മാസപ്പടി കേസില് നിര്ണായക രേഖകള് ഇഡിയ്ക്ക് കൈമാറി എസ്എഫ്ഐഒ
മാസപ്പടി കേസില് പ്രതിപക്ഷ നേതാവ് പിണറായി വിജയന്റെ മകള് വീണയ്ക്കെതിരെ നിര്ണായക രേഖകള് ഇഡിക്ക് കൈമാറി എസ്എഫ്ഐഒ. കോടതിയില് ഹാജരാക്കിയ 134 സുപ്രധാന രേഖകളാണ് ഇഡിക്ക് ലഭിച്ചത്. കൊച്ചിയിലെ കമ്പനികാര്യ കേസുകള് കൈകാര്യം ചെയ്യുന്ന കോടതിയില് ഇഡി നല്കിയ അപേക്ഷയെ തുടര്ന്നാണ് നടപടി.
ഈ നീക്കത്തെ സിഎംആര്എല് കോടതിയില് എതിര്ത്തെങ്കിലും തടസവാദങ്ങള് തള്ളിക്കൊണ്ട് രേഖകള് കൈമാറാന് കോടതി ഉത്തരവിടുകയായിരുന്നു. എന്നാല് കോടതി ഉത്തരവ് വന്നിട്ടും രേഖകള് ലഭിക്കാനുണ്ടായ കാലതാമസം അന്വേഷണത്തെ പ്രതിസന്ധിയിലാക്കിയിരുന്നു.
വീണയും സിഎംആര്എല്ലും തമ്മിലുള്ള കരാര്, വീണയുടെ ആദായ നികുതി റിട്ടേണുകളടക്കമുള്ള സുപ്രധാന രേഖകളാണ് എസ്എഫ്ഐഒ ഇഡിക്ക് കൈമാറിയത്. ഈ മാസം 29ന് വീണ വിജയനെ രണ്ടാംഘട്ട ചോദ്യം ചെയ്യലിനായി വിളിച്ചിരിക്കുന്ന സാഹചര്യത്തില് ഈ രേഖകള് ലഭ്യമായത് അന്വേഷണത്തിന് കരുത്താകുമെന്നാണ് ഇഡിയുടെ പ്രതീക്ഷ. അതേസമയം, ഈ മാസം 17 ന് വീണയെ ചോദ്യം ചെയ്തിരുന്നു. ചോദ്യം ചെയ്യലില് പല രേഖകളും ഹാജരാക്കാന് സാവകാശം വേണമെന്ന് വീണ ആവശ്യപ്പെട്ടിരുന്നു. ഇതിന്റെ അടിസ്ഥാനത്തിലാണ് 29ലെ ചോദ്യം ചെയ്യല്.
https://www.facebook.com/Malayalivartha
