എല്ലാം വളരെപ്പെട്ടെന്ന്... യുവനടന് ബിനീഷ് ബാസ്റ്റിനെ സംവിധായകന് അനില് രാധാകൃഷ്ണ മേനോന് അധിക്ഷേപിച്ചതില് വ്യാപക പ്രതിഷേധം; കേരളം നവോത്ഥാനത്തിലേക്ക് പോകുമ്പോള് നടക്കുന്ന ഈ മാറ്റി നിര്ത്തല് ഒരിക്കലും അംഗീകരിക്കാന് കഴിയില്ല.
പാലക്കാട് മെഡിക്കല് കോളേജില് യുവ നടനെ ഇറക്കിവിട്ട സംഭവം ഇപ്പോള് കേരളത്തില് സജീവ ചര്ച്ചാ വിഷയമായിരിക്കുകയാണ്. അയ്യന്കാളി രൂപം നല്കിയ പ്രസ്ഥാനത്തില് നിന്നുയര്ന്ന് വന്ന പാലക്കാട് സര്ക്കാര് മെഡിക്കല് കോളേജിലാണ് ഈ സംഭവം നടന്നതെന്നോര്ക്കുമ്പോഴാണ് കേരളത്തിനതിശയം.
കോളേജ് ഡേയില് മാഗസിന് പ്രകാശനത്തിനെത്തിയത് സംവിധായകന് അനില് രാധാകൃഷ്ണമേനോനാണ്. മുഖ്യാതിഥിയായി നടന് ബിനീഷ് ബാസ്റ്റിനും. പരിപാടി തുടങ്ങുന്നതിന് മുമ്പ് ബിനീഷ് ബാസ്റ്റിനൊപ്പം വേദി പങ്കിടില്ലെന്ന് അനില് രാധാകൃഷ്ണ മേനോന് പറഞ്ഞത്. മാഗസിന് പ്രകാശനത്തിന് ശേഷം സംവിധായകന് പോയതിനു ശേഷം വേദിയിലെത്തിയാല് മതിയെന്ന് സംഘാടകര് അറിയിച്ചു.
എന്നാല് പരിപാടി നടക്കുന്നതിനിനിടെ ബാസ്റ്റിന് വേദിയിലെത്തുകയായിരുന്നു. കോളേജ് പ്രിന്സിപ്പലുള്പ്പെടെ തടയാന് ശ്രമിക്കുന്നത് ഫേസ് ബുക്കില് പ്രചരിക്കുന്ന ദൃശ്യങ്ങളിലുണ്ട്. പോലീസിനെ വിളിക്കുമെന്ന് പ്രിന്സിപ്പല് പറയുന്നുണ്ടെങ്കിലും വകവെക്കാതെ വേദിയില് കുത്തിയിരുന്നു. തുടര്ന്ന് വിദ്യാര്ത്ഥികളോട് സംസാരിച്ചു. ഈ സമയത്ത് സംവിധായകന് അനില് രാധാകൃഷ്ണ മേനോന് വേദിയിലുണ്ടായിരുന്നു. തുടര്ന്ന് വിദ്യാര്ത്ഥികളോട് ബിനീഷ് ബാസ്റ്റിന് സംസാരിച്ചു.
എന്റെ ജീവിതത്തില് എറ്റവും വിഷമിപ്പിച്ച ദിവസമാണിന്ന് . അപമാനിക്കപ്പെട്ട ദിവസമാണിന്ന്. ഞാന് മേനോനല്ല. ദേശീയ പുരസ്ക്കാരം വാങ്ങിയിട്ടില്ല. ഇങ്ങനെയൊന്നും ഒരു വ്യക്തിയോടും കാണിക്കരുത്. ഞാന് ഒരു ടൈല്സ് പണിക്കാരനാണ്. നിരവധി ചിത്രങ്ങളില് ചെറിയ വേഷങ്ങള് ചെയ്തു. അതിന് ശേഷമാണ് വിജയ് സാറിന്റെ തെരി എന്ന ചിത്രത്തില് ചെറിയ ഒരു സ്ഥാനക്കയറ്റം ലഭിക്കുന്നത്.
വിദ്യാഭ്യാസമില്ലാത്തയാളാണ് ഞാന് അതിനാല് ഒരു കാര്യം എഴുതിക്കൊണ്ടു വന്നിട്ടുണ്ട്. മതമല്ല, മതമല്ല പ്രശ്നം. എരിയുന്ന വയറിന്റെ തീയാണ് പ്രശ്നം. ഏത് മതക്കാരനല്ല പ്രശ്നം. എങ്ങനെ ജീവിക്കും എന്നതാണ് പ്രശ്നം. ഞാനും ജീവിക്കാന് വേണ്ടി നടക്കുന്നവനാണ്, ഞാനും ഒരു മനുഷ്യനാണ്. ആരോടും ഇങ്ങനെയൊന്നും ചെയ്യരുത്.'
കണ്ണു നിറഞ്ഞ് തൊണ്ടയിടറിക്കൊണ്ട് ബാസ്റ്റിന് പറഞ്ഞു. നന്ദി പറഞ്ഞ് പരിപാടി ഗംഭീരമാകട്ടെയെന്ന് ആശംസിച്ച് ബിനീഷ് വേദി വിട്ടിറങ്ങി. ഈ സംഭവത്തില് വലിയ പ്രതിഷേധമാണുണ്ടായത്. വിമര്ശനവുമായി കോണ്ഗ്രസ് എം.എല്.എ. വി.ടി ബല്റാമും രംഗത്തെത്തി.
ബല്റാമിന്റെ ഫേസ്ബുക്ക് പോസ്റ്റ് ഇങ്ങനെയാണ്
ചില നിവര്ന്നു നില്ക്കലുകളേപ്പോലെത്തന്നെ ചില അമര്ന്നിരിക്കലുകളും ചരിത്രത്തില് രേഖപ്പെടുത്തപ്പെടുക തന്നെ ചെയ്യും. പാലക്കാട് മെഡിക്കല് കോളേജ് യൂണിയന് ഉദ്ഘാടന വേദിയില് യുവനടന് ബിനീഷ് ബാസ്റ്റിന്റെ പ്രതികരണം അത്തരത്തിലൊന്നായിരിക്കും എന്നതില് സംശയമില്ല. തന്റെ സമുദായത്തില് നിന്ന് പത്ത് ബിഎക്കാരെ എങ്കിലും കാണാനാഗ്രഹിച്ച മഹാനായ അയ്യന്കാളിയുടെ പതിറ്റാണ്ടുകള്ക്കിപ്പുറമുള്ള സ്വപ്ന സാക്ഷാത്ക്കാരമാണ് വര്ഷം തോറും പട്ടികജാതി/വര്ഗ വിഭാഗങ്ങളില് നിന്ന് 70 എംബിബിഎസ് ഡോക്ടര്മാരെ സൃഷ്ടിക്കുന്ന പാലക്കാട് ഗവ.മെഡിക്കല് കോളേജ്. എന്നാല് ഇക്കഴിഞ്ഞ പതിറ്റാണ്ടുകള് കൊണ്ട് കേരളം നടന്നുതീര്ത്ത നവോത്ഥാന വഴികളൊന്നും കണ്ടിട്ടോ കേട്ടിട്ടോ പോലുമില്ലാത്ത ചില ചിതല്ജന്മങ്ങള് ഇപ്പോഴും അപരിഷ്കൃത മനസ്സുമായി ഭൂതകാലത്തിലെവിടെയോ വിറങ്ങലിച്ചു നില്ക്കുന്നുണ്ടെന്ന് ഇതുപോലുള്ള ഓരോ അനുഭവങ്ങളും ഓര്മ്മപ്പെടുത്തുന്നുണ്ട്. അത്തരക്കാരുടെ സവര്ണ്ണ ജീര്ണ്ണതകള്ക്ക് മുമ്ബില് ഓച്ഛാനിച്ചു നിന്ന കോളേജ് യൂണിയന് ഭാരവാഹികളാണ് ഏറെ നിരാശപ്പെടുത്തിയത്. ഏത് തരം വിദ്യാര്ത്ഥികളെയാണ് ഇവരൊക്കെ പ്രതിനിധീകരിക്കുന്നത്? എന്നാണ് ബല്റാം ചോദിക്കുന്നത്.
https://www.facebook.com/Malayalivartha
