സംസ്ഥാന വനിതാ പൊലീസ് ബറ്റാലിയന്‍ രണ്ടാം ബാച്ചിന്റെ പാസിങ് ഔട്ട് പരേഡ് പൂര്‍ത്തിയാക്കി. 146 യുവതികള്‍ സേനയുടെ ഭാഗമായി. തൃശൂര്‍ രാമവര്‍മപുരം കേരള പൊലീസ് അക്കാദമി മൈതാനത്ത് നടന്ന പാസിങ് ഔട്ട് പരേഡില്‍ മുഖ്യമന്ത്രി പിണറായി വിജയന്‍ സല്യൂട്ട് സ്വീകരിച്ചു.
സംസ്ഥാന പൊലീസ് മേധാവി ലോക്‌നാഥ് ബെഹ്‌റ, എഡിജിപി ടോമിന്‍ ജെ തച്ചങ്കരി, ഡിഐജി ട്രെയിനിങ് അനൂപ് കുരുവിള ജോണ്‍ എന്നിവര്‍ സംബന്ധിച്ചു. സേനയില്‍ വനിതാ പ്രാതിനിധ്യം വര്‍ധിപ്പിക്കുന്നതിന്റെ ഭാഗമായാണ് എല്ലാ ജില്ലകളില്‍നിന്നുള്ള പ്രതിനിധികളെയും ഉള്‍പ്പെടുത്തി ഒമ്പതുമാസത്തെ തീവ്ര പരിശീലനം നല്‍കി വനിതാ പൊലീസ് ബറ്റാലിയന്‍ രണ്ടാം ബാച്ച് പുറത്തിറക്കിയത്.

ഇവരില്‍ 16 പേര്‍ സ്‌പെഷ്യല്‍ കമാന്‍ഡോകളാണ്. 29 പേര്‍ ബിരുദാനന്തര ബിരുദവും അഞ്ചുപേര്‍ എന്‍ജിനിയറിങ് ബിരുദവും ഒരാള്‍ നിയമ ബിരുദവും മൂന്നുപേര്‍ കംപ്യൂട്ടര്‍ ബിരുദാനന്തര ബിരുദവും 25 പേര്‍ അധ്യാപന ബിരുദവും മൂന്നുപേര്‍ എംബിഎയും 55 പേര്‍ ബിരുദവും നേടിയവരാണ്.

അടിസ്ഥാന പരിശീലനം കൂടാതെ, കുട്ടിക്കാനം അഞ്ചാം ബറ്റാലിയനില്‍ ഹൈ ആള്‍റ്റിറ്റിയൂഡ് ട്രെയിനിങ്, കേരള ആന്റി ടെററിസ്റ്റ് സ്‌ക്വാഡ് കമാന്‍ഡോ പരിശീലനവും തീരദേശ പരിപാലനത്തിന് പ്രത്യേക പരിശീലനവും നേടിയിട്ടുണ്ട്.
കംപ്യൂട്ടര്‍, നീന്തല്‍, യോഗ, കളരി, കരാത്തെ, ഡ്രൈവിങ് എന്നിവയില്‍ പരിശീലനവും ലഭിച്ചു. സാമൂഹ്യനീതി സ്ഥാപനങ്ങള്‍, കറക്ഷണല്‍ ഹോംസ്, ഫോറന്‍സിക് ലാബ് എന്നിവിടങ്ങള്‍ സന്ദര്‍ശിച്ച് പരിശീലനം പൂര്‍ത്തീകരിച്ചു. മികച്ച ഓള്‍ റൗണ്ടറായ കെ നിത്യ, ബസ്റ്റ് ഔട്ട്‌ഡോര്‍ വി കൃഷ്ണപ്രിയ, ബസ്റ്റ് ഇന്‍ഡോര്‍ എന്‍ എസ് നജില, സിന്‍സിയറിറ്റി ആന്‍ഡ് ഡെഡിക്കേഷന്‍ വിഭാഗത്തില്‍ എം നിവ്യ, ബസ്റ്റ് ഷൂട്ടര്‍ ആശ കെ സെബാസ്റ്റ്യന്‍ എന്നിവര്‍ക്ക് മുഖ്യമന്ത്രി പുരസ്‌കാരം സമ്മാനിച്ചു.