ഇല്ലാതാക്കാനാണ് ശ്രമിച്ചത്. അതിനിടെയാണ് കൊച്ചിയിലെ സി.ഐയോട് എ.സി.പിയായ സുരേഷ് മോശമായി പെരുമാറിയതിനെ തുടര്‍ന്ന് അയാള്‍ ഒളിവില്‍ പോയ സംഭവം വിവാദമായത്. അതോടെ അന്വേഷണം കാര്യക്ഷമമാക്കണം എന്ന് ആവശ്യപ്പെട്ട് വെള്ളിയാഴ്ച ഡി.ജി.പി ലോക്‌നാഥ് ബഹ്‌റയ്ക്ക് പരാതി നല്‍കി. ഒപ്പം ഡി.ജി.പി, എസ്.പി, എസ്.ഐ എന്നിവരെ എതിര്‍കക്ഷികളാക്കി ഹൈക്കോടതിയില്‍ കേസും നല്‍കിയെന്ന് കണ്ണന്‍ പട്ടാമ്പി അറിയിച്ചു. 

തന്റെ സഹപ്രവര്‍ത്തകരെ തെറി വിളിക്കുന്നത് സുരേഷിന്റെ ശൈലിയാണെന്നും. അത്തരത്തിലുള്ള ഓഡിയോ ക്ലിപ് കൈവശമുണ്ടെന്നും കണ്ണന്‍ പട്ടാമ്പി പറഞ്ഞു. സബ്ഓഡിനേറ്റ്‌സിന്റെ ഭാര്യമാരോട് തനിക്ക് ലൈംഗികമായി വഴങ്ങണമെന്ന് സുരേഷ് നിര്‍ബന്ധിക്കാറുണ്ട്. മദ്യപിച്ചാല്‍ മോശമായാണ് പെരുമാറുക, തുടങ്ങി നിരവധി ആരോപണങ്ങളാണ് കണ്ണന്‍ പട്ടാമ്പി ആരോപിക്കുന്നത്. സംസ്ഥാനത്തെ ഒരു മന്ത്രിയുടെ സഹോദരന്‍മാരാണ് സുരേഷിനെ സഹായിക്കുന്നത്. സി.പി.എമ്മിന്റെ സഹായത്തോടെയാണ് ഇയാള്‍ ഉയര്‍ന്ന പോസ്റ്റിലെത്തിയത്. കഴിഞ്ഞ സര്‍ക്കാരിന്റെ കാലത്ത് കോണ്‍ഗ്രസ്‌നേതൃത്വത്തിലുള്ള യൂണിയന്റെ സജ്ജീവപ്രവര്‍ത്തകനായിരുന്നു സുരേഷ്. ഇയാള്‍ക്കെതിരെ നിരവധി കേസുകളുണ്ടെങ്കിലും അധികരാം ഉപയോഗിച്ച് അതെല്ലാം ഒതുക്കി തീര്‍ക്കുകയാണെന്നും കണ്ണന്‍ ആരോപിച്ചു. 

പരാതിയുമായി ഹൈക്കോടതിയെ സമീപിച്ചതോടെ പല വഴിയിലൂടെ തന്നെ സ്വാധീനിക്കാന്‍ സുരേഷ് ശ്രമിച്ചെന്ന് കണ്ണന്‍ പറയുന്നു. പി.കെ ശ്രീമതി ടീച്ചറുടെ മകന്‍ സുധീര്‍, ചേട്ടന്‍ മേജര്‍ രവി എന്നിവരെ കണ്ട്, എന്നോട് പരാതി പിന്‍വലിക്കണമെന്ന് ആവശ്യപ്പെട്ടു. എന്നാല്‍ ഭാര്യയുടെ തീരുമാനത്തിനൊപ്പം നില്‍ക്കും അതില്‍ നിന്ന് പിന്നോട്ടില്ലെന്ന് കണ്ണന്‍ പറയുന്നു. മേജര്‍ രവിയും കണ്ണനുമായുള്ള ബന്ധം വഴി പാലക്കാട്ട് ജില്ലയിലെ പല പൊലീസ് ഉദ്യോഗസ്ഥരും ഇവരുടെ വീടുകളില്‍ വരുന്നത് പതാവാണ്. അങ്ങനെ കണ്ണന്റെ വീട്ടില്‍ പതാവായി എത്തിയിരുന്ന സുരേഷ് ഈ രീതിയില്‍ പെരുമാറിയതോടെ കണ്ണന്റെ ഭാര്യ മാനസികമായി ആകെ തകര്‍ന്നിരുന്നു. ഏതാനും ദിവസങ്ങള്‍ക്ക് ശേഷമാണ് ഇക്കാര്യം കണ്ണനോട് പോലും പറഞ്ഞത്.