വനിതാ ഏഷ്യാ കപ്പിൽ ഇന്ന് ശ്രീലങ്കയും ബംഗ്ലാദേശും ഏറ്റുമുട്ടും. ഗ്രൂപ്പ് ബി മത്സരത്തിൽ ദുബായ് ഇന്റർനാഷണൽ ക്രിക്കറ്റ് സ്റ്റേഡിയത്തിൽ രാത്രി എട്ടിനാണ് മത്സരം നടക്കുക. രണ്ട് മത്സരങ്ങളിൽ രണ്ട് ജയവുമായി ശ്രീലങ്കയാണ് ഗ്രൂപ്പിൽ ഒന്നാമത്. ഒരു ജയവുമായി ബംഗ്ലാദേശ് രണ്ടാം സ്ഥാനത്തുണ്ട്. ടൂർണമെന്റിൽ മികച്ച ഫോമിലാണ് ഇരു ടീമുകളും.

കഴിഞ്ഞ മത്സരത്തിൽ ഇന്തോനേഷ്യയെ 75 റൺസിന് പരാജയപ്പെടുത്തിയാമ് ശ്രീലങ്ക എത്തുന്നത്. ആദ്യം ബാറ്റ് ചെയ്ത ശ്രീലങ്ക 20 ഓവറിൽ ഏഴ് വിക്കറ്റ് നഷ്ടത്തിൽ 124 റൺസെടുത്തു. നിലാക്ഷി ഡി സിൽവ 35 പന്തിൽ 50 റൺസെടുത്ത് മികച്ച പ്രകടനം നടത്തുകയും ചെയ്തു.

ബംഗ്ലാദേശും ഇന്തോനേഷ്യക്കെതിരെ 71 റൺസിന്റെ മികച്ച ജയം നേടിയാണെത്തുന്നത്. ആദ്യം ബാറ്റ് ചെയ്ത ബംഗ്ലാദേശ് എട്ട് വിക്കറ്റ് നഷ്ടത്തിൽ 129 റൺസെടുത്തു.

ശോഭന മോസ്തരി 42 പന്തിൽ 40 റൺസെടുത്തു. ചേസിങ്ങിനിറങ്ങിയ ഇന്തോനേഷ്യ 58 റൺസിന് പുറത്തായി. നാഹിദ അക്തർ മൂന്ന് വിക്കറ്റും മാരൂഫ അക്തർ രണ്ട് വിക്കറ്റും നേടുകയായിരുന്നു.