തീവണ്ടികള്‍ ഇനി മുതല്‍ നിരീക്ഷണത്തില്‍; കേരളം, കര്‍ണാടകം സംസ്ഥാനങ്ങളില്‍ റെയില്‍വേ അട്ടിമറിക്ക് സാധ്യത
രാജ്യത്ത് ഓടുന്ന തീവണ്ടികള്‍ ഇനി മുതല്‍ കര്‍ശന നിരീക്ഷണത്തില്‍. ബംഗലൂരു- എറണാകുളം ഇന്റര്‍സിറ്റി അപകടത്തെ തുടര്‍ന്നാണ് റെയില്‍വേ മന്ത്രാലയത്തിന്റെ തീരുമാനം. കേരളം, കര്‍ണാടകം സംസ്ഥാനങ്ങളില്‍ റെയില്‍വേ അട്ടിമറിക്ക് സാധ്യതയുണ്ടെന്ന വിവരം ലഭിച്ചതിനെ തുടര്‍ന്നാണ് സുരക്ഷ കര്‍ശനമാക്കാന്‍ റെയില്‍വേ തീരുമാനിച്ചിരിക്കുന്നത്. ബംഗലൂരു അപകടം കേവലം അപകടം മാത്രമാണെന്ന നിലപാടില്‍ റെയില്‍വേ ഇതുവരെയും എത്തിയിട്ടില്ല.
കഴിഞ്ഞ ദിവസം കണ്ണൂരിലെ റയില്‍വേ ട്രാക്കില്‍ കരിങ്കല്ലുകള്‍ കൂട്ടിയിട്ട നിലയില്‍ കണ്ടെത്തിയിരുന്നു. കണ്ണൂര്‍ സൗത്ത് റെയില്‍വേ സ്റ്റേഷന് സമീപമാണ് പുലര്‍ച്ചെ 5.40 ന് കരിങ്കല്ലുകള്‍ കണ്ടെത്തിയത്. പാളങ്ങള്‍ ചേരുന്ന ഭാഗത്ത് കല്ലിട്ടാണ് അപകടമുണ്ടാക്കാന്‍ ശ്രമിച്ചത്. ഇത് അട്ടിമറിയാണെന്ന് സംശയിക്കുന്നു.
കണ്ണൂരില്‍ നിന്നും കോയമ്പത്തൂരിലേയ്ക്ക് പുറപ്പെട്ട തീവണ്ടി അപകടത്തില്‍ പെടേണ്ടതായിരുന്നു. എന്നാല്‍ സിഗ്നല്‍ ലഭിച്ചിട്ടും തീവണ്ടി അനങ്ങാത്തതിനെ തുടര്‍ന്ന് നടത്തിയ പരിശോധനയിലാണ് കരിങ്കല്‍ കണ്ടെത്തിയത്. ട്രാക്ക് സേഫ്റ്റി ജീവനക്കാരെത്തി കരിങ്കല്ലുകള്‍ നീക്കിയാണ് തീവണ്ടിയെ കടത്തിവിട്ടത്. തിരുവനന്തപുരം-മംഗലാപുരം മാവേലി എക്‌സ്പ്രസ് തലശ്ശേരിയില്‍ നിന്നും പുറപ്പെട്ട് കണ്ണൂര്‍ സ്റ്റേഷനില്‍ എത്തുന്നതിനു തൊട്ടു മുമ്പായിരുന്നു കരിങ്കല്ല് കണ്ടെത്തിയത്. തീവണ്ടി അട്ടിമറിക്കാനുള്ള നീക്കത്തിന്റെ ഭാഗം തന്നെയാണെന്ന് റെയില്‍വേ കണക്കുകൂട്ടുന്നു. സംഭവത്തെതുടര്‍ന്ന് ഒരു മണിക്കൂര്‍ തീവണ്ടി ഗതാഗതം തടസ്സപ്പെട്ടു.
കഴിഞ്ഞ ഏതാനും വര്‍ഷങ്ങളായി തീവണ്ടി അട്ടിമറിക്കുള്ള ശ്രമം കേരളത്തില്‍ നടക്കുകയാണ്.
മലബാര്‍ കേന്ദ്രീകരിച്ചാണ് അട്ടിമറി ശ്രമങ്ങള്‍ സജീവമാകുന്നത്. ഭാഗ്യത്തിന് അപകടങ്ങള്‍ ഉണ്ടാകാതെ രക്ഷപ്പെട്ടു. റയില്‍വേ ജീവനക്കാരുടെ തുറന്ന കണ്ണുകളാണ് അപകടത്തില്‍ നിന്നും നമ്മുടെ തീവണ്ടികളെ രക്ഷിക്കുന്നത്. എന്നാല്‍ ഇതൊന്നും ആരും കേട്ടമട്ടില്ല.
തീവണ്ടികള്‍ അപകടത്തില്‍പെടാവുന്ന സാധ്യതകള്‍ മുന്‍കൂട്ടി മനസിലാക്കുന്ന സംവിധാനങ്ങള്‍ക്ക് രൂപം കൊടുക്കാനും റെയില്‍വേ ആലോചിക്കുന്നുണ്ട്. എന്നാല്‍ വിജനമായ പ്രദേശത്താണ് പലപ്പോഴും അട്ടിമറി ശ്രമങ്ങള്‍ നടക്കുന്നത്. ഷൊര്‍ണ്ണൂരില്‍ തീവണ്ടി അപകടത്തില്‍ പെട്ടതും വിജനമായ സ്ഥലത്താണ്. അട്ടിമറി ശ്രമങ്ങള്‍ മുന്‍കൂട്ടി കാണണമെങ്കില്‍ റെയില്‍വേ ജീവനക്കാര്‍ തന്നെ വേണ്ടി വരും. ഇല്ലെങ്കില്‍ അട്ടിമറി ശ്രമം നാട്ടുകാരുടെ ശ്രദ്ധയില്‍പെടണം. തീവ്രവാദികളാണ് അട്ടിമറി ശ്രമങ്ങള്‍ക്ക് പിന്നിലെന്ന് റെയില്‍വേ സംശയിക്കുന്നു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
