സൃഹൃത്തുക്കൾ ചേർന്നു എടുത്ത ലോട്ടറിക്കു ഒന്നാം സമ്മാനം. പിന്നാലെ ലോട്ടറി കൈയിൽ ഉള്ള ആൾ മുങ്ങി. മൂന്നാർ ന്യൂ കോളനി സ്വദേശി ആർ. ഹരികൃഷ്ണനും അയൽവാസി സാബുവും ചേർന്ന് കഴിഞ്ഞ തിങ്കളാഴ്ച കുഞ്ചിത്തണ്ണിയിൽ നിന്നുമാണ് 30 രൂപ മുടക്കി വിൻ വിൻ കേരള ലോട്ടറി വാങ്ങിച്ചത്. ഫലം വന്നപ്പോൾ സാബു ലോട്ടറിയുമായി മുങ്ങി. പറ്റിക്കപ്പെട്ട ആർ. ഹരികൃഷ്ണൻ ഇത് സംബന്ധിച്ച് ഡിവൈഎസ്പിക്ക് പരാതി നൽകി. പോലീസ് ഊർജിതമായ അന്വേഷണം തുടങ്ങി.

ലോട്ടറി അടിച്ചപ്പോൾ ഹരി കൃഷ്ണൻറെ കൈയിലായിരുന്നു ലോട്ടറി ഉണ്ടായിരുന്നത്. പിറ്റേന്ന് ഇരുവരും ബ്ലോക്ക് പഞ്ചായത്ത് അംഗം സി. നെൽസനെയും കൂട്ടി മൂന്നാർ എസ്ബിഐ ശാഖയിൽ എത്തി. സമ്മാനത്തുകയ്ക്ക് 2 അവകാശികൾ ഉള്ളതിനാൽ ഇരുവരുടെയും പേരിൽ ജോയിന്റ് അക്കൗണ്ട് എടുക്കണമെന്ന ബാങ്കിന്റെ നിർദ്ദേശ പ്രകാരം രണ്ടുപ്പേരും തിരിച്ചു പോയി. അപ്പോൾ സാബുവിന്റെ കൈയിലായിരുന്നു ടിക്കറ്റ്. പിറ്റേന്ന് ബാങ്കിൽ പോകാൻ നോക്കുമ്പോഴായിരുന്നു താൻ കബളിപ്പിക്കപ്പെട്ട കാര്യം ഹരി കൃഷ്ണൻ മനസിലാക്കിയത്. സാബുവിന്റെ ഫോൺ സ്വിച്ച് ഓഫും വീട് പൂട്ടിയ നിലയിൽ ആയിരുന്നു. അയാളെ പറ്റിയുള്ള കൂടുതൽ വിവരങ്ങൾ അറിയില്ല.