അഞ്ച് നഗരങ്ങളിലെ ഓഫീസുകളിലും സെക്രട്ടറിയേറ്റിലും പ്രവൃത്തി സമയങ്ങളിൽ ഇനി മാറ്റം. ഉച്ചഭക്ഷണ ഇടവേള 15 മിനിറ്റായി എല്ലാ ഓഫീസുകളിലും മാറ്റം വരുത്തി. 15 മിനിറ്റ് വൈകി 1.15നാണ് തുടങ്ങുക. പഴയതുപോലെ രണ്ട് വരെയാണ് സമയം. ഇത് സംബന്ധിച്ച് ഉദ്യോഗസ്ഥ ഭരണ പരിഷ്‌കാര വകുപ്പ് ഉത്തരവിറക്കി. സര്‍ക്കാര്‍ ഓഫിസുകളിലെ പ്രവൃത്തി സമയം 10 മുതല്‍ അഞ്ച് വരെയാണെങ്കിലും സെക്രട്ടറിയേറ്റിലും തിരുവനന്തപുരം, കോട്ടയം, എറണാകുളം, തൃശൂര്‍, കോഴിക്കോട് നഗര പരിധിയിലെയും ഓഫിസുകളുടെ സമയം 10.15 മുതല്‍ 5.15 വരെയായിരിക്കും.

ചില ജില്ലകളിലെ നഗര പ്രദേശങ്ങളിലെ ഓഫിസ് സമയക്രമത്തില്‍ പ്രദേശങ്ങളുടെ പ്രത്യേക സാഹചര്യം പരിഗണിച്ച് അനുവദിച്ച ഇളവ് തുടരേണ്ടതുണ്ടെന്ന് ഉത്തരവില്‍ പറയുന്നു. ഈ പശ്ചാത്തലത്തിലാണ് സെക്രട്ടറിയേറ്റിലെ പ്രവൃത്തി സമയം അഞ്ച് നഗരങ്ങളിലെ ഓഫീസുകള്‍ക്കുകൂടി ബാധകമാക്കിയത്.