തിരുവനന്തപുരത്ത് നോട്ടുകെട്ടുകള്‍ റോഡിലൂടെ പറന്നു നടന്നു. തിരുവനന്തപുരം ജില്ലയിലെ കല്ലറയിലാണ് സംഭവം. എ.ടി.എമ്മിന് സമീപത്തുള്ള കടയുടെ മുന്നിലേക്കാണ് നോട്ടുകള്‍ പറന്നെത്തിയത്. ഹിജാസ് അഹമ്മദ് എന്ന വ്യക്തി നടത്തുന്ന മുര്‍ക്കോ എന്ന സ്ഥാപനത്തിന് മുന്നിലാണ് നോട്ടുകള്‍ പറക്കുന്നത് കണ്ടത്. തുടര്‍ന്ന് കടയിലെ സി.സി.ടി.വി ദൃശ്യങ്ങൾ പരിശോധിച്ചപ്പോള്‍ നോട്ടുകള്‍ പറന്നു വന്ന് വീഴുന്നത് കണ്ടെത്തിയത്.

കടയുടമയും ചുറ്റും ഉണ്ടായിരുന്ന ആളുകളും ചേർന്ന് നോട്ടുകള്‍ ശേഖരിച്ചു. അവകാശികളാരും അന്വേഷിച്ച്‌ വരാത്തതിനെ തുടര്‍ന്ന് പാങ്ങോട് പോലീസ് സ്‌റ്റേഷനിലെത്തി നോട്ടുകൾ പോലീസിന്റെ കയ്യിൽ ഏൽപ്പിക്കുകയും ചെയ്തു. സംഭവത്തിന്റെ വീഡിയോ വൈറലായി കഴിഞ്ഞിരുന്നു. കുറച്ചു പണം കളഞ്ഞു കിട്ടിയിട്ടുണ്ട് എന്ന തലക്കെട്ടോടെയാണ് വീഡിയോ പ്രചരിക്കുന്നത് . കാല്‍ലക്ഷത്തോളം രൂപയാണ് കിട്ടിയിരിക്കുന്നത്.