കോഴിക്കോട് ഓമശ്ശേരിയിലെ ജ്വല്ലറിയില്‍ മൂന്നംഗ ഉത്തരേന്ത്യന്‍ സംഘം തോക്കുചൂണ്ടി കവര്‍ച്ച നടത്തി. ആകെ പന്ത്രണ്ടര പവന്‍ തൂക്കം വരുന്ന 14 സ്വര്‍ണവളകളാണ് സംഘം കവര്‍ന്നത്. സംഘത്തിലുള്‍പ്പെട്ട ഒരാളെ ജീവനക്കാര്‍ പിടികൂടുകയും പൊലീസിലേല്‍പിക്കുയും ചെയ്തു. രണ്ടുപേര്‍ രക്ഷപ്പെട്ടു. മുക്കം റോഡിലെ ഷാദി ഗോള്‍ഡില്‍ ശനിയാഴ്ച രാത്രി 7.30ഓടെയാണ് സംഭവം നടന്നത്.
ജീവനക്കാര്‍ കടയടക്കാനുള്ള ഒരുക്കത്തിലായിരുന്നു. ഇതിനിടെയായിരുന്നു മൂന്നംഗ സംഘം തോക്കും കത്തിയുമായി കടക്കകത്തേക്ക് കയറിയത്. മുഖം തുണികൊണ്ട് മറച്ച് കൈയുറ ധരിച്ച സംഘം പണവും സ്വര്‍ണവും ആവശ്യപ്പെട്ടു. മുന്നിലുണ്ടായിരുന്ന സ്വര്‍ണവളകള്‍ സംഘം എടുത്തു സഞ്ചിയിലിട്ടു. എതിര്‍ത്ത ജീവനക്കാരെ തോക്കുചൂണ്ടി ഭീഷണിപ്പെടുത്തി. ജീവനക്കാരുമായുള്ള മല്‍പിടിത്തത്തിനിടയില്‍ രണ്ടുപേര്‍ ഓടി രക്ഷപ്പെട്ടു. മൂന്നാമത്തെയാളെ ജീവനക്കാര്‍ ഷട്ടര്‍ താഴ്ത്തി ബലമായി കീഴ്‌പ്പെടുത്തി. കൊള്ളസംഘവുമായുള്ള മല്‍പിടിത്തത്തിനിടയില്‍ ജീവനക്കാരായ മനു, ഷാജു എന്നിവര്‍ക്ക് പരിക്കേറ്റു.
ഏറ്റുമുട്ടലില്‍ മുറിവു പറ്റിയതിനെ തുടര്‍ന്നുണ്ടായ രക്തപ്പാടുകള്‍ ജ്വല്ലറി നിലത്തുണ്ട്. കൊടുവള്ളിയില്‍ നിന്നെത്തിയ പൊലീസ് പിടികൂടിയ മോഷ്ടാവിനെ വൈദ്യപരിശോധനക്ക് താമരശ്ശേരി താലൂക്ക് ആശുപത്രിയിലെത്തിച്ചു.