പ്രളയത്തില് മരിച്ചവരുടെ മൃതദേഹങ്ങള് പോസ്റ്റുമോര്ട്ടം ചെയ്യാന് നിസ്ക്കാര സ്ഥലം നല്കിയ മലപ്പുറം പോത്തുകല് മഹല്ല് കമ്മിറ്റിയും ദുരിതാശ്വാസ നിധിയിലേക്ക് സ്വന്തം കടുക്കന് നല്കിയ ശ്രീനാഥ് നമ്പൂതിരിയും മുഖ്യമന്ത്രിയെ അത്ഭുതപ്പെടുത്തുന്നു
16 AUGUST 2019 04:48 PM IST
മലയാളി വാര്ത്ത
കഴിഞ്ഞ വര്ഷത്തെ മഹാപ്രളയത്തിലും ആരാധനാലയങ്ങള് അഭയകേന്ദ്രങ്ങളാകുന്നത് നാം കണ്ടിരുന്നു. ദിവസങ്ങളോളം നാനാ ജാതി മതസ്ഥരെ താമസിപ്പിക്കാനും അവര്ക്കു ഭക്ഷണവും മറ്റു സൗകര്യങ്ങളും ചെയ്തു കൊടുക്കാനും ആരാധനാലയ നടത്തിപ്പുകാര് തയാറായി. കേരളത്തിന്റെ മനുഷ്യ സ്നേഹത്തിലധിഷ്ഠിതമായ സാമൂഹിക ജീവിതത്തിനും മതനിരപേക്ഷ പാരമ്പര്യത്തിനും നേര്സാക്ഷ്യങ്ങളായാണ് ഈ ആരാധനാലയങ്ങള് നിലകൊണ്ടത്. അവിടെ ഒരു തരത്തിലുമുള്ള വിദ്വേഷമോ വേര്തിരിവോ പ്രകടമായില്ല. പ്രിയപ്പെട്ടവരുടെ വിയോഗത്തില് വിങ്ങിപ്പൊട്ടുന്നവരും കിടപ്പാടമടക്കം എല്ലാം നഷ്ടപ്പെട്ടവരും ജീവിത സ്വപ്നങ്ങള്ക്ക് ഭംഗം വന്നവരും ഭാവിയെക്കുറിച്ചു കടുത്ത ആശങ്കയുള്ളവരുമൊക്കെയാണ് ദുരിതാശ്വാസ ക്യാമ്പുകളില് എത്തിപ്പെട്ടത്.
ഭക്ഷണവും പരിചരണവും പ്രാഥമിക സൗകര്യങ്ങളും അവിടെ ലഭിക്കുന്നുണ്ടെങ്കിലും നൈരാശ്യവും അരക്ഷിത ബോധവും അവരെ നയിക്കുന്നത് സ്വാഭാവികമാണ്. അത്തരം അവസ്ഥയില് ആ മനുഷ്യര്ക്ക് പ്രത്യാശ പകര്ന്നു നല്കുന്നതിനുള്ള ദൗത്യവും ആരാധനാലയങ്ങളോടനുബന്ധിച്ച് ഒരുക്കാന് ശ്രമം നടന്നിരുന്നു. അതിന് കൂട്ട പ്രാര്ത്ഥനകളടക്കം സംഘടിപ്പിച്ചു. എല്ലാ മതത്തിലും പെട്ടവര് അത്തരം പ്രാര്ത്ഥനകളില് പങ്കാളികളായി. എല്ലാ മനുഷ്യരെയും ഒന്നായി കാണുന്നതിനും അവര്ക്ക് ശാന്തി പ്രദാനം ചെയ്യുന്നതിനുമുള്ള ഉദ്യമങ്ങളാണുണ്ടായതെന്നും മുഖ്യമന്ത്രി ഓര്മിച്ചു. ഒരുമാസത്തെ സ്വന്തം വരുമാനം ആകെ നല്കുന്നവര്, മകന്റെ വിവാഹത്തിന് നീക്കിവെച്ച പണം ഏല്പ്പിക്കുന്നവര്, സമ്പാദ്യക്കുടുക്ക അപ്പാടെ ഏല്പ്പിക്കുന്ന കുട്ടികള് മുഖ്യമന്ത്രിയുടെ ദുരിതാശ്വാസ് നിധി ശക്തിപ്പെടുത്താനുള്ള ജന മനസ്സുകളുടെ നിശ്ചയദാര്ഢ്യം തൊട്ടറിയുകയാണ്.
ദുരിതാശ്വാസനിധിയിലേക്ക് തന്റെ കടുക്കന് ഊരി നല്കിയ മങ്കട അങ്ങാടിപ്പുറം തിരുമാന്ധാംകുന്ന് ഭഗവതിക്ഷേത്രത്തിലെ മേല്ശാന്തി ശ്രീനാഥ് നമ്പൂതിരി തന്നെ ഞെട്ടിച്ചെന്നും മുഖ്യമന്ത്രി പറയുന്നു. ഇങ്ങനെയുള്ള മനുഷ്യര് ഉള്ളപ്പോള് നമ്മളെ ആര്ക്കാണ് തോല്പ്പിക്കാന് കഴിയുകയെന്നും മുഖ്യമന്ത്രി ചോദിക്കുന്നു. കഴിഞ്ഞ പ്രളയത്തിന് ശേഷം ദുരിതബാധിതരെ സഹായിക്കാന് ഇടുക്കിയിലെ ഒരു കര്ഷകന് തന്റെ ഒന്നരയേക്കര് ഭൂമിയില് അഞ്ച് സെന്റ് ഒഴികെയുള്ള ഭൂമി ദുരിതബാധിതര്ക്ക് വിട്ട് കൊടുത്തിരുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെ ഫേസ്ബുക്ക് പേജ് LIKE ചെയ്യുക
https://www.facebook.com/Malayalivartha
https://www.facebook.com/Malayalivartha
