പ്രധാനമന്ത്രി നരേന്ദ്രമോദി സ്വപ്നം കണ്ട കാശ്മീര്‍ യാഥാര്‍ത്ഥ്യമാകുന്നതിന്റെ സൂചനകള്‍ കണ്ടു തുടങ്ങിയിരിക്കുകയാണ്. മോദിയുടെ മനസറിഞ്ഞ് കാശ്മീരിന്റെ ജനഹൃദയങ്ങളിലേക്ക് ഇറങ്ങിച്ചെല്ലുകയാണ് ദേശീയ സുരക്ഷാ ഉപദേഷ്ടാവ് കൂടിയായ അജിത് ഡോവല്‍. കണ്‍മുമ്പില്‍ നില്‍ക്കുന്ന ആളെ കണ്ട് അവര്‍ ഞെട്ടിപ്പോയി. ഇത് ആരാണെന്ന് വല്ല അറിവുമുണ്ടോ..? ഇന്ത്യയുടെ ദേശീയ സുരക്ഷാ ഉപദേഷ്ടാവിനോടാണ് നിങ്ങള്‍ സംസാരിക്കുന്നത്... ഇതറഞ്ഞ് ഞെട്ടിയ കാലിക്കച്ചവടക്കാരനെ ആശ്വസിപ്പിച്ചതാകട്ടെ അജിത് ഡോവലും. അയാള്‍ക്ക് കയ്യും കൊടുത്താണ് ഡോവല്‍ അവിടെ നിന്നും വിടപറഞ്ഞത്. 

ഈദിനു തൊട്ടുമുമ്പുള്ള ദിനങ്ങളില്‍ ദക്ഷിണ കശ്മീരിലെ അനന്ത് നാഗ് സന്ദര്‍ശിച്ച് ജനങ്ങളോട് അടുത്തിടപഴകി കാശ്മീരിന്റെ മനസ് തിരിച്ചറിയുകയായിരുന്നു അജിത് ഡോവല്‍. അനന്ത് നാഗിലെ കര്‍ഷകരോടും ആടുമാട് വ്യാപാരികളോടുമൊക്കെ ഡോവല്‍ ക്ഷേമാന്വേഷണങ്ങള്‍ നടത്തി. വ്യാപാരികളോട് അദ്ദേഹം ആടുമാടുകളുടെ വില്പന വിലയും, ശരാശരി തൂക്കവും, തീറ്റക്രമങ്ങളും ഒക്കെ വിശദമായി ചോദിച്ചറിഞ്ഞു. 

അവിടെ കൂടിനിന്നവരില്‍ മിക്കവര്‍ക്കും ഇത് അജിത് ഡോവലാണെന്നോ, അദ്ദേഹം ഇന്ത്യന്‍ പ്രധാനമന്ത്രിയുടെ ദേശീയ സുരക്ഷാ ഉപദേഷ്ടാവാണെന്നോ ഒന്നും അറിയില്ലായിരുന്നു. അക്കൂട്ടത്തില്‍ ഒരു കച്ചവടക്കാരന്‍ തന്റെ പുതിയ രണ്ടു ആട്ടിന്‍കുട്ടികളെ താന്‍ വാങ്ങിയത് കാര്‍ഗിലിലെ ദ്രാസില്‍ നിന്നുമാണ് എന്ന വിശേഷം ഡോവലുമായി പങ്കുവെച്ചു. എന്നിട്ടയാള്‍ അദ്ദേഹത്തോട് ചോദിച്ചു, ദ്രാസ് എന്ന് കേട്ടിട്ടുണ്ടോ? അത് എവിടെയാണെന്ന് അറിയുമോ എന്നാണ്. 

ഡോവല്‍ മറുപടി പറയാന്‍ തുടങ്ങും മുമ്പുതന്നെ അനന്ത്‌നാഗിലെ ഡെപ്യൂട്ടി കമ്മീഷണര്‍ ഖാലിദ് ജഹാംഗീര്‍ ഇടപെട്ടു പറഞ്ഞത് 'ഇത് ആരാണെന്ന് വല്ല അറിവുമുണ്ടോ? ഇന്ത്യയുടെ ദേശീയ സുരക്ഷാ ഉപദേഷ്ടാവിനോടാണ് നിങ്ങള്‍ സംസാരിക്കുന്നത്...' പരുങ്ങിപ്പോയ ആ കച്ചവടക്കാരനെയാണ് ഡോവല്‍ ആശ്വസിപ്പിച്ചത്. 

കേന്ദ്രം ആര്‍ട്ടിക്കിള്‍ 370 റദ്ദാക്കിയ അന്നുതൊട്ട് അജിത് ഡോവല്‍ കശ്മീരില്‍ ക്യാമ്പുചെയ്തുവരികയാണ്. മാധ്യമങ്ങളിലൂടെ പുറത്തുവന്ന അനന്തനാഗിലെ ഡോവലിന്റെ സന്ദര്‍ശനങ്ങളുടെ ഒരു വീഡിയോ ഇപ്പോള്‍ സോഷ്യല്‍ മീഡിയയില്‍ വൈറലാണ്. 

റോഡരികില്‍ വണ്ടി നിര്‍ത്തി അവിടെ കണ്ട ഒരു കുട്ടിയോടായി, ഡോവല്‍ ചോദിച്ചു 'സ്‌കൂളൊക്കെ അടച്ചിരിക്കുകയാണോ? അതെ...യെന്ന് കുട്ടി പറഞ്ഞു. ആദ്യമായിട്ടാണ് ഒരു ദേശീയ സുരക്ഷാ ഉപദേഷ്ടാവ് കശ്മീര്‍ താഴ് വരയിലെ ജനങ്ങളോട് നേരിട്ട് സംവദിക്കാന്‍ തെരുവിലേക്കിറങ്ങുന്നത്. 

തുടര്‍ന്നുള്ള വീഡിയോകളില്‍ തീര്‍ത്തും സാധാരണസ്ഥിതി പുനഃസ്ഥാപിക്കപ്പെട്ട തെരുവുകളും അങ്ങാടികളും മറ്റും കാണിക്കുന്നുണ്ട്. തുറന്നുപ്രവര്‍ത്തിക്കുന്ന ഒരു എടിഎമ്മിനു മുന്നില്‍ ക്യൂ നില്‍ക്കുന്ന ജനങ്ങളെയും, ആശുപത്രിക്കുമുന്നിലും മാര്‍ക്കറ്റുകളിലും ഒക്കെ തങ്ങളുടെ ആവശ്യങ്ങള്‍ക്കായി വന്നിരിക്കുന്ന പൊതുജനങ്ങളെയും ഒക്കെ ഈ വീഡിയോകളില്‍ കാണിക്കുന്നുണ്ട്. പശ്ചാത്തലത്തില്‍ കേള്‍ക്കുന്ന വിവരണങ്ങളിലും അതുതന്നെയാണ് ആവര്‍ത്തിക്കുന്നതും, കശ്മീരില്‍ എല്ലാം നോര്‍മലാണ്, എല്ലാവരും സന്തോഷത്തിലാണ്... പാകിസ്ഥാനുകാര്‍ പ്രചരിക്കുന്നതില്‍ ഒരു സത്യവുമില്ലെന്ന് തെളിയിക്കുന്നതാണ് ഇതെല്ലാം. കാശ്മീരിനെ സമാധാനത്തിന്റെ സുന്ദരഭൂമിയാക്കുമെന്നുള്ള മോദിയുടെ ആഗ്രഹം അങ്ങനെ ശിരസാ വഹിക്കുകയാണ് അജിത് ഡോവല്‍.