സത്യസന്ധനായ ഉദ്യോഗസ്ഥന്റെ കൂടെ ആരും കാണില്ലെന്നതിന് തെളിവാണ് പ്രമുഖ ഐഎഎസ് ഓഫീസറുടെ ഇന്നത്തെ അവസ്ഥ. 'ഞാനെന്റെ ശമ്പളം കൊണ്ട് ജീവിക്കുന്നയാളാണ്. പത്തുപൈസയുടെ അഴിമതി നടത്തിയിട്ടില്ല. ശമ്പളമില്ലെങ്കില്‍ എനിക്ക് ഭക്ഷണം കഴിക്കാന്‍ കഴിയില്ല. ആ വിഷമം എനിക്കുണ്ട്. നിര്‍ബന്ധിത വിരമിക്കല്‍ തന്നാല്‍ പെന്‍ഷന്‍ പോലും കിട്ടണമെന്നില്ല. ഞാന്‍ റോഡിലേയ്ക്കിറങ്ങും. ഇവിടുത്തെ ജനങ്ങളുടെ ഒപ്പം നില്‍ക്കും. അഭിഭാഷകനായി എന്റോള്‍ ചെയ്യും. അഴിമതിക്കെതിരെ പോരാടും. പക്ഷെ ചെയ്യുന്നത് ക്രൂരതയാണ്. അഴിമതിക്കെതിരെ നില്‍ക്കുന്നവരുടെ വയറ്റത്തടിക്കുന്നത് ശരിയല്ല' ഗദ്ഗദത്തോടെയായിരുന്നു സ്വാമിയുടെ വാക്കുകള്‍ കേരളം ഏറ്റെടുത്തു കഴിഞ്ഞു.

എസ്എസ്എല്‍സി, പ്രീഡിഗ്രി, ഐഐടി, തുടങ്ങി സിവില്‍ സര്‍വീസ് പരീക്ഷയിലും ഒന്നാം റാങ്കുകാരനായി ഐഎഎസുകാരനായിട്ടും നിലവിലുള്ള സംവിധാനങ്ങള്‍ക്കെതിരെ ശബ്ദമുയര്‍ത്തുന്ന ഒരാളുടെ നിസഹായാവസ്ഥയായിരുന്നു രാജു നാരായണസ്വാമിയില്‍ കണ്ടത്. വന്‍കിട അഴിമതികള്‍ക്കെതിരെ ശബ്ദമുയര്‍ത്തിയാല്‍ പെരുവഴിയിലിറക്കുമെന്ന സന്ദേശം നല്‍കുക എന്നതു തന്നെയാവണം എതിര്‍പാളയത്തിലുള്ളവര്‍ ഇതുകൊണ്ട് ഉദ്ദേശിക്കുന്നതും. ഐഎഎസ് സര്‍വീസില്‍ നിന്ന് തന്നെ പിരിച്ചുവിടാന്‍ ചിലര്‍ ശ്രമിക്കുന്നതായി ഏതാനും ദിവസങ്ങള്‍ മുന്‍പേ അദ്ദേഹം അറിഞ്ഞിരുന്നു. 

തനിക്കെതിരേ നിര്‍ബന്ധിത വിരമിക്കലിനു നീക്കം നടത്തുന്നത് അഴിമതിക്കാരുടെ സംഘമാണെന്ന് അഡീഷണല്‍ ചീഫ് സെക്രട്ടറി പദവിയിലുള്ള കേരള കേഡര്‍ ഐ.എ.എസ്. ഉദ്യോഗസ്ഥന്‍ രാജു നാരായണ സ്വാമി വ്യക്തമാക്കിയത്. ചീഫ് സെക്രട്ടറിയുടെയും സര്‍ക്കാരിന്റെയും നടപടിക്കെതിരേ പോരാടും. പിരിച്ചുവിട്ടാല്‍ അഭിഭാഷകനായി എന്റോള്‍ ചെയ്ത് അഴിമതിയോടു പടവെട്ടും. നിര്‍ബന്ധിത വിരമിക്കല്‍ സംബന്ധിച്ച് ഔദ്യോഗിക അറിയിപ്പ് ലഭിച്ചതിനു ശേഷം നിയമനടപടി സ്വീകരിക്കും.

ഇതേവരെ തനിക്കെതിരേ അഴിമതി ആരോപണം ഉയരുകയോ അന്വേഷണമുണ്ടാകുകയോ ചെയ്തിട്ടില്ല. മൂന്നാര്‍ ഭൂമികൈയേറ്റം ഒഴിപ്പിച്ചതടക്കം എല്ലാ ഇടപെടലുകളും അഴിമതിക്കാര്‍ക്കെതിരേയായിരുന്നു. നാളികേര വികസന ബോര്‍ഡിലെ അഴിമതിക്കെതിരേയും നിലപാടെടുത്തു. ഇപ്പോഴത്തെ നടപടി അതിനുള്ള സമ്മാനമായിരിക്കും! ഒരു ഐ.എ.എസ്. ഉന്നതന്‍ നടത്തിയ അഴിമതിയുടെ രേഖകള്‍ കൈവശമുണ്ട്. പാലാരിവട്ടം പാലംപണിയില്‍ അഴിമതിയാരോപണം നേരിടുന്ന മുഹമ്മദ് ഹനീഷിനെ വ്യവസായ സെക്രട്ടറിയായാണു നിയമിച്ചത്. 

അഴിമതി നടത്തുന്ന ഉദ്യോഗസ്ഥര്‍ക്കു സ്ഥാനക്കയറ്റമടക്കം നല്‍കുമ്പോള്‍ തനിക്കു നീതി നിഷേധിക്കുകയാണ്. സര്‍വീസില്‍ തുടരുകയാണെങ്കില്‍ അഴിമതിക്കാരെ തുറുങ്കിലടയ്ക്കുമെന്ന് അറിയാവുന്നവരാണു പുറത്താക്കാന്‍ നീക്കം നടത്തുന്നത്. നാളികേര ബോര്‍ഡിലെ അഴിമതി കണ്ടില്ലെന്നു നടിച്ചിരുന്നെങ്കില്‍ ഒരു നീക്കവും തനിക്കെതിരേ ഉണ്ടാകുമായിരുന്നില്ല. 

ഓഫീസില്‍ ഹാജരാകുന്നില്ലെന്ന ആരോപണം നൂറുശതമാനം തെറ്റാണ്. പഞ്ചിങ് അടക്കമുള്ള വിവരങ്ങള്‍ പരിശോധിക്കാം. രണ്ടു വര്‍ഷം തികയുന്നതിനു മുമ്പ് നാളികേര വികസന ബോര്‍ഡ് ചെയര്‍മാന്‍ സ്ഥാനത്തുനിന്നു നീക്കിയതു ചട്ടലംഘനമാണെന്നു ചൂണ്ടിക്കാട്ടി കേന്ദ്ര അഡ്മിനിസ്‌ട്രേറ്റിവ് ട്രിബ്യൂണലില്‍ പരാതി നല്‍കിയിരുന്നു. 

ഹൈക്കോടതിയിലും കേസ് പരിഗണനയിലുള്ളതിനാലാണ് കേന്ദ്ര സര്‍വീസില്‍നിന്നു സംസ്ഥാന സര്‍വീസിലേക്കു വരാത്തത്. ഇക്കാര്യമെല്ലാം സര്‍ക്കാരിനറിയാം. എല്ലാം രണ്ടു കത്തുകളിലൂടെ ചീഫ് സെക്രട്ടറിയെ അറിയിച്ചിരുന്നെന്നും രാജു നാരായണസ്വാമി പറഞ്ഞു.