തൃശൂര്‍ മുന്‍ സിറ്റി പോലീസ് കമ്മീഷണര്‍ ജേക്കബ് ജോബിന് സസ്‌പെന്‍ഷന്‍. എഡിജിപിയുടെ റിപ്പോര്‍ട്ടിന്റെ അടിസ്ഥാനത്തിലാണ് ആഭ്യന്തരവകുപ്പ് നടപടിയെടുത്തത്. സെക്യൂരിറ്റി ജീവനക്കാരന്‍ ചന്ദ്രബോസിനെ കാറിടിപ്പിച്ച് കൊലപ്പെടുത്തിയ കേസില്‍ വ്യവസായി മുഹമ്മദ് നിസാമിനെ ഒറ്റയ്ക്ക് ചോദ്യം ചെയ്തതില്‍ ചട്ടലംഘനം നടത്തിയെന്ന റിപ്പോര്‍ട്ടിന്റെ അടിസ്ഥാനത്തിലാണ് നടപടി.
അന്വേഷണ ഉദ്യോഗസ്ഥന്‍ അല്ലാതിരുന്നിട്ടും ജേക്കബ് ജോബ് മറ്റ് ഉദ്യോഗസ്ഥരെ മാറ്റിനിര്‍ത്തി പ്രതിയുമായി ഒരു മണിക്കൂറിലേറെ സംസാരിച്ചിരുന്നു. ഇത് ശരിയായ നടപടിയല്ലെന്ന് ഐജി ടി.ജെ ജോസ് എഡിജിപി ശങ്കര്‍റെഡ്ഡിക്ക് റിപ്പോര്‍ട്ട് നല്‍കിയിരുന്നു. നിഷാമുമായി ഒത്തുതീര്‍പ്പ് ഉണ്ടാക്കന്‍ ജേക്കബ് ജോബ് ശ്രമിച്ചുവെന്ന പരാതിയെ തുടര്‍ന്നാണ് എഡിജിപി നേരത്തേ അന്വേഷണത്തിന് ഉത്തരവിട്ടിരുന്നത്. എന്നാല്‍ ഒത്തുതീര്‍പ്പ് ആരോപണം ശരിയല്ലെന്നും റിപ്പോര്‍ട്ടില്‍ വ്യക്തമാക്കുന്നുണ്ട്.
അറസ്റ്റിലായ വേളയില്‍ അന്വേഷണ സംഘത്തെ അറിയിക്കാതെ നിസാമുമായി രഹസ്യ കൂടിക്കാഴ്ച്ച നടത്തിയത് ദുരുദ്ദേശത്തോടെയാണെന്ന അന്വേഷണ റിപ്പോര്‍ട്ടിന്റെ അടിസ്ഥാനത്തിലാണ് നടപടി. നേരത്തെ അന്വേഷണത്തിന് ഇടെയാണ് തൃശൂര്‍ കമ്മീഷണറായിരുന്ന ജേക്കബ് ജോബ് പത്തനംതിട്ടയിലേക്ക് മാറ്റിയത്.
മറ്റൊരു കേസില്‍ നിഷാമിനെ കോടതിയില്‍ ഹാജരാക്കിയത് അതീവ രഹസ്യമായി. കോടതി നടപടി ആരംഭിക്കുന്നതിനു മുമ്പ് രഹസ്യമായി ഓഫീസ് മുറിയിലെത്തിക്കുകയായിരുന്നു. ഇവിടെ വച്ച് വേണ്ടപ്പെട്ടവരുമായി സംസാരിക്കാനും നിസാമിനു പൊലീസ് സൗകര്യമൊരുക്കിയെന്ന വാര്‍ത്തകള്‍ നേരത്തെ പുറത്തുവന്നിരുന്നു. നിസാമിനെ ചന്ദ്രബോസ് വധക്കേസില്‍നിന്നും രക്ഷിക്കാന്‍ ജേക്കബ് ജോബ് ശ്രമിക്കുന്നുവെന്ന് ആരോപണം ശക്തമായ സാഹചര്യത്തിലാണ് ജേക്കബ് ജോബിന് സസ്‌പെന്‍ഷന്‍ നല്‍കിയിരിക്കുന്നത്.
എന്നാല്‍ നിസാമിനെ അന്വേഷണസംഘം സുഖവാസത്തിനെന്ന പോലെയാണു ബെംഗളൂരുവില്‍ തെളിവെടുപ്പിനു കൊണ്ടുപോയതെന്ന വാര്‍ത്തയുടെ നിജസ്ഥിതി മനസിലാക്കാനും പൊലീസുകാര്‍ നിസാമിനോട് പണം ചോദിച്ചു എന്ന വിവരം അറിഞ്ഞതിനെതുടര്‍ന്നുമാണ് താന്‍ തനിച്ചു നിസാമിനെ ചോദ്യം ചെയ്തതെന്നാണ് ജേക്കബ് ജോബ് മൊഴി നല്‍കുകയുണ്ടായി.
സ്‌റ്റേഷനില്‍ റൈറ്റര്‍ പണം ചോദിച്ചുവെന്ന് നിസാം സമ്മതിച്ചെന്നും എന്നാല്‍ മൊഴി നല്‍കാന്‍ തയ്യാറായില്ലെന്നും ജേക്കബ് പറഞ്ഞു. നിന്റെ രക്ഷ ഞാന്‍ എഴുതുന്നത് അനുസരിച്ചാകുമെന്ന് ഈ പൊലീസുകാരന്‍ പറഞ്ഞതായി നിസാം വെളിപ്പെടുത്തിയിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha