എക്സൈസ് സംഘത്തെ കള്ളക്കേസില് കുടുക്കാന് നല്കിയ പരാതിയിന്മേല് നടത്തിയ അന്വേഷണത്തെ തുടര്ന്ന്, 17 വര്ഷത്തിന് മുമ്പ് തമിഴ്നാട് വനം ഉദ്യോഗസ്ഥനെ കൊലപ്പെടുത്തിയ മലയാളി അറസ്റ്റിലായി
തമിഴ്നാട് വനംഉദ്യോഗസ്ഥനെ കൊലപ്പെടുത്തിയ കേസില് പ്രതിയായ മലയാളി, പതിനേഴ് വര്ഷത്തിന് ശേഷം എക്സൈസ് ഉദ്യോഗസ്ഥരെ കള്ളക്കേസില് കുടുക്കാന് നടത്തിയ ശ്രമങ്ങളെ തുടര്ന്ന് കേരള എക്സൈസിന്റെ പിടിയിലായി. സാബു സേവ്യര് എന്ന ഇടുക്കിക്കാരനെ തമിഴ്നാട് പൊലീസെത്തി ഏറ്റുവാങ്ങി ജുഡീഷ്യല് കസ്റ്റഡിയില് റിമാന്ഡിലാക്കി.
ഇടുക്കിയിലെ അനധികൃത കഞ്ചാവ് കൃഷി ഏറെക്കുറെ നിയന്ത്രണവിധേമാക്കിയ സാബു സേവ്യര്, 2000-ന്റെ തുടക്കത്തില് കേരളത്തിന് പുറത്തേക്ക് കളംമാറ്റിചവിട്ടി.
തമിഴ്നാട് ഗൂഡല്ലൂര് വനമേഖലയായിരുന്നു പിന്നെ താവളം. അവിടെ സര്വസന്നാഹങ്ങളോടെയും വളര്ത്തിയ കഞ്ചാവ് തോട്ടത്തില് 2002 ഒക്ടോബര് മാസത്തില് തമിഴ്നാട് വനം ഉദ്യോഗസ്ഥര് വേട്ടക്കിറങ്ങി. അവര്ക്കെതിരേ സാബുവും കൂട്ടരും നടത്തിയ വെടിവയ്പില് ഉദ്യോഗസ്ഥരില് ഒരാള് കൊല്ലപ്പെട്ടു.
സാബുവിന്റെ സംഘത്തിലെ രണ്ടുപേരെ വനപാലകര് പിടികൂടിയപ്പോള് രക്ഷപെട്ട സാബു അടക്കമുള്ളവര് ആന്ധ്രയിലേക്ക് കടന്നു. ഇതോടെ നാട്ടിലെ കുടുംബത്തെ തന്നെ ഉപേക്ഷിച്ച പ്രതി ആന്ധ്രയില് മറ്റൊരു ജീവിതവും തുടങ്ങി. പിന്നീട് പലപ്പോഴായി കേരളത്തിലും ആന്ധ്രയിലുമെല്ലാം കേസുകള് ഉണ്ടായെങ്കിലും പിടികൊടുക്കാതെ രക്ഷപെട്ടു, പിടിയില് പെട്ടപ്പോഴാകട്ടെ ജാമ്യത്തിലിറങ്ങി മുങ്ങി.
ഇങ്ങനെ തുടരവെ ഇക്കഴിഞ്ഞ ജനുവരിയില് മാലിദ്വീപിലേക്ക് കടത്താനായി എത്തിച്ച 12 കിലോ ഹാഷിഷ് ഓയില് തിരുവനന്തപുരത്ത് എക്സൈസ് കമ്മിഷണറുടെ സ്ക്വാഡ് പിടികൂടി. ഇതോടെ റിമാന്ഡിലായ പ്രതി തന്നെ കുടുക്കിയ എക്സൈസ് സംഘത്തെ കുടുക്കാനായി പിന്നെ ശ്രമം. ഇതിനായി ഒട്ടേറെ ലഹരിക്കടത്തില് പ്രതിയായി മുങ്ങിനടക്കുന്ന അടിമാലിക്കാരന് മൂര്ഖന് ഷാജിയുമായി ചേര്ന്ന് തമിഴ്നാട് പൊലീസിന് പരാതി അയച്ചതാണ് തലവര മാറ്റിയത്.
എക്സൈസ് കമ്മിഷണറുടെ സ്ക്വാഡിലെ ഇന്സ്പെക്ടര് അടക്കമുള്ളവര്ക്കെതിരെ ആയിരുന്നു നീക്കം. എന്നാല് പരാതി സൂക്ഷ്മമായി പരിശോധിച്ച തമിഴ്നാട് ഉദ്യോഗസ്ഥരുടെ അന്വേഷണം പരാതിക്കാരനെക്കുറിച്ചായി. ഇതിനായി തമിഴ്നാട് ക്യൂബ്രാഞ്ച് സംഘം പലവട്ടം കേരളത്തിലെത്തി.
ഇടുക്കിയിലെ മുന് ഭാര്യ അടക്കമുള്ളവരുടെ മൊഴികള് ശേഖരിച്ചു. ജോസ് എന്നു വിളിപ്പേരും ഉണ്ടായിരുന്ന പ്രതി സാബു സേവ്യര് തന്നെയെന്ന് ഇടുക്കിയിലെ ഇടവകപ്പള്ളിയില് വരെ പരിശോധിച്ച് ഉറപ്പാക്കിയാണ് കഴിഞ്ഞ ദിവസം അറസ്റ്റ് രേഖപ്പെടുത്തിയത്. ഗൂഡല്ലൂരില് എത്തിച്ച് കോടതിയില് ഹാജരാക്കിയ പ്രതിയെ ജുഡീഷ്യല് കസ്റ്റഡിയില് റിമാന്ഡ് ചെയ്തിരിക്കുകയാണ്.
https://www.facebook.com/Malayalivartha
