മുളന്തുരുത്തിയില് ഫയര് എന്ജിന് പ്രവര്ത്തനരഹിതം ആകുന്നത് പതിവാകുന്നു
മുളന്തുരുത്തി ഫയര് സ്റ്റേഷനിലെ, അടിക്കടി ബ്രേക്ക്ഡൗണ് ആകുന്ന ഫയര് എന്ജിന് അഗ്നിരക്ഷാ ഉദ്യോഗസ്ഥര്ക്ക് കര്ത്തവ്യ നിര്വഹണത്തില് വെല്ലുവിളിയാകുന്നു. മുളന്തുരുത്തി ഫയര് സ്റ്റേഷന്റെ പരിധിയില് വരുന്ന മുളന്തുരുത്തി, ചോറ്റാനിക്കര, ആമ്പല്ലൂര്, എടയ്ക്കാട്ടുവയല്, മണീട്, തിരുവാണിയൂര് എന്നീ ആറ് പഞ്ചായത്തുകള്ക്കായുള്ള ഈ ഫയര് സ്റ്റേഷനിലെ ഏക വാഹനമാണ് ഈ ഫയര് എന്ജിന്.
ഈ പഞ്ചായത്ത് പരിധിയില് എന്ത് അത്യാഹിതം സംഭവിച്ചാലും നാട്ടുകാര് ഫയര് സ്റ്റേഷനില് ബന്ധപ്പെടുകയും ഉദ്യോഗസ്ഥര് ഉടന് തന്നെ സംഭവസ്ഥലത്ത് എത്തിച്ചേര്ന്നു കര്ത്തവ്യനിരതരാകുകയും ചെയ്യുന്നുണ്ട് എങ്കിലും ഇതിനിടയില് ഫയര് എന്ജിന് പണിമുടക്കുന്നത് ഉദ്യോഗസ്ഥരുടെ ജോലി തടസപ്പെടുന്നതിനൊപ്പം ഉദ്യോഗസ്ഥര്ക്കും അത്യാഹിതത്തിന് സാക്ഷിയാകുന്ന നാട്ടുകാര്ക്കും മാനസിക പിരിമുറുക്കത്തിന് ഇടവരുത്തുന്നു.
കഴിഞ്ഞ ദിവസം എടയ്ക്കാട്ടുവയലില് കിണറ്റില് വീണയാളെ രക്ഷിക്കുന്നതിനായി പോകുന്നതിന് വണ്ടി ഗാരേജില് നിന്നിറക്കിയപ്പോള് ബാറ്ററിയിലെ ടെര്മിനല് ഷോര്ട്ടായി തകരാറിലായെന്ന് ഉദ്യോഗസ്ഥര് പറഞ്ഞു. അത്യാഹിതങ്ങള് സംഭവിക്കുമ്പോള് ഓടിയെത്തേണ്ട അഗ്നിരക്ഷാ സേനയ്ക്ക് ഇരുട്ടടിയായിരിക്കുകയാണ് പഴക്കം ചെന്ന ഈ വാഹനം.
നാല് വര്ഷമായി പ്രവര്ത്തിക്കുന്ന സ്റ്റേഷനില് ആവശ്യത്തിന് ജീവനക്കാരില്ലെന്നും പരാതിയുണ്ട്. മുളന്തുരുത്തി ഫയര് സ്റ്റേഷനിലെ ഫയര് എന്ജിന് 17 വര്ഷം പഴക്കമുള്ളതാണ്. സര്ക്കാര് ഏതാനും ഫയര് സ്റ്റേഷനുകള്ക്ക് പുതിയ ഫയര് എന്ജിനുകള് അനുവദിക്കുന്നതിനുള്ള നടപടി ആരംഭിച്ചതായി റിപ്പോര്ട്ടുകളുണ്ട്. ഇതില് മുളന്തുരുത്തി ഫയര് സ്റ്റേഷനെ കൂടി ഉള്പ്പെടുത്തണമെന്നാണ് ജനപ്രതിനിധികളുടെയും പൊതുപ്രവര്ത്തകരുടെയും ആവശ്യം.
https://www.facebook.com/Malayalivartha
