മഹിളാ മോര്ച്ചയുടെ ഈ വ്യത്യസ്ത സമരം..ബസിനുള്ളില് കയറി സൗജന്യ ടിക്കറ്റിനായി കടുംപിടുത്തം പിടിച്ചതോടെ ഇത് മറ്റ് യാത്രക്കാരുമായി കനത്ത വാക്കേറ്റത്തിന് കാരണമായി..
കെഎസ്ആര്ടിസി 'പ്രിയദര്ശിനി' സൗജന്യ യാത്രാ പദ്ധതിയുടെ ഉദ്ഘാടന ദിവസം കോട്ടയത്ത് വേറിട്ട പ്രതിഷേധവുമായി മഹിളാ മോര്ച്ച പ്രവര്ത്തകര്. കെഎസ്ആര്ടിസിയുടെ ഓര്ഡിനറി വിഭാഗം ബസുകളില് മാത്രം സ്ത്രീകള്ക്ക് സൗജന്യ യാത്ര അനുവദിച്ച സര്ക്കാര് തീരുമാനത്തിനെതിരെ, എല്ലാ വിഭാഗം ബസുകളിലും സൗജന്യം അനുവദിക്കണമെന്ന് ആവശ്യപ്പെട്ടായിരുന്നു മഹിളാ മോര്ച്ചയുടെ ഈ വ്യത്യസ്ത സമരം.കോട്ടയം കെഎസ്ആര്ടിസി ബസ് സ്റ്റാന്ഡില് എത്തിയ മഹിളാ മോര്ച്ച ജില്ലാ പ്രസിഡന്റിന്റെ നേതൃത്വത്തിലുള്ള ഭാരവാഹികള്,
അവിടെയുണ്ടായിരുന്ന ഫാസ്റ്റ് പാസഞ്ചര് ബസിനുള്ളില് കയറി വനിതാ കണ്ടക്ടറോട് തങ്ങള്ക്ക് പോകാന് സൗജന്യ ടിക്കറ്റ് നല്കണമെന്ന് ആവശ്യപ്പെടുകയായിരുന്നു. തെരഞ്ഞെടുപ്പ് പ്രചാരണ സമയത്ത് 'ഇന്ദിരാ ഗ്യാരന്റി' പ്രഖ്യാപിക്കുമ്പോള് കേരളത്തിലെ എല്ലാ സ്ത്രീകള്ക്കും സര്ക്കാര് ബസുകളില് സൗജന്യ യാത്ര ഉറപ്പാക്കുമെന്നാണ് കോണ്ഗ്രസ് പറഞ്ഞതെന്നും, ഭരണം കൈയില് കിട്ടിയപ്പോള് അത് ഓര്ഡിനറി ബസുകളില് മാത്രമായി ഒതുക്കി സ്ത്രീ ജനങ്ങളെ വഞ്ചിച്ചുവെന്നും പ്രവര്ത്തകര് ആരോപിച്ചു. ഇലക്ഷന് മുന്പോ ശേഷവോ ഓര്ഡിനറി ബസ് എന്ന് അവര് പ്രത്യേകം പറഞ്ഞിട്ടില്ലെന്നും,
വോട്ട് നേടി കഴിഞ്ഞപ്പോള് വാഗ്ദാനത്തില് നിന്നും പിന്നോട്ട് പോയ നടപടി അംഗീകരിക്കാന് കഴിയില്ലെന്നും അവര് കൂട്ടിച്ചേര്ത്തു.മഹിളാ മോര്ച്ച പ്രവര്ത്തകര് ബസിനുള്ളില് കയറി സൗജന്യ ടിക്കറ്റിനായി കടുംപിടുത്തം പിടിച്ചതോടെ ഇത് മറ്റ് യാത്രക്കാരുമായി കനത്ത വാക്കേറ്റത്തിന് കാരണമായി. തങ്ങളുടെ വിലപ്പെട്ട സമയം കളയരുതെന്നും പ്രതിഷേധം പ്രകടിപ്പിക്കേണ്ടത് ബസിനുള്ളിലല്ല പുറത്താണെന്നും യാത്രക്കാര് പരസ്യമായി പ്രതികരിച്ചു. ബസിനുള്ളില് ഇത്തരത്തില് സമരം നടക്കുമ്പോള് എങ്ങനെ വണ്ടിയെടുക്കുമെന്ന യാത്രികരുടെ മറുചോദ്യത്തിന് മുന്നില്,
തങ്ങള് വണ്ടി തടഞ്ഞിട്ടില്ലെന്നും തങ്ങള്ക്ക് ഇന്ന് ഫ്രീ ടിക്കറ്റ് കിട്ടുമോ ഇല്ലയോ എന്ന് അറിയാന് ബസില് കയറിയതാണെന്നും പ്രവര്ത്തകര് വിശദീകരിച്ചു. തുടര്ന്ന് ഇതൊരു സൂചന സമരം മാത്രമാണെന്നും സര്ക്കാര് വാഗ്ദാനം പൂര്ണ്ണമായി പാലിച്ചില്ലെങ്കില് വരും ദിവസങ്ങളില് ശക്തമായ സമരവുമായി മുന്നോട്ട് പോകുമെന്നും പ്രഖ്യാപിച്ച് മഹിളാ മോര്ച്ച പ്രവര്ത്തകര് സമരം അവസാനിപ്പിച്ചു.
https://www.facebook.com/Malayalivartha
