സംവിധായനെ പഞ്ഞിക്കിട്ട് സോഷ്യല്മീഡിയ... മൂന്നാംകിട നടനോടൊപ്പം വേദി പങ്കിടില്ലെന്ന് പറഞ്ഞ ദേശീയ അവാര്ഡ് ജേതാവായ അനില് രാധാകൃഷ്ണ മേനോനെതിരെ വ്യാപക പ്രതിഷേധം: വേദിയില് കുത്തിയിരുന്ന് പ്രതിഷേധിച്ച് നടന് ബിനീഷ് ബാസ്റ്റിന് മനസ് തുറന്നതോടെ നടപടിയുമായി ഫെഫ്കയും
ഇത് കേരളത്തിലാണോ നടന്നത് എന്ന് സംശയമുണര്ത്തുന്ന വാര്ത്തയാണ് വന്നുകൊണ്ടിരിക്കുന്നത്. യുവ നടന് ബിനീഷ് ബാസ്റ്റിന് മുഖ്യാതിഥിയായി എത്തുന്ന വേദിയില് പങ്കെടുക്കില്ലെന്ന് ദേശീയ അവാര്ഡ് ജേതാവ് സംവിധായകന് അനില് രാധാകൃഷ്ണ മേനോന് പറഞ്ഞെന്ന വാര്ത്തയാണ് പുറത്ത് വന്നുകൊണ്ടിരിക്കുന്നത്. ഇതിന് പിന്നാലെ പരസ്യ പ്രതിഷേധവുമായി നടന് ബിനീഷ് ബാസ്റ്റിന് രംഗത്തെത്തി. വേദിയില് കുത്തിയിരുന്ന് ബിനീഷ് ബാസ്റ്റിന് പ്രതിഷേധം അറിയിച്ചു. ഇതിന്റെ വീഡിയോ ഇപ്പോള് വൈറലായിരിക്കുകയാണ്.
ഇന്നലെ പാലക്കാട് ഗവണ്മെന്റ് മെഡിക്കല് കോളജില് നടന്ന കോളേജ് ഡേയില് നടന് ബിനീഷ് ബാസ്റ്റിനെയാണ് മുഖ്യാതിഥിയായി സംഘാടകര് തീരുമാനിച്ചിരുന്നത്. മാഗസിന് റിലീസിന് സംവിധായകന് അനില് രാധാകൃഷ്ണനെയും. എന്നാല് ബിനീഷ് ബാസ്റ്റിന് വരുന്ന വേദിയില് താന് പങ്കെടുക്കില്ലെന്ന് അനില് രാധാകൃഷ്ണന് നിലപാടെടുത്തതോടെ സംഘാടകര് കുഴങ്ങി.
അനില് രാധാകൃഷ്ണന് മേനോന്റെ മാഗസിന് റിലീസ് ചടങ്ങ് പൂര്ത്തിയായി അദ്ദേഹം തിരിച്ചുപോയതിന് ശേഷം ബിനീഷിനോട് എത്തിയാല് മതിയെന്ന് സംഘാടകര് പറഞ്ഞു. ഇതില് പ്രതിഷേധിച്ചാണ് ബിനീഷ് പാലക്കാട് ഗവണ്മെന്റ് മെഡിക്കല് കോളജ് ഡേ വേദിയില് കയറി സ്റ്റേജിലെ തറയില് കുത്തിയിരുന്ന് പ്രതിഷേധിച്ചത്.
മാഗസിന് റിലീസിങ്ങിന് വരാമെന്ന് എറ്റ അനില് രാധാകൃഷ്ണ മേനോന് ബിനീഷ് വേദിയില് എത്തിയാല് ഇറങ്ങി പോകുമെന്നും ഒരു മൂന്നാംകിട നടനോടൊപ്പം വേദി പങ്കിടാന് എനിക്ക് കഴിയില്ലെന്ന് അനില് രാധാകൃഷ്ണ മേനോന് പറഞ്ഞതായും ബിനീഷിനോട് സംഘാടകര് അറിയിച്ചു.
അതേസമയം ഈ സംഭവത്തെപ്പറ്റി ബിനീഷ് മനസ് തുറന്നിട്ടുണ്ട്. ഒരു മൂന്നാംകിട നടനായി എനിക്കൊപ്പം വേദിയില് സംസാരിക്കാന് പറ്റില്ലെന്ന് പറഞ്ഞത്, വല്ലാതെ വേദനയായെന്നും ഞങ്ങള് എന്നും കൂലികളായി നടന്നാമതിയെന്നാണോവെന്നും ബിനീഷ് പറഞ്ഞു. ഞാന് മേനോനല്ല. വെറും കൂലിപ്പണിക്കാരന്. എനിക്ക് ദേശീയ അവാര്ഡുമില്ല. എന്നെ ക്ഷണിച്ചത് പ്രകാരമാണ് ഞാന് വന്നത്. എന്നാല് എത്തുന്നതിന് മുമ്പേയാണ് സംവിധായകന് ഇടപെട്ട് എന്നെ ഒഴിവാക്കാന് നോക്കിയത്. അതിനാലാണ് വേദിയിലെത്തിയത്. ഞാന് തറയിലിരുന്നപ്പോള്. കസേരയിലിരിക്കാന് ചിലര് പറഞ്ഞു. എന്നാല് ഞാന് തറയാണ്. തറയിലിരിക്കാനേ അര്ഹതയുള്ളൂ എന്ന് വേദനയോടെ പറഞ്ഞു. അവസാനം എന്നെ ഇറക്കിവിടാന് പോലീസിനെ വിളിക്കുമെന്നുപോലും അവര് പറഞ്ഞു. വലിയ സങ്കടമുണ്ടെന്നും ബിനീഷ് പറഞ്ഞു.
സംഭവത്തിന്റെ വീഡിയോ സോഷ്യല്മീഡിയയില് വൈറലായിരിക്കുകയാണ്. ബിനീഷിനെ തടയാന് പ്രിന്സിപ്പല് അടക്കമുള്ളവര് ശ്രമിക്കുന്നത് ദൃശ്യങ്ങളില് കാണാം. എന്നാല് ഇവരെയെല്ലാം തട്ടിമാറ്റി ബിനീഷ് സ്റ്റേജിലേക്ക് പോകുകയായിരുന്നു.
പോലീസിനെ വിളിക്കുമെന്ന് പറഞ്ഞുവെങ്കിലും ബിനീഷ് അത് വകവച്ചില്ല. വേദിയില് നിന്ന് ഇറങ്ങാന് പലരും പറഞ്ഞുവെങ്കിലും ബിനീഷ് പ്രതിഷേധം തുടരുകയായിരുന്നു. ഈ സമയത്തെല്ലാം അനില് രാധാകൃഷ്ണന് മേനോന് പോഡിയത്തില് നില്ക്കുകയായിരുന്നു. കോളജ് യൂണിയന് ഭാരവാഹികളും അധ്യാപകരും ബിനീഷിനടുത്തെത്തി കസേരയില് ഇരിക്കാന് പറഞ്ഞുവെങ്കിലും ബിനീഷ് കൂട്ടാക്കിയില്ല.
സംഭവം വൈറലായതോടെ വിഷയം എല്ലാവരും ഏറ്റെടുത്തുകഴിഞ്ഞു. സോഷ്യല് മീഡിയയില് വലിയ പ്രതിഷേധമാണ് വരുന്നത്. സംവിധായകനെതിരെ നടപടിയെടുക്കുമെന്ന് ഫെഫ്കയും അറിയിച്ചിട്ടുണ്ട്.
https://www.facebook.com/Malayalivartha
