യൂണിവേഴ്‌സിറ്റി കോളജ് അക്രമ സംഭവത്തില്‍ സുരക്ഷാ വലയം ഭേദിച്ച് സെക്രട്ടറിയേറ്റിനുള്ളില്‍ കെഎസ്‌യു പ്രതിഷേധം. അഞ്ച് കെഎസ്‌യു പ്രവര്‍ത്തകര്‍ മതില്‍ച്ചാടിക്കടന്ന് സെക്രട്ടറിയേറ്റിനുള്ളില്‍ പ്രവേശിച്ചാണ് പ്രതിഷേധം നടത്തിയത്. ഇതില്‍ ഒരു വനിതാ പ്രവര്‍ത്തക സുരക്ഷാ വല!യം ഭേദിച്ച് മുഖ്യമന്ത്രിയുടെ ഓഫീസിനു തൊട്ടുതാഴെവരെ എത്തി. മുഖ്യമന്ത്രിയുടെ ഓഫീസിലേക്ക് തള്ളിക്കയറാന്‍ ശ്രമിച്ച പ്രവര്‍ത്തകയെ പോലീസ് അറസ്റ്റ് ചെയ്തു നീക്കി. കെഎസ്‌യു സംസ്ഥാന പ്രസിഡന്റ് കെ.എം അഭിജിത്തിന്റെ സത്യാഗ്രഹ സമരപ്പന്തലില്‍നിന്നാണ് പ്രവര്‍ത്തകര്‍ അപ്രതീക്ഷിതമായി സെക്രട്ടറിയേറ്റിനുള്ളിലേക്ക് ചാടിക്കയറിയത്.
ഒരു വനിതാ പ്രവര്‍ത്തക ഉള്‍പ്പെടെ അഞ്ച് പേര്‍ സെക്രട്ടറിയേറ്റിനുള്ളിലേക്ക് മുദ്രാവാക്യവുമായി ഓടിയടുത്തപ്പോള്‍ പോലീസ് ആദ്യം അമ്പരന്നെങ്കിലും ആണ്‍കുട്ടികളെ ഉടന്‍ തന്നെ തടയാനായി. എന്നാല്‍ വനിതാ പോലീസുകാര്‍ സംഭവ സമയം ഇവിടെ ഇല്ലാതിരുന്നതിനാല്‍ കെഎസ്‌യു വനിതാ പ്രവര്‍ത്തകയെ തടയാന്‍ സാധിച്ചില്ല. പെണ്‍കുട്ടി കെഎസ്‌യു കൊടിയുമായി മുഖ്യമന്ത്രിയുടെ ഓഫീസിലേക്ക് പാഞ്ഞെത്തി.

മുഖ്യമന്ത്രിയുടെ ഓഫീസിനു മുന്നിലെ കവാടം അടച്ച് പോലീസ് പ്രതിരോധം തീര്‍ത്തു. എന്നാല്‍ ഇവിടെയും വനിതാ പോലീസ് ഇല്ലാതിരുന്നതിനാല്‍ അറസ്റ്റ് ചെയ്തുനീക്കാന്‍ കഴിഞ്ഞില്ല. ഏതാനും മിനിറ്റുകള്‍ പെണ്‍കുട്ടി മുഖ്യമന്ത്രിയുടെ ഓഫീസിനു മുന്നില്‍ മുദ്രാവാക്യം മുഴക്കി. ഓഫീസിലേക്ക് തള്ളിക്കയറാന്‍ ശ്രമിച്ച പെണ്‍കുട്ടിയെ ഒരു വനിതാ ജീവനക്കാരിയെത്തി തടഞ്ഞു.

ഇതോടെ വനിതാ പോലീസ് സ്ഥലത്തെത്തി പെണ്‍കുട്ടിയെ അറസ്റ്റ് ചെയ്തു സെക്രട്ടറിയേറ്റിനു വെളിയിലേക്ക് കൊണ്ടുപോയി. അറസ്റ്റിലായ മൂന്നു കെഎസ്‌യു പ്രവര്‍ത്തകരെയും പിന്നീട് എആര്‍ക്യാമ്പിലേക്ക് കൊണ്ടുപോയി. യൂണിവേഴ്‌സിറ്റി കോളജ് പ്രശ്‌നവുമായി ബന്ധപ്പെട്ട പ്രതിഷേധങ്ങളെ തുടര്‍ന്ന് വന്‍ സുരക്ഷയാണ് സെക്രട്ടറിയേറ്റിനുള്ളില്‍ പോലീസ് ഒരുക്കിയിരുന്നത്.
മന്ത്രിസഭാ യോഗം നടക്കുന്നതിനാല്‍ മുഖ്യമന്ത്രിയടക്കം എല്ലാ മന്ത്രിമാരും സെക്രട്ടറിയേറ്റില്‍ ഈ സമയം ഉണ്ടായിരുന്നു. മുഖ്യമന്ത്രിയുടേയും മന്ത്രിമാരുടേയും സുരക്ഷയും വര്‍ധിപ്പിച്ചിരുന്നു. എന്നാല്‍ ഈ സുരക്ഷാ സംവിധാനങ്ങളെയെല്ലാം ഭേദിച്ചാണ് കെഎസ്‌യു പ്രവര്‍ത്തകര്‍ സെക്രട്ടറിയേറ്റിനുള്ളില്‍ കടന്നത്.