മെഡിസിപ്: ആശുപത്രികള്‍ക്ക് ന്യായമായ നിരക്ക് നല്‍കാതിരുന്നാല്‍ പദ്ധതി പരാജയപെടുമെന്ന് ഐ.എം.എ
തിരുവനന്തപുരം: മെഡിസിപ് ആരോഗ്യ പദ്ധതി എങ്ങനെ നടപ്പാക്കണം എന്നതിനെ കുറിച്ച് പുനര്‍വിചിന്തനം നടത്താന്‍ സര്‍ക്കാര്‍ തീരുമാനിച്ചതിനെ സ്വാഗതം ചെയ്യുന്നതായി ഇന്ത്യന്‍ മെഡിക്കല്‍ അസോസിയേഷന്‍ അറിയിച്ചു. എന്നാല്‍ പുതിയ പദ്ധതി നടപ്പിലാക്കുന്നതിന് മുന്‍പ് പ്രായോഗികമായ രീതിയില്‍ വിപുലമായ ചര്‍ച്ച എല്ലാവരുമായും നടത്തേണ്ടത് അത്യാവശ്യമാണെന്നും ഐ.എം.എ അഭിപ്രായപ്പെട്ടു. വളരെ അപ്രയോഗികമായ ചികിത്സ നിരക്കുകള്‍ നിശ്ചയിച്ചതിനാലാണ് സ്വകാര്യ ആശുപത്രികല്‍ ഇതില്‍ നിന്നും വിട്ടു നില്‍ക്കുന്നത്. ആശുപത്രികള്‍ക്ക് ന്യായമായ നിരക്ക് നല്‍കാതിരുന്നാല്‍ പദ്ധതി പരാജയപെട്ടുപോകാന്‍ വീണ്ടും സാധ്യതയുണ്ട്.
ആശുപതികള്‍ക്കു ന്യായമായ നിരക്ക് കൃത്യമായ സമയത്തു നല്‍കുന്നു എന്ന് ഉറപ്പാക്കുന്ന പദ്ധതി ഉണ്ടാകണം. സര്‍ക്കാര്‍ നേരിട്ട് നടപ്പിലാക്കുന്ന ഇന്‍ഷുറന്‍സ് പദ്ധതി അപ്രായോഗികമാണെന്നു കരുതുവാന്‍ കഴിയുകയില്ല. എന്നിരുന്നാല്‍ പോലും മീഡിസിപ് പരിഷ്‌കരിക്കുന്നതിന് തീരുമാനം ഉണ്ടായതിനെ ഇന്ത്യന്‍ മെഡിക്കല്‍ അസിഡോസിയേഷന്‍ സ്വാഗതം ചെയ്യുന്നതായി ഐ എം എ സംസ്ഥാന പ്രസിഡന്റ് ഡോ.എം.ഇ സുഗതനും, സെക്രട്ടറി ഡോ.സുള്‍ഫിനൂഹുവും അറിയിച്ചു.
സര്‍ക്കാര്‍ ജീവനക്കാരുടേയും, പെന്‍ഷന്‍കാരുടേയും ആരോഗ്യ ഇന്‍ഷ്വറന്‍സ് പദ്ധതിയായ മെഡിസിപ്പിന്റെ ഇടനിലക്കാരായി ഇന്‍ഷ്വറന്‍സ് ഏജന്‍സികളായ റിലയിന്‍സ് ഉള്‍പ്പെടെയുളള സ്വകാര്യ കമ്പിനികള്‍ വരുന്നത് കടുത്ത ചൂഷണത്തിന് ഇടനല്‍കുമെന്ന് ഇന്ത്യന്‍ മെഡിക്കല്‍ അസോസിയേഷന്‍ കേരളഘടകം ആവശ്യപ്പെട്ടതിനെ തുടര്‍ന്നാണ് സര്‍ക്കാര്‍ തീരുമാനം പുനപ്പരിശോധിച്ചത്. ഏതാണ്ട് 15 ശതമാനം മുതല്‍ 20 ശതമാനം വരെ തുക കമ്മീഷനായി ഇത്തരം കമ്പിനികള്‍ക്ക് ലഭിക്കുമ്പോള്‍ മികച്ച ചികിത്സ നല്‍കുന്നതിന് ഇത് തടസ്സമാകുമെന്നും ഐ.എം.എ ചൂണ്ടിക്കാട്ടിയിരുന്നു. അതിനാല്‍ സര്‍ക്കാര്‍ നേരിട്ട് നടത്തുന്നതായിരിക്കും അഭികാമ്യമെന്ന് ഇന്ത്യന്‍ മെഡിക്കല്‍ അസോസിയേഷന്‍ ആവശ്യപ്പെട്ടു.
നിലവിലുള്ള സര്‍ക്കാര്‍ സംവിധാനങ്ങളിലൂടെയാണ് ഇപ്പോള്‍ ചികിത്സ സംബന്ധമായ ചിലവുകളുടെ രേഖകള്‍ കൈകാര്യം ചെയ്യുന്നത്. അത് കൂടുതല്‍ വിപുലീകരിച്ച് സര്‍ക്കാര്‍ ഉദ്യോഗസ്ഥരുടെ മേല്‍നോട്ടത്തില്‍ മെഡിസിപ്പ് പദ്ധതി നടപ്പിലാക്കുന്നതാണ് അഭികാമ്യം. ലോകത്ത് എമ്പാടും ഇന്‍ഷ്വറന്‍സ് പദ്ധതികള്‍ തകരുന്നതാണ് കണ്ടുവരുന്നത്. അത് കൊണ്ട് ഇന്‍ഷ്വറന്‍സ് ഏജന്‍സികളെ ഒഴിവാക്കി കൊണ്ട് ഇന്‍ഷ്വറന്‍സുകാര്‍ ചെയ്യുന്ന അതേ റോള്‍ സര്‍ക്കാര്‍ സംവിധാനങ്ങള്‍ക്ക് നടപ്പിലാക്കാന്‍ കഴിയുന്നതാണ്. ഇതിന് വരുന്ന അധിക ചിലവ് മാത്രമാകും സര്‍ക്കാര്‍ വഹിക്കേണ്ടി വരുക.
https://www.facebook.com/Malayalivartha
