കൊച്ചി വൈറ്റിലയിൽ വീട്ടിൽ കറിവയ്ക്കാനായി മീന്‍ വൃത്തിയാക്കുന്നതിനിടെ തൊലിക്കടിയില്‍ നിന്ന് കണ്ടെത്തിയത് രണ്ടിഞ്ച് നീളത്തിലുള്ള ജീവനുള്ള നൂറോളം നൂല്‍പ്പുഴുക്കളെ. കൊച്ചുവീട്ടില്‍ അഗസ്റ്റിന്റെ വീട്ടില്‍ വാങ്ങിയ മീനിലാണ് പുഴുക്കളെ കണ്ടെത്തിയത് ഉടന്‍ വീട്ടുകാ‌ര്‍ ഡിവിഷന്‍ കൗണ്‍സിലര്‍ ബൈജു തോട്ടോളിയെ വിവരമറിയിക്കുകയായിരുന്നു.

കോപ്പറേഷന്‍ ഹെല്‍ത്ത് സൂപ്പര്‍വൈസറെ ഡിവിഷന്‍ കൗണ്‍സിലര്‍ വിവരമറിയിച്ചെങ്കിലും അവധി ദിവസമായതിനാല്‍ അധികൃതര്‍ സ്ഥലത്തെത്തിയില്ല. ഇവര്‍ എത്തുന്നത് വരെ മീന്‍ സൂക്ഷിച്ചുവയ്‌ക്കുമെന്ന് അഗസ്റ്റിന്‍ പറഞ്ഞു. അഗസ്റ്റിന്റെ വീടിന്റെ സമീപത്ത് കൂടി ഇരുചക്ര വാഹനത്തില്‍ മത്സ്യ കച്ചവടം നടത്തുന്ന വ്യക്തിയില്‍ നിന്നാണ് മീന്‍ വാങ്ങിയത്. ഇയാള്‍ തോപ്പുംപടി ഹാര്‍ബറില്‍ നിന്നാണ് ഈ മീന്‍ എടുത്തതെന്നാണ് സൂചന.