അന്തരിച്ച പിതാവിന്റെ മൃതദേഹത്തിന്റെ മുന്നില്‍ നിന്നുകൊണ്ട് മകന്‍ വധുവിനെ താലിചാര്‍ത്തി. ദൈവമണി എന്ന 55 കാരനാണ് മരിച്ചത്. ദൈവമണിയുടെ മകന്‍ അലക്‌സാണ്ടറിന്റെയും കൊണമംഗലം ബാലസുന്ദരത്തിന്റെ മകള്‍ ജഗദീശ്വരിയുടെയും വിവാഹം സെപ്റ്റംബര്‍ രണ്ടിന് നടക്കാനിരുന്നതാണ്. ഇതിന്റെ ക്ഷണപത്രം കൈമാറുന്നതിനിടെയാണ് വെള്ളിയാഴ്ച ദൈവമണി മരിച്ചത്. തമിഴ്‌നാട്ടിലെ വിഴുപ്പുറം ജില്ലയിലെ ഡിണ്ടിവനം സിങ്കന്നൂറിലാണ് വിചിത്രമായ സംഭവമുണ്ടായിരിക്കുന്നത്. വിവാഹ ക്ഷണപത്രിക ബന്ധുക്കള്‍ക്കും സുഹൃത്തുക്കള്‍ക്കും നല്‍കുന്നതിനിടെയാണ് വെള്ളിയാഴ്ച ഉച്ചക്ക് ദൈവമണി പൊടുന്നനെ ഹൃദയാഘാതംമൂലം മരിച്ചത്. മയിലം സുബ്രഹ്മണ്യസ്വാമി ക്ഷേത്രത്തില്‍ വച്ച വിവാഹം കഴിക്കണമെന്നായിരുന്നു ആദ്യം നിശ്ചയിച്ചിരുന്നത്.

എന്നാല്‍ പിതാവ് മരിച്ചതോടെ പിതാവിന്റെ സാന്നിധ്യത്തില്‍ വിവാഹം കഴിക്കണമെന്നാഗ്രഹിച്ച അലക്‌സാണ്ടര്‍ ഉടനടി വധുവിന്റെ വീട്ടുകാരുമായി ബന്ധപ്പെട്ടു. ഇവരും വിവാഹത്തിന് സമ്മതിക്കുകയും ചെയ്തു. ഇതോടെ മൃതദേഹത്തില്‍ വെള്ള ഷര്‍ട്ടും മുണ്ടും ധരിപ്പിച്ച്‌ മാലയിട്ട് കസേരയില്‍ ഇരുത്തിയ ശേഷം തുടര്‍ന്ന് പിതാവിന്റെ കൈയില്‍നിന്ന് താലിവാങ്ങുന്നത് പോലെ സ്വീകരിച്ച്‌ താലി കെട്ടുകയായിരുന്നു. പിന്നീട് കുടുംബാംഗങ്ങളൊന്നിച്ച്‌ ഗ്രൂപ് ഫോട്ടോയുമെടുത്തു. ശനിയാഴ്ച രാവിലെ മൃതദേഹം സംസ്‌കാരവും നടത്തി. സ്‌കൂള്‍ അധ്യാപകരായ ഇരുവരുടെയും അച്ഛനൊപ്പമുള്ള വിവാഹ ചിത്രം സമൂഹമാധ്യമങ്ങളില്‍ വൈറലാണ്.