ലോക്‌സഭാ തെരഞ്ഞെടുപ്പില്‍ തകര്‍ന്നടിഞ്ഞ കോണ്‍ഗ്രസിന്റെയും രാഹുല്‍ ഗാന്ധിയുടേയും പരാജയ കാരണം ബാബ രാംദേവ് കഴിഞ്ഞ ദിവസം വെളിപ്പെടുത്തിയിരുന്നു. രാഹുല്‍ ഗാന്ധി യോഗ ചെയ്യാത്തതാണ് കോണ്‍ഗ്രസിന്റെ തോല്‍വിക്ക് പിന്നിലെ യഥാര്‍ത്ഥ കാരണമെന്നാണ് അദ്ദേഹം പറഞ്ഞത്. യോഗ പതിവായി ചെയ്യുന്നവര്‍ക്ക് അച്ഛേ ദിന്‍ ആയിരിക്കുമെന്നും അദ്ദേഹം പറയുന്നു. 

മോദിജി പരസ്യമായി യോഗ ചെയ്യുന്നു. ജവഹര്‍ലാല്‍ നെഹ്‌റുവും ഇന്ദിരാ ഗാന്ധിയും സ്ഥിരമായി യോഗ ചെയ്യുന്നവരായിരുന്നു. എന്നാലവരുടെ പിന്ഗാമിയായ രാഹുല്‍ ഗാന്ധി യോഗ ചെയ്യുന്നില്ല. അതുകൊണ്ടാണ് അദ്ദേഹത്തിന്റെ രാഷ്ട്രീയം തോറ്റുപോയത്. യോഗ ചെയ്യുന്നവര്‍ അച്ഛേ ദിന്‍ കാണുന്നുവെന്നും രാംദേവ് പറഞ്ഞു.

എന്നാല്‍ ഒരു വര്‍ഷം മുന്‍പ് രാഹുല്‍ ഗാന്ധിയും സോണിയാ ഗാന്ധിയും സ്ഥിരമായി യോഗ ചെയ്യുന്നവരാണെന്ന പ്രസ്താവനയും ബാബ രാംദേവ് നടത്തിയിരുന്നു. ടെലിവിഷന്‍ ചാനലിന് നല്‍കിയ അഭിമുഖത്തിലായിരുന്നു ഇത്തരത്തിലുള്ള പ്രസ്താവന. രാഹുല്‍ ഗാന്ധിയുമായി നല്ല സൗഹൃദത്തിലാണെന്നും അന്ന് അദ്ദേഹം പറഞ്ഞിരുന്നു.

പ്രധാനമന്ത്രി നരേന്ദ്ര മോദിയുടെ യോഗ പരിശീലനം ഇന്നലെ വൈറലാകുകയും ചെയ്തിരുന്നു. ഇതിന് പിന്നാലെയാണ് ഇതിനെയെല്ലാം വെല്ലാന്‍ രാഹുല്‍ ഗാന്ധിയുടെ ശ്രമം നടന്നത്. 

കരസേനാ ഡോഗ് സ്‌ക്വാഡിലെ നായ്ക്കളും സേനാംഗങ്ങളും യോഗ ചെയ്യുന്ന ചിത്രം ട്വീറ്റ് ചെയ്തു വിവാദത്തിനു തിരികൊളുത്തിയിരിക്കുകയാണ് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി. നായ്ക്കളും പരിശീലകരായ സേനാംഗങ്ങളും കുമ്പിട്ടു കിടക്കുന്ന ചിത്രത്തിനു 'പുതിയ ഇന്ത്യ' എന്ന അടിക്കുറിപ്പിട്ടായിരുന്നു രാഹുലിന്റെ ട്വീറ്റ്.

പ്രധാനമന്ത്രി നരേന്ദ്ര മോദിക്കു കീഴിലുള്ള ഇന്ത്യയുടെ നിലവിലെ അവസ്ഥ എന്ന സൂചനയോടെയുള്ള ട്വീറ്റിനെതിരെ വ്യാപക വിമര്‍ശനമുയര്‍ന്നു. ഇന്ത്യയുടെ അഭിമാനമായ യോഗയെയും സേനയെയും രാഹുല്‍ അപമാനിച്ചെന്നു ബിജെപി ആരോപിച്ചു. മോദിക്കു കീഴില്‍ പുതിയ ഇന്ത്യ ഉദിച്ചുയരുമ്പോള്‍ രാഹുലിനു കീഴില്‍ പുതിയ കോണ്‍ഗ്രസും രൂപമെടുക്കുകയാണെന്നു ബിജെപി വക്താവ് നളിന്‍ കോലി പറഞ്ഞു.

രാഹുലിനു ജീവിതം തമാശയാണെന്നും പിഡിയെ (വളര്‍ത്തുനായ) ഓര്‍മപ്പെടുത്തുന്ന ചിത്രങ്ങള്‍ പങ്കുവയ്ക്കാനുള്ള ഒരവസരവും അദ്ദേഹം പാഴാക്കില്ലെന്നും നളിന്‍ പരിഹസിച്ചു.

അതിനിടെ രാഷ്ട്രപതിയുടെ നയപ്രഖ്യാപന പ്രസംഗത്തിനിടെ മൊബൈല്‍ ഫോണില്‍ കളിച്ച രാഹുല്‍ ഗാന്ധിയ്‌ക്കെതിരെ വിമര്‍ശനം വന്നിരുന്നു. ഇതിനെ പരോക്ഷമായി വിമര്‍ശിച്ച് ബിജെപി ദേശീയ ജനറല്‍ സെക്രട്ടറി രാം മാധവ് രംഗത്തെത്തിയിരുന്നു. കുട്ടിത്തം മാറാത്ത ചിലര്‍ പാര്‍ലമെന്റിലുണ്ട്. നിര്‍ണായകമായ യോഗത്തില്‍ അവര്‍ മൊബൈലില്‍ കളിക്കുകയാണ്. അവര്‍ യോഗ അഭ്യസിച്ച് പക്വത നേടണമെന്നും രാം മാധവ് പറഞ്ഞു.

വ്യാഴാഴ്ച ഇരുസഭകളെയും അഭിസംബോധന ചെയ്ത് രാഷ്ട്രപതിയുടെ നയപ്രഖ്യാപന പ്രസംഗം നടന്നത്. അതിനിടെ കോണ്‍ഗ്രസ് അധ്യക്ഷന്റെ പെരുമാറ്റം കടുത്ത വിമര്‍ശനം ഉയര്‍ത്തിയിരുന്നു. ബിജെപി ഇതൊരു രാഷ്ട്രീയ ആയുധമാക്കുകയും ചെയ്തു.

എന്നാല്‍, രാഷ്ട്രപതിയുടെ പ്രസംഗത്തിലെ ചില വാക്കുകള്‍ മനസ്സിലാകാത്ത ചിലവാക്കുകള്‍ മനസ്സിലാകാത്ത രാഹുല്‍ അതിന്റെ അര്‍ത്ഥം തിരയുകയായിരുന്നുവെന്നും ചില കോണ്‍ഗ്രസ് നേതാക്കള്‍ അഭിപ്രായപ്പെട്ടു. ഒരിക്കലും രാഷ്ട്രപതിയോട് അനാദരവ് കാണിക്കുകയല്ലെന്നും കോണ്‍ഗ്രസ് വക്താവ് ആനന്ദ് ശര്‍മ്മ പറഞ്ഞു. ബിജെപിയാണ് അനാദരവ് കാണിച്ചതെന്നും കോണ്‍ഗ്രസ് തിരിച്ച് ആരോപിച്ചു. അവര്‍ പുരസ്പരം സംസാരിക്കുകയായിുരുന്നുവെന്നും ശര്‍മ്മ വിമര്‍ശിച്ചു.