സംസ്ഥാനത്ത് വീണ്ടും മഴ ശക്തിപ്രാപിക്കുന്നതായി കേന്ദ്രകാലാവസ്ഥാ നിരീക്ഷണകേന്ദ്രം. ഇതേ തുടര്ന്ന് 21 മുതല് 23 വരെ 11 ജില്ലകളില് യെല്ലോ അലര്ട്ട് പ്രഖ്യാപിച്ചു
സംസ്ഥാനത്ത് വീണ്ടും മഴ ശക്തിപ്രാപിക്കുന്നതായി കേന്ദ്രകാലാവസ്ഥാ നിരീക്ഷണകേന്ദ്രം. ഇതേ തുടര്ന്ന് 21 മുതല് 23 വരെ 11 ജില്ലകളില് യെല്ലോ അലര്ട്ട് പ്രഖ്യാപിച്ചു. 21 ന് എറണാകുളം, ഇടുക്കി, മലപ്പുറം, കോഴിക്കോട്, വയനാട്, കണ്ണൂര്, കാസര്ഗോഡ്, 22 ന് മലപ്പുറം, വയനാട്, കോഴിക്കോട് , 23 ന് കോഴിക്കോട്, കാസര്ഗോഡ്, കണ്ണൂര് ജില്ലകളിലാണ് കേന്ദ്ര കാലാവസ്ഥ നിരീക്ഷണ കേന്ദ്രം 'ഓറഞ്ച്' അലേര്ട്ട് പ്രഖ്യാപിച്ചത്. ഓറഞ്ച് പ്രഖ്യാപിക്കപ്പെട്ട ജില്ലകളില് ഒറ്റപ്പെട്ടയിടങ്ങളില് ശക്തമായതോ, അതിശക്തമായതോ ആയ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. സര്ക്കാര് സംവിധാനങ്ങളും പൊതുജനങ്ങളും ജാഗ്രത പാലിക്കുവാനുള്ള മുന്നറിയിപ്പാണ് ഓറഞ്ച് അലേര്ട്ട് കൊണ്ട് ഉദ്ദേശിക്കുന്നത്.
ജില്ലയിലെ ഒറ്റപ്പെട്ടയിടങ്ങളില് ശക്തമായ മഴയ്ക്കുള്ള സാധ്യതയാണ് ഈ ദിവസങ്ങളില് പ്രവചിക്കപ്പെട്ടിരിക്കുന്നത്. ബന്ധപ്പെട്ട സര്ക്കാര് വകുപ്പുകളോടും ഉദ്യോഗസ്ഥരോടും തയ്യാറെടുപ്പുകള് നടത്താനും താലൂക്ക് തലത്തില് കണ്ട്രോള് റൂമുകള് ആരംഭിക്കുവാനുമുള്ള നിര്ദേശം സംസ്ഥാന ദുരന്ത നിവാരണ അതോറിറ്റി നല്കിയിട്ടുണ്ട്. ഓറഞ്ച്, മഞ്ഞ അലെര്ട്ടുകള് പ്രഖ്യാപിച്ച ജില്ലകളില് പ്രളയ സാധ്യതയുള്ള പ്രദേശങ്ങളില് താമസിക്കുന്നവരും 2018 ലെ പ്രളയത്തില് വെള്ളം കയറിയ പ്രദേശങ്ങളില് താമസിക്കുന്നവരും അടച്ചുറപ്പില്ലാത്ത വീടുകളില് താമസിക്കുന്നവരും പ്രധാനപ്പെട്ട രേഖകളും വിലപ്പെട്ട വസ്തുക്കളും ഉള്പ്പെടുന്ന ഒരു എമെര്ജന്സി കിറ്റ് തയ്യാറാക്കി വെക്കുകയും മാറി താമസിക്കേണ്ട സാഹചര്യം വരികയാണെങ്കില് അധികൃതര് നിര്ദേശിക്കുന്ന സുരക്ഷിത സ്ഥാനത്തേക്ക് മാറിത്താമസിക്കാന് തയ്യാറാകണമെന്നും അധികൃതര് മുന്നറിയിപ്പ് നല്കുന്നു.
2018 ല് ഉരുള്പൊട്ടലുണ്ടാവുകയോ ജിയോളജിക്കല് സര്വേ ഓഫ് ഇന്ത്യ വാസയോഗ്യമല്ലാത്തതെന്ന് കണ്ടെത്തിയ പ്രദേശങ്ങളില് താമസിക്കുന്നവരും പ്രളയത്തിലും ഉരുള്പൊട്ടലിലുമായി പൂര്ണമായി വീട് നഷ്ടപ്പെടുകയും ഇതുവരെ പണി പൂര്ത്തീകരിക്കാത്ത വീടുകളില് താമസിക്കുന്നവരും പ്രളയത്തില് ഭാഗികമായി കേടുപാടുകള് സംഭവിക്കുകയും അറ്റകുറ്റപ്പണികള് ഇത്വരെ പൂര്ത്തിയാകാത്തതുമായ വീടുകളില് താമസിക്കുന്നവരും എമെര്ജന്സി കിറ്റ് തയ്യാറാക്കണം. മാറി താമസിക്കേണ്ട സാഹചര്യം വരികയാണെങ്കില് അധികൃതര് നിര്ദേശിക്കുന്ന സുരക്ഷിത സ്ഥാനത്തേക്ക് മാറിത്താമസിക്കാന് മുന്കരുതല് സ്വീകരിക്കണം. ഇത്തരം ആളുകള്ക്ക് വേണ്ടി സ്ഥിതഗതികള് വിലയിരുത്തിക്കൊണ്ട് ആവശ്യമായ ക്യാമ്പുകള് ആരംഭിക്കുന്നതിന് വേണ്ടിയുള്ള നിര്ദേശങ്ങള് സര്ക്കാര് പുറപ്പെടുവിച്ചിട്ടുണ്ട്.
പ്രധാനപ്പെട്ട രേഖകള് സര്ട്ടിഫിക്കറ്റുകള്, ആഭരണങ്ങള് പോലെ വിലപിടിപ്പുള്ള സാധനങ്ങള് തുടങ്ങിയവ പ്ലാസ്റ്റിക് ബാഗുകളില് എളുപ്പം എടുക്കാന് പറ്റുന്ന ഉയര്ന്ന സ്ഥലത്തു വീട്ടില് സൂക്ഷിക്കണം. എമര്ജന്സി കിറ്റ് തയ്യാറാക്കി വീട്ടില് എല്ലാവര്ക്കും എടുക്കാന് പറ്റുന്ന തരത്തില് സുരക്ഷിതമായി വെക്കണം. അടിയന്തര സാഹചര്യത്തില് ആരെയും കാത്ത് നില്ക്കാതെ എമര്ജന്സി കിറ്റുമായി സുരക്ഷിത ഇടത്തേക്ക് മാറാവുന്ന തരത്തിലേക്ക് വീട്ടിലുള്ള എല്ലാവരെയും പ്രാപ്തരാക്കണം. സംസ്ഥാന ദുരന്ത നിവാരണ അതോറിറ്റിയുടെ അടിയന്തരഘട്ട കാര്യനിര്വ്വഹണ കേന്ദ്രം 24 X 7 സമയവും സ്ഥിതിഗതികള് സൂക്ഷ്മമായി വിലയിരുത്തി വരുന്നു. കേന്ദ്ര കാലാവസ്ഥ നിരീക്ഷണ കേന്ദ്രം മുന്നറിയിപ്പുകളിലും അലെര്ട്ടുകളിലും വരുത്തുന്ന മാറ്റങ്ങള്ക്കനുസരിച്ച് അപ്ഡേറ്റ് ചെയ്യുന്നതാണ്.
https://www.facebook.com/Malayalivartha
