പിണറായി സര്‍ക്കാര്‍ ജനങ്ങളെ വെല്ലുവിളിക്കുകയാണെന്ന രൂക്ഷവിമര്‍ശനവുമായി ഹൈക്കോടതി ചീഫ് ജസ്റ്റിസ്. സര്‍ക്കാര്‍ മൂന്നാറില്‍ കയ്യേറ്റങ്ങള്‍ പ്രോത്സാഹിപ്പിക്കുകയാണ്. ഇത് പൊതുജന വഞ്ചനയാണ്. കയ്യേറ്റ സ്ഥലങ്ങളിലെ നിര്‍മാണങ്ങള്‍ക്ക് വെള്ളവും വൈദ്യുതിയും നല്‍കുന്നുണ്ടെന്നും കോടതി ചൂണ്ടിക്കാട്ടി. കയ്യേറ്റങ്ങള്‍ക്കെതിരെ പരിസ്ഥിതി സംരക്ഷണ സമിതി നല്‍കിയ ഹര്‍ജി പരിഗണിക്കവെയായിരുന്നു വിമര്‍ശനം. റവന്യൂ വകുപ്പിന്റെ അനുമതിയില്ലാതെ മൂന്നാറില്‍ നിര്‍മാണം പാടില്ലെന്ന ഹൈക്കോടതി ഈവര്‍ഷം ആദ്യം ഉത്തരവിട്ടത്. തുടര്‍ന്ന് സബ്കളക്ടര്‍ രേണുരാജ് സത്യവാങ്മൂലം നല്‍കിയിരുന്നു. മൂന്നാറിലെ പഞ്ചായത്തിന്റെ അനധികൃത നിര്‍മാണം കോടതിയെ അറിയിക്കുകയും ചെയ്തിരുന്നു. റവന്യൂ വകുപ്പിന്റെ നടപടി തടസ്സപ്പെടുത്തിയ എം.എല്‍.എ രാജേന്ദ്രന്റെ നടപടിയും ഹൈക്കോടതിയെ അറിയിച്ചിരുന്നു. 

കയ്യേറ്റങ്ങള്‍ അനുവദിക്കില്ലെന്ന് പരസ്യമായി പറയുന്ന സര്‍ക്കാര്‍ കയ്യേറ്റക്കാര്‍ക്ക് എല്ലാ സൗകര്യങ്ങളും ഒരുക്കുന്നെന്നും കോടതി വിമര്‍ശിച്ചു. കയ്യേറ്റഭൂമിയിലെ നിര്‍മ്മാണപ്രവര്‍ത്തനങ്ങളെ സഹായിക്കുകയാണ് സര്‍ക്കാര്‍ ചെയ്യുന്നതെന്നും കുറ്റപ്പെടുത്തി. കയ്യേറ്റങ്ങള്‍ക്കെതിരെ നടപടി സ്വീകരിക്കണമെന്നും കയ്യേറ്റങ്ങള്‍ ഒഴിപ്പിക്കണമെന്നും 2010ല്‍ ഹൈക്കോടതി ഇടക്കാല ഉത്തരവ് ഇട്ടിരുന്നു. അത് നടപ്പാക്കുന്നതില്‍ സര്‍ക്കാരും റവന്യൂ വകുപ്പും വീഴ്ച വരുത്തിയെന്ന് ആരോപിച്ച് പരിസ്ഥിതി സംരക്ഷണ സമിതി നല്‍കിയ കോടതിയലക്ഷ്യ ഹര്‍ജിയില്‍ വാദം കേള്‍ക്കുമ്പോഴാണ് സര്‍ക്കാരിനെതിരെ കോടതി രൂക്ഷവിമര്‍ശനം നടത്തിയത്. മൂന്നാറിലെ അനധികൃത നിര്‍മാണങ്ങള്‍ക്കും വഴിയോര കച്ചവടങ്ങള്‍ക്കും എതിരെ പരാതി ഉണ്ടായിട്ടും പഞ്ചായത്ത് നടപടി സ്വീകരിച്ചിരുന്നില്ല. തുടര്‍ന്ന് കഴിഞ്ഞ മാസം വഴിയോരകച്ചവടങ്ങളും അനധികൃത നിര്‍മ്മാണവും സബ്കളക്ടറുടെ ഉത്തരവനുസരിച്ച് പൊളിച്ചുനീക്കിയിരുന്നു. 

കേരളത്തില്‍ നിന്നും അയല്‍സംസ്ഥാനങ്ങളില്‍ നിന്നും വിദേശങ്ങളില്‍ നിന്നും ആയിരക്കണക്കിന് വിനോദസഞ്ചാരികളാണ് മൂന്നാര്‍ ടൗണ്‍ കാണാന്‍ എത്തുന്നത്. അവര്‍ക്ക് സുഗമമായി യാത്ര ചെയ്യാനും നടക്കുന്നതിനും ലക്ഷങ്ങള്‍ മുടക്കി പഞ്ചായത്ത് നടപ്പാതകള്‍ നിര്‍മ്മിച്ചിട്ടുണ്ട്. പക്ഷെ, തമിഴ്‌നാട്ടില്‍ നിന്ന് അടക്കം എത്തിയിട്ടുള്ള കച്ചവടക്കാര്‍ ഈ പാതകള്‍ കയ്യേറി കച്ചവടം നടത്തുകയായിരുന്നു. പഞ്ചായത്ത് മുമ്പും ഇവരെ മാറ്റിയിട്ടുണ്ടെങ്കിലും വീണ്ടും ഇവര്‍ തല്‍സ്ഥാനങ്ങളില്‍ ഇടംപിടിക്കുകയായിരുന്നു. തുടര്‍ന്ന് വഴിയോര വാണിഭക്കാരെ മാറ്റണമെന്ന് പഞ്ചായത്തിന് സബ് കളക്ടര്‍ നിര്‍ദ്ദേശം നല്‍കിയെങ്കിലും ഫലമുണ്ടായില്ല.

മൂന്നാര്‍ ടൗണ്‍, ചര്‍ച്ചില്‍ പാലം, കോളനി റോഡിലെ വിദേശമദ്യഷോപ്പിന് എന്നിവിടങ്ങള്‍ക്ക് സമീപമുള്ള കച്ചവടങ്ങള്‍, മെയില്‍ ബസാറിലെ അനധികൃത കച്ചവടങ്ങള്‍ എന്നിവയാണ് മൂന്നാര്‍ വില്ലേജ് ഓഫീസര്‍ എസ്.ജയരാജിന്റെ നേതൃത്വത്തില്‍ പൊലീസും പഞ്ചായത്തും അടങ്ങുന്ന ദൗത്യസംഘം ഒഴിപ്പിച്ചത്. അര ഏക്കര്‍ സര്‍ക്കാര്‍ ഭൂമി സ്വകാര്യ വ്യക്തി കഴിഞ്ഞയാഴ്ച മുതല്‍ മൂന്നാര്‍ ടൗണിന് അടുത്ത് മണ്ണിട്ട് നികത്തുകയാണ്. കുറ്റിയാര്‍വാലിയില്‍ ഭൂമി ഇല്ലാത്തവര്‍ക്ക് പതിച്ച് നല്‍കിയ സ്ഥലത്തിന് സമീപം ആണ് കയ്യേറ്റം. ഇത് സംബന്ധിച്ച് വാര്‍ത്തകള്‍ വന്നിട്ടും നടപടി എടുത്തിട്ടില്ലെന്ന് ആക്ഷേപമുണ്ട്. പൊതു ആവശ്യങ്ങള്‍ക്ക് മാറ്റിയിട്ടിരുന്ന ഭൂമി ആണ് സ്വകാര്യ വ്യക്തി കയ്യേറിയത്. സ്‌കൂള്‍, ആശുപത്രി, അങ്കണവാടി എന്നിവ നിര്‍മിക്കാനാണ് ഈ ഭൂമി മാറ്റിയിട്ടത്.