നവോത്ഥാനം പറയുന്നവര്‍ കേവലം ഒരു കാര്‍ട്ടൂണിന്റെ പേരില്‍ വിശ്വാസം മുറുകെപിടിക്കാന്‍ രംഗത്തെത്തിയിരുന്നു. എന്നാല്‍ പതിറ്റാണ്ടുകള്‍ നീണ്ട അയ്യപ്പ വിശ്വാസത്തെ നവോത്ഥാനം ഉയര്‍ത്തിപ്പിടിച്ച് തകര്‍ക്കാന്‍ ശ്രമിച്ചപ്പോള്‍ ആരേയും കണ്ടില്ല. പത്തോട്ട് കുറഞ്ഞാലും ശബരിമലയില്‍ പിന്നോട്ടില്ലെന്നാണ് അന്ന് മുഖ്യമന്ത്രി ഉള്‍പ്പെടെയുള്ളവര്‍ പറഞ്ഞത്. എന്നാല്‍ ലോക്‌സഭാ തെരഞ്ഞെടുപ്പില്‍ പത്തോട്ടല്ല 19 സീറ്റും നഷ്ടമായി. അവസാനം അവര്‍ കണ്ടെത്തി തോല്‍വിക്ക് കാരണം ശബരിമല തന്നെയെന്ന്. ഇനി വിശ്വാസികളുടെ വിശ്വാസം വീണ്ടെടുക്കണമെന്നായി ലൈന്‍ മാറ്റി.

അതേസമയം സത്യപ്രതിജ്ഞ ചെയ്ത കൊല്ലം എംപി എന്‍കെ. പ്രേമചന്ദ്രന്‍ ശബരിമല ബില്ലിലൂടെ ശ്രദ്ധേയനായി. ഇതൊട്ടും ഉള്‍ക്കൊള്ളാനാകാതെ സിപിഎം രംഗത്തെത്തി. സ്വകാര്യബില്ലല്ല നിയമമാണ് വേണ്ടതെന്നാണ് അവര്‍ പറയുന്നത്.

അതിനിടെ ശബരിമലയില്‍ ആചാര സംരക്ഷണം ഉറപ്പാക്കണമെന്നാവശ്യപ്പെടുന്ന സ്വകാര്യ ബില്‍ എന്‍.കെ. പ്രേമചന്ദ്രന്‍ ഇന്നലെ ലോക്‌സഭയില്‍ അവതരിപ്പിച്ചു. പാര്‍ളമെന്റില്‍ ശബരിമല നിറഞ്ഞു നിന്ന ദിവസമായിരുന്നു. എന്നും എതിര്‍ക്കാന്‍ നില്‍ക്കുന്ന സിപിഎമ്മിന് അതിനുള്ള ശേഷിയില്ലായിരുന്നു. അതോടെ ബില്‍ അവതരണത്തെ ഏകകണ്ഠമായി സഭ അനുകൂലിച്ചു. ഈ ലോക്‌സഭയിലെ ആദ്യ സ്വകാര്യ ബില്ലായാണു ശബരിമല വിഷയം അവതരിപ്പിച്ചത്. ഇതുള്‍പ്പെടെ ഇന്നലെ അവതരിപ്പിച്ച സ്വകാര്യ ബില്ലുകളിലുള്ള ചര്‍ച്ച ജൂലൈ 12നു നടക്കും. ഏതെല്ലാം ബില്ലുകള്‍ ചര്‍ച്ചയ്‌ക്കെടുക്കണമെന്ന് ഈ മാസം 25നു നറുക്കെടുപ്പിലൂടെ തീരുമാനിക്കും.

ചരിത്രപരമായ ബില്ലാണിതെന്നും 2018 സെപ്റ്റംബര്‍ ഒന്നിനു നിലനിന്ന ആചാരങ്ങള്‍ ശബരിമലയില്‍ ഉറപ്പാക്കണമെന്നും പ്രേമചന്ദ്രന്‍ ചൂണ്ടിക്കാട്ടി. ബില്ലില്‍ അപാകതകളുണ്ടെന്നു വ്യക്തമാക്കിയ ഭരണകക്ഷി എംപി മീനാക്ഷി ലേഖിയെ സ്വകാര്യ ബില്‍ അവതരണവേളയില്‍ സ്പീക്കര്‍ കസേരയില്‍ സഭ നിയന്ത്രിക്കാന്‍ ചുമതലപ്പെടുത്തിയതു ശ്രദ്ധേയമായി. ശബരിമല വിശ്വാസികളെ പ്രത്യേക വിഭാഗമായി പരിഗണിച്ച് ആചാരസംരക്ഷണത്തിനു നിയമനിര്‍മാണം വേണമെന്നായിരുന്നു ലേഖിയുടെ ആവശ്യം.

അതേസമയം ശബരിമല യുവതീപ്രവേശനത്തിന്റെ പേരില്‍ കേന്ദ്ര സര്‍ക്കാര്‍ ഇനിയും വിശ്വാസികളെ വഞ്ചിക്കരുതെന്നാണ് മന്ത്രി കടകംപള്ളി സുരേന്ദ്രന്റെ ഇപ്പോഴത്തെ നിലപാട്. വിശ്വാസികളോട് ഒപ്പമാണെന്ന് പറഞ്ഞാല്‍ മാത്രം പോര. പ്രവര്‍ത്തിച്ചുകാണിക്കണം.

എന്‍.കെ പ്രേമചന്ദ്രന്റെ ബില്ലിന്റെ അവസ്ഥ എന്താവുമെന്ന് എല്ലാവര്‍ക്കും അറിയാം. ഉത്തരവാദിത്തം നിറവേറ്റി എന്ന് പറയാന്‍ മാത്രമായിരിക്കാം പ്രേമചന്ദ്രന്‍ ബില്‍ കൊണ്ടുവന്നത്. ആചാരസംരക്ഷണത്തിന് വിശ്വാസികളെ തെരുവിലിറക്കുകയല്ല, നിയമപരമായ മാര്‍ഗങ്ങള്‍ അവലംബിക്കുകയാണ് വേണ്ടത്. 

ആചാരസംരക്ഷണമാണ് വേണ്ടതെങ്കില്‍ പാര്‍ലമെന്റിന്റെ ഈ സെഷനില്‍ തന്നെ കേന്ദ്ര സര്‍ക്കാര്‍ ബില്‍ കൊണ്ടുവരട്ടെ. സംസ്ഥാന സര്‍ക്കാരിന് നിയമവാഴ്ച പ്രധാനമാണെന്നും അദ്ദേഹം പറഞ്ഞു.