ഏറെ വിവാദങ്ങള്‍ക്കും പരസ്പരം ചെളിവാരി എറിയലിനും ശേഷം കോണ്‍ഗ്രസ് നേതാക്കാള്‍ വീണ്ടും ഒന്നിക്കുന്നു. കെപിസിസി പ്രസിഡന്റ് വിഎം സുധീരന്റെ സ്ഥാനം ഒന്നുകൂടി ഉറപ്പിച്ചു.
ധാരണയുടെ ഭാഗമായി മുഖ്യമന്ത്രി ഉമ്മന്‍ ചാണ്ടിയോ കെപിസിസി പ്രസിഡന്റോ പരസ്പരം ചെളിവാരി എറിയില്ല. ആഭ്യന്തരമന്ത്രി രമേശ് ചെന്നിത്തലയും എല്ലാവരുമായും സഹകരിക്കും. ഇന്ന് നടന്ന കെപിസിസി നിര്‍വ്വാഹക സമിതിയില്‍ മുതര്‍ന്ന നേതാവ് എകെആന്റണിയാണ് ഇക്കാര്യം വെളിപ്പെടുത്തിയത്.
മദ്യനയത്തിലെ പ്രശ്‌നങ്ങള്‍ പാര്‍ട്ടിയെ നാശത്തിലേക്ക് നയിച്ചേനേയെന്നായിരുന്നു ആന്റണിയുടെ പരാമര്‍ശം. എന്നാല്‍ ഈ വിഷയത്തില്‍ അത്ഭുതകരമായ പരിഹാരമാണ് ഉണ്ടായതെന്നും ആന്റണി പറഞ്ഞു. ഇതില്‍ നിന്ന് പാഠമുള്‍ക്കൊണ്ട് പ്രവര്‍ത്തിക്കണമെന്നും ആന്റണി വ്യക്തമാക്കി. ഹെക്കമാണ്ടിന്റെ കഴിഞ്ഞ പ്രവര്‍ത്തക സമിതിയുടെ തീരുമാനമാണ് കെപിസിസിയിലെ വെടിനിര്‍ത്തിലിന് കാരണം. ആന്റണി തന്നെ നേരിട്ട് കാര്യങ്ങള്‍ ഉമ്മന്‍ ചാണ്ടിയേയും രമേശ് ചെന്നിത്തലയേയും അറിയിച്ചു കഴിഞ്ഞു.
സംഘടനാ തെരഞ്ഞെടുപ്പിലൂടെ സുധീരനെ പുറത്താക്കി പാര്‍ട്ടിയില്‍ പിടിമുറക്കാനായിരുന്നു ഉമന്‍ചാണ്ടിയുടേയും രമേശ് ചെന്നിത്തലയുടേയും നീക്കം. സമവായത്തിലൂടെ കെപിസിസി പ്രസിഡന്റ് വേണ്ടെന്ന് ഇരുവരും വ്യക്തമാക്കുകയും ചെയ്തു. ലോക്‌സഭാ തെരഞ്ഞെടുപ്പിലെ ദേശീയ തലത്തിലെ തിരിച്ചടിയെ തുടര്‍ന്ന് സംഘടനാ തെരഞ്ഞെടുപ്പിലൂടെ പുതിയ മുഖത്തിന് എഐസിസി ശ്രമിക്കുന്ന തരത്തിലായിരുന്നു മുന്നോട്ട് പോക്ക്. എന്നാല്‍ കഴിഞ്ഞയാഴ്ചത്തെ കോണ്‍ഗ്രസ് പ്രവര്‍ത്തക സമിതി യോഗം നിലപാട് മാറ്റി. സംഘടനാ തെരഞ്ഞെടുപ്പല്ല, നോമിനേഷനാണ് നല്ലതെന്ന ധാരണയിലുമെത്തി. അത് പ്രഖ്യാപിക്കുകയും ചെയ്തു. ഇതോടെ കേരളത്തിലും സമവായത്തിലൂടെ മാത്രമേ കെപിസിസി പ്രസിഡന്റ് എത്തൂ എന്നും വ്യക്തമായി.
ഈ തീരുമാനത്തെ മനസില്ലാ മനസോടെ ഉമ്മന്‍ ചാണ്ടിയും ചെന്നിത്തലയും അംഗീകരിക്കുകയായിരുന്നു.
ഇനി ഹൈക്കമാണ്ട് പറയുന്നവരെ അംഗീകരിക്കേണ്ടി വരും. ആന്റണിയുടെ വാക്കാകും കേരള കാര്യത്തില്‍ നിര്‍ണ്ണായകം. കഴിഞ്ഞ തവണ എല്ലാ നീക്കങ്ങളേയും പൊളിച്ചാണ് സുധീരനെ ആന്റണി കെപിസിസി പ്രസിഡന്റാക്കിയത്. ഈ സാഹചര്യത്തില്‍ തദ്ദേശ തെരഞ്ഞെടുപ്പ് അടുക്കുമ്പോള്‍ സുധീരന് തന്നെയാണ് കെപിസിസി പ്രസിഡന്റാകാന്‍ കൂടുതല്‍ സാധ്യതയത്രേ.
രമേശ് ചെന്നിത്തല മന്ത്രിയായ ഒഴിവിലെ താല്‍ക്കാലിക പ്രസിഡന്റാണ് സുധീരന്‍. സമവായത്തിലൂടെ കെപിസിസിയില്‍ എത്തിയാല്‍ പിന്നെ സ്ഥിരമാകും. അപ്പോള്‍ കൂടുതല്‍ അധികാരം കാട്ടാനും കഴിയും. അതുകൊണ്ട ്കരുതലോടെ നീങ്ങാനാണ് നീക്കം. ഇതിന്റെ ഭാഗമായാണ് വെടിനിര്‍ത്തലിന് ഉമ്മന്‍ ചാണ്ടിയും രമേശ് ചെന്നിത്തലയും തയ്യാറായതെന്നാണ് സൂചന.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha