കുട്ടികള്‍ക്ക് മാത്രമല്ല, ഇനി ആനകള്‍ക്കുമുണ്ട് റിയാലിറ്റി ഷോ. ഗജരാജനെ തിരഞ്ഞെടുക്കാനുള്ള റിയാലിറ്റി ഷോയാണിത്. ടിവിയില്‍ കാണും പോലെ ഈ റിയാലിറ്റി ഷോയില്‍ ആനകള്‍ ആടിപാടുകയോ കഷ്ടപ്പെട്ട് നൃത്തം ചെയ്യുകയോ വേണ്ട. മറിച്ച് ജൂറി എത്തുമ്പോള്‍ നന്നായി പെരുമാറുകയും ആരോഗ്യത്തോടെയിരുന്നാലും മതിയാകും.കുട്ടന്‍കുളന്‍ങ്ങര ദേവസ്വത്തിന്റെ ആനയായിരുന്ന രാമദാസിന്റെ സ്മരണയ്ക്കായി നടക്കുന്ന ഷോയുടെ വിജയിയെ കണ്ടെത്തുന്നതിന്റെ ഭാഗമായാണ് ഈ റിയാലിറ്റി ഷോ. മാര്‍ച്ച് ഒന്നിനാണ് വിജയിയെ പ്രഖ്യാപിക്കുക.
സമ്മാനദാനം മാര്‍ച്ച് 14ന് പൂങ്കുന്നം ക്ഷേത്ര മൈതാനിയില്‍ നടക്കും. ഇതിനായി പ്രത്യേക വെബ് സൈറ്റും തയ്യാറാക്കിയിട്ടുണ്ട്. ആദ്യ റൗണ്ടില്‍ തിരഞ്ഞെടുക്കപ്പെട്ട 50 ആനകളുടെ വിവരം WWW.gajarajan.in എന്ന വെബ്‌സൈറ്റിലുണ്ട്. നിങ്ങള്‍ക്ക് ഇഷ്ടമുള്ള ആനകള്‍ക്ക് വോട്ട് ചെയ്യാനുള്ള മാര്‍ഗവും ക്രമീകരിച്ചിട്ടുണ്ട്. ചെറുപ്പളശ്ശേരി രാജശേഖരന്‍, പുതുപ്പള്ളി കേശവന്‍, തിരുവമ്പാടി ശിവസുന്ദര്‍,മംഗലംകുന്ന് അയ്യപ്പന്‍, ഗുരുവായ്യൂര്‍ വലിയ കേശവന്‍, തിരുവമ്പാടി ചന്ദ്രശേഖരന്‍ ഇങ്ങനെ നിരവധി ആനകളാണ് നിങ്ങളുടെ വോട്ടിനായി കാത്തിരിക്കുന്നത്. പത്ത്് ആനകളുടെ വീഡിയോ പൊതുവേദിയില്‍ പ്രദര്‍ശിപ്പിച്ച ശേഷമായിരിക്കും പ്രത്യേക ജൂറി വിജയികളെ പ്രഖ്യാപിക്കുക. ആനകളുടെ ചില പ്രധാന ഘടകങ്ങളും ഈ റിയാലിറ്റി ഷോയില്‍ നോക്കുന്നുണ്ട്.
സ്വഭാവം, ഗജലക്ഷണം, ആരോഗ്യം, പരിപാലനം, എന്നിവയ്ക്കു 20% വീതം മാര്‍ക്ക് നല്‍കും അതൊടൊപ്പം വോട്ടിന് 20 ശതമാനവും. ആന വിദഗ്ദ്ധര്‍ അടങ്ങിയ പാനലാണ് പത്ത് ആനകളെയും നേരില്‍ കണ്ട് പരിശോധിച്ച് തിരഞ്ഞെടുപ്പ് നടത്തുക. ആനകള്‍ക്ക് മികച്ച പരിപാലനവും സംരക്ഷണവും പ്രോത്സാഹിപ്പിക്കുന്നതിന്റെ ഭാഗമായിട്ടാണ് ഈ റിയാലിറ്റി ഷോ എന്നാണ് സംഘാടകര്‍ അഭിപ്രായപ്പെടുന്നത്. നിങ്ങളുടെ വിലപ്പിടിപ്പുളള വോട്ടിന് വേണ്ടി നിരവധി ആനകളാണ് കാത്തിരിക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha