കഴിഞ്ഞ ദിവസം വാട്‌സാപ്പില്‍ പ്രചരിച്ചൊരു സന്ദേശം തെറ്റാണെന്ന് വിദഗ്ധർ. പത്താം വാര്‍ഷികത്തോടനുബന്ധിച്ച്‌ ഉപയോക്താക്കള്‍ക്ക് വാട്സാപ്പ് 1000 ജിബി നല്‍കുമെന്നായിരുന്നു സന്ദേശം. ഇത് വ്യാജ സന്ദേശമാണെന്നും ഈ സന്ദേശം കണ്ട് തട്ടിപ്പിനിരയാവരുതെന്നും സൈബര്‍ സുരക്ഷാ സ്ഥാപനം മുന്നറിയിപ്പ് നൽകുന്നു. സന്ദേശം ലഭിക്കുന്നവര്‍ ഒരിക്കലും ആ ലിങ്കില്‍ ക്ലിക്ക് ചെയ്യുകയോ അത് ആര്‍ക്കും ഫോര്‍വേഡ് ചെയ്യരുത്. ഏതെങ്കിലും സ്ഥാപനത്തിന്റെ പേരില്‍ ഇങ്ങനെ പണമോ, മറ്റ് ആനുകൂല്യങ്ങളോ വാഗ്ദാനം ചെയ്തു സന്ദേശങ്ങള്‍ കിട്ടിയാൽ ആ സ്ഥാപനത്തിന്റെ ഔദ്യോഗിക വെബ്സൈറ്റില്‍ പോയി അത് പരിശോധിയ്ക്കണമെന്നും വിദഗ്ദര്‍ പറയുന്നു. വാട്സാപ്പ് ആര്‍ക്കും സൗജന്യ ഡാറ്റ കൊടുക്കുന്നില്ല. വാട്സാപ്പ് അത്തരം ഒരു സന്ദേശം പ്രചരിപ്പിക്കുന്നുമില്ല. അങ്ങനെ എന്തെങ്കിലും ഉണ്ടെങ്കില്‍ വെറുമൊരു ഫോര്‍വേഡ് മെസേജ് ആയി അത് പ്രചരിക്കില്ല.

ഒരു ലിങ്കുൾപ്പെടെയാണ് വാട്സാപ്പ് 1000 ജിബി സൗജന്യ ഇന്റര്‍നെറ്റ് നല്‍കുന്നുവെന്ന് സന്ദേശത്തിൽ പറഞ്ഞിരിക്കുന്നത്. ഈ ലിങ്കില്‍ ക്ലിക്ക് ചെയ്താല്‍ ഒരു സര്‍വേ പൂര്‍ത്തിയാക്കാനും ഒരു ചിത്രം വാട്സാപ്പില്‍ 30 പേര്‍ക്ക് അയച്ചു കൊടുക്കാനും ആവശ്യപ്പെടുന്നുണ്ട്. ഇങ്ങനെ ചെയ്താല്‍ സൗജന്യ ഡാറ്റ നേടാമെന്നാണ് സന്ദേശത്തിൽ പറയുന്നത്. ഇങ്ങനെയുള്ള സംശയാസ്പദമായ സന്ദേശങ്ങളോട് പ്രതികരിക്കരുതെന്ന് സൈബര്‍ സുരക്ഷാസ്ഥാപനങ്ങൾ പറയുന്നു. വാട്സാപ്പ്, എസ്.എം.എസ്, ഇമെയില്‍ ഉള്‍പ്പടെയുള്ള സേവനങ്ങളിലൂടെ ലഭിക്കുന്ന ഇത്തരം വാഗ്ദാന സന്ദേശങ്ങളോട് വേഗത്തിൽ പ്രതികരിക്കരുതെന്നും ഉപദേശം.