വിദ്യാര്ത്ഥികള്ക്ക് സൗജന്യ കൈത്തറി സ്കൂള് യൂണിഫോം നല്കുന്ന 130 കോടിയുടെ പദ്ധതി ഉദ്യോഗസ്ഥര് തന്ത്രപരമായി അട്ടിമറിച്ചതായി കൈത്തറി ആന്ഡ് ടെക്സ്റ്റയില്സ് ഡയറക്ടര്
2019-20 അദ്ധ്യയന വര്ഷം 8.5 ലക്ഷം വിദ്യാര്ത്ഥികള്ക്ക് സൗജന്യ കൈത്തറി സ്കൂള് യൂണിഫോം നല്കുന്ന 130 കോടിയുടെ പദ്ധതി ഉദ്യോഗസ്ഥര് തന്ത്രപരമായി അട്ടിമറിച്ചതായി കൈത്തറി ആന്ഡ് ടെക്സ്റ്റയില്സ് ഡയറക്ടര്. വീഴ്ചവരുത്തിയ ഉദ്യോഗസ്ഥര്ക്കെതിരെ നടപടിയെടുക്കണമെന്നും ആവശ്യപ്പെട്ട് ജില്ലാ വ്യവസായ കേന്ദ്രം മാനേജര്മാര്ക്കും ഹാന്റക്സ് മാനേജിംഗ് ഡയറക്ടര്ക്കും (തിരുവനന്തപുരം) ഹാന്വീവ് മാനേജിംഗ് ഡയറക്ടര്ക്കും (കണ്ണൂര്) കൈത്തറി ആന്ഡ് ടെക്സ്റ്റയില്സ് ഡയറക്ടര് നിര്ദ്ദേശം നല്കി. കൈത്തറി ആന്ഡ് ടെക്സ്റ്റയില്സ് ഡയറക്ടറേറ്റ് നെയ്തെടുത്ത തുണിയുടെ ഗുണമേന്മയില് വീഴ്ച സംഭവിച്ചെന്ന് കണ്ടെത്തിയിട്ടുണ്ട്. കണ്ണൂരിലെ ടെക്സ്റ്റയില് കമ്മിറ്റി റീജണല് ലാബില് നടത്തിയ പരിശോധനയിലാണ് വീഴ്ച കണ്ടെത്തിയത്.
ലാബിലെ റിപ്പോര്ട്ട് പ്രകാരം ഡാര്ക്ക് നേവി ബ്ലൂ ഷര്ട്ടിന്റെ തുണി കളര് ചെയ്ത ശേഷം ഗുണമേന്മ പരിശോധിച്ചപ്പോള് തുണിയില് ഉപയോഗിച്ചിരിക്കുന്ന നൂല് സര്ക്കാര് നല്കിയ കൈത്തറി സ്കൂള് യൂണിഫോണിന്റെയല്ല എന്ന് കണ്ടെത്തി. അതിനാല് തുണി ഉത്പാദിപ്പിച്ചത് ഏത് ജില്ലയിലാണെന്നും ഏത് ക്വാളിറ്റി കണ്ട്രോള് ഇന്സ്പെക്ടറുടെ ഭാഗത്ത് നിന്നാണ് വീഴ്ച സംഭവിച്ചതെന്നും അന്വേഷിച്ച് റിപ്പോര്ട്ട് നല്കണമെന്നും കൈത്തറി ആന്ഡ് ടെക്സ്റ്റയില്സ് ഡയറക്ടര് ആവശ്യപ്പെട്ടു. വീഴ്ച വരുത്തിയവര്ക്കെതിരെ നടപടി ശുപാര്ശചെയ്യുമെന്നും മുന്നറിയിപ്പ് നല്കുന്നു. സര്ക്കാര് നല്കിയ ഗുണമേന്മയുള്ള നൂല് മറിച്ച് വിറ്റ ശേഷം ആന്ധ്രയില് നിന്നോ, തമിഴ്നാട്ടില് നിന്നോ ഗുണനിലവാരമില്ലാത്ത നൂല് കുറഞ്ഞ വിലയ്ക്ക് വാങ്ങിയെന്ന് വ്യക്തമാണ്. ചില ഉദ്യോഗസ്ഥര്ക്കും ഏജന്സികള്ക്കും ഇതില് പങ്കുണ്ടെന്നാണ് അറിയുന്നത്.
8.5 ലക്ഷം വിദ്യാര്ത്ഥികള്ക്ക് 42 ലക്ഷം മീറ്റര് യൂണിഫോം തുണിയാണ് നല്കിയത്. കേരളത്തിലെ മുഴുവന് കൈത്തറി സഹകരണ സംഘങ്ങളില് നിന്നുമാണ് ആവശ്യമായ തുണി ശേഖരിച്ചത്. സര്ക്കാര് നേരിട്ട് നൂലും കൂലിയും നല്കി. ഈ പദ്ധതിയിലൂടെ 5200 ഓളം ആളുകള്ക്ക് നേരിട്ടും അതിലധികം ആളുകള്ക്ക് അനുബന്ധ മേഖലകളിലും ജോലി ലഭിച്ചു. കൈത്തറിമേഖലയിലും സ്കൂള് യൂണിഫോം രംഗത്തും വലിയ മാറ്റങ്ങളുണ്ടാക്കാന് ഈ സംരംഭത്തിനു സാധിച്ചു. ആയിരക്കണക്കിനു നെയ്ത്തുക്കാര്ക്ക് മെച്ചപ്പെട്ട ജീവിതമാര്ഗം കണ്ടെത്താനായി. കൈത്തറി മേഖലയിലെ തൊഴിലാളികള്ക്ക് പുത്തന് ഉണര്വ് നല്കാനും സാധിച്ചു. നമ്മുടെ കാലാവസ്ഥയ്ക്ക് യോജിച്ച യൂണിഫോം ധരിക്കാന് കുട്ടികള്ക്ക് അവസരം ഒരുക്കുകയായിരുന്നു ലക്ഷ്യം. യൂണിഫോം പദ്ധതി പ്രകാരം തൊഴിലാളികള്ക്ക് കൂലി നല്കാന് ഇതുവരെ ആകെ 103 കോടി രൂപ അനുവദിച്ചു. കൈത്തറി നെയ്ത്തു മേഖലയെ സംരക്ഷിക്കാന് നിരവധി പദ്ധതികളാണ് വ്യവസായ വകുപ്പ് നടപ്പാക്കിയത്.
തങ്ങള് നെയ്തതാണെന്ന വ്യാജേന സര്ക്കാര്, ചൈനയില് നിന്ന് കൈത്തറി ഇറക്കുമതി ചെയ്യുന്നെന്ന് കൈത്തറി തൊഴിലാളികള് ആരോപിച്ചിരുന്നു. തുണികളില് കളര് നല്കുന്ന ഡൈഹൗസുകള് സര്ക്കാരിന് കീഴില് പലയിടങ്ങളിലും ഉണ്ടെങ്കിലും യൂണിഫോം തുണിയില് കളര് നല്കാന് തമിഴ് നാട്ടില് കൊടുക്കുകയാണെന്നും തൊഴിലാളികള് ആരോപിക്കുന്നുണ്ട്. കടുത്ത പ്രതിസന്ധിയിലായ കൈത്തറി മേഖലയെ സംരക്ഷിക്കാനാണ് കഴിഞ്ഞ ബജറ്റില് സര്ക്കാര് വമ്പന് പ്രഖ്യാപനം നടത്തിത്. ഒന്നുമതല് എട്ടാംക്ലാസ് വരെയുള്ള കുട്ടികള്ക്ക് സൗജന്യമായി രണ്ട് ജോടി യൂണിഫോം നല്കും എന്നതായിരിന്നു പ്രഖ്യാപനം. എട്ടാം ക്ലാസ് വരെയുള്ളവര്ക്ക് യൂണിഫോം നല്കാന് 1.30 കോടി മീറ്റര് കൈത്തറി വേണം. ഇതിനാവശ്യമായ തുണിയുടെ പകുതി പോലും കഴിഞ്ഞ ജൂണിന് മുമ്പ് ഉത്പാദിപ്പിപ്പിച്ചിട്ടില്ലായിരുന്നു.
https://www.facebook.com/Malayalivartha