ശക്തമായ മഴയെത്തുടര്‍ന്ന് ഡല്‍ഹിയില്‍ നിര്‍മ്മാണത്തില്‍ ഇരുന്ന കെട്ടിടം തകര്‍ന്നുവീണ് ഒരു മരണം. രോഹിണി സെക്ടര്‍ 16ലെ കെട്ടിടമാണ് തകര്‍ന്നു വീണത്. അഞ്ച് പേര്‍ കുടുങ്ങിക്കിടക്കുന്നതായി സംശയം. അവശിഷ്ടങ്ങള്‍ക്കിടയില്‍ തിരച്ചില്‍ പുരോഗമിക്കുന്നു. ഇന്ന് വൈകുന്നേരമാണ് അപകടം സംഭവിച്ചത്. ഫയര്‍ഫോഴ്‌സിന് പുറമേ പൊലീസും എന്‍ഡിആര്‍എഫും മറ്റ് അടിയന്തര സേനാ വിഭാഗങ്ങളും രക്ഷാപ്രവര്‍ത്തനം നടത്തുന്നുണ്ട്. നാട്ടുകാരായിരുന്നു ആദ്യം രക്ഷാ പ്രവര്‍ത്തനം നടത്തിയത്.

'2016ല്‍ ഈ പ്രദേശം ഡീനോട്ടിഫൈ ചെയ്യുകയും തദ്ദേശ സ്ഥാപനത്തിന് കൈമാറുകയും ചെയ്തിരുന്നു. ഈ പ്രദേശത്തെ കെട്ടിട നിര്‍മ്മാണ പ്രവര്‍ത്തനങ്ങള്‍ കൈകാര്യം ചെയ്യുന്നത് അവരാണ്,' എന്ന് ഡല്‍ഹി ഡെവലപ്‌മെന്റ് അതോറിറ്റി വ്യക്തമാക്കി. ഡല്‍ഹിയില്‍ ശക്തമായ മഴയാണ് അനുഭവപ്പെടുന്നത്. പലയിടത്തും വെള്ളക്കെട്ടുണ്ടായി. ബുധനാഴ്ച തലസ്ഥാന നഗരിയില്‍ ശക്തമായ മഴ പെയ്തതിനെത്തുടര്‍ന്ന് നഗരത്തിന്റെ പല ഭാഗങ്ങളിലും വെള്ളക്കെട്ടുണ്ടായി. വരും മണിക്കൂറുകളില്‍ ഇടിമിന്നലോടുകൂടിയ മഴയ്ക്ക് സാധ്യതയുണ്ടെന്ന് മുന്നറിയിപ്പ് നല്‍കിക്കൊണ്ട് കാലാവസ്ഥാ വകുപ്പ് റെഡ്, ഓറഞ്ച് അലേര്‍ട്ടുകള്‍ പ്രഖ്യാപിച്ചു.