മലപ്പുറം വഴിക്കടവിലെ പുഞ്ചക്കൊല്ലി വനത്തില്‍ 250ലധികം ആദിവാസികള്‍ കുടുങ്ങിക്കിടക്കുന്നതായി വിവരം . പുഞ്ചക്കൊല്ലി, അളയ്ക്കല്‍ കോളനികളിലായുള്ള കാട്ടുനായ്ക്ക വിഭാഗത്തില്‍പ്പെട്ടവരാണ് വനത്തില്‍ ഒറ്റപ്പെട്ടുകിടക്കുന്നത് .
പുഞ്ചക്കൊല്ലിയില്‍ നിന്ന് വഴിക്കടവിലേക്ക് എത്തണമെങ്കില്‍ ഒരു തോട് കടക്കണമായിരുന്നു . എന്നാല്‍ , കനത്ത മഴയില്‍ തോടിന് കുറുകെയുള്ള പാലം തകര്‍ന്നതോടെ കുടുംബങ്ങള്‍ ഒറ്റപ്പെട്ടു . 102 കുടുംബങ്ങളാണ് കോളനികളില്‍ കുടുങ്ങിക്കിടക്കുന്നത്.
മഴ കനക്കുന്നതിന് മുമ്പ് തന്നെ ഉദ്യോഗസ്ഥര്‍ കോളനിയിലെത്തി ഇവരോട് മാറാന്‍ ആവശ്യപ്പെട്ടെങ്കിലും ഇവര്‍ മാറാന്‍ കൂട്ടാക്കിയില്ല. കാട്ടുനായ്ക്ക വിഭാഗത്തില്‍പ്പെടുന്ന ഇവര്‍ പുറം ലോകവുമായി അധികം ബന്ധമില്ലാത്തവരാണ് . അരിയും പയറും വാങ്ങുന്നതടക്കമുള്ള അത്യാവശ്യ ആവശ്യങ്ങള്‍ക്ക് വേണ്ടി മാത്രമാണ് ഇവര്‍ പുറത്തേക്ക് ഇറങ്ങുന്നത് .
കനത്ത മഴയില്‍ തോട് പുഴ പോലെ ഒഴുകാന്‍ തുടങ്ങുകയും പാലം തകരുകയും ചെയ്തത് ഇവര്‍ക്ക് തിരിച്ചടിയായിരിക്കുകയാണ്. വടം കെട്ടി ഇവരെ പുറത്തെത്തിക്കാനടക്കം അഗ്‌നിശമനസേനാംഗങ്ങളും ദുരന്തനിവാരണ സേനയും തയ്യാറാണെങ്കിലും ആദിവാസികള്‍ സഹകരിക്കുന്നില്ല എന്നതാണ് പ്രശ്‌നം . നിലവില്‍ കയറു കെട്ടി ഭക്ഷണ സാമഗ്രികള്‍ കോളനിയിലേക്ക് എത്തിക്കാനുള്ള ശ്രമങ്ങളാണ് നടത്തുന്നത്.