കഴിഞ്ഞ ദിവസം രാത്രി സംസ്ഥാനത്തെ വിവിധ ഭാഗങ്ങളില്‍ ആശങ്കയുണര്‍ത്തി ആകാശത്തു നിന്നും തീഗോളം ഭൂമിയിലേക്ക് വീണുവെന്ന് നാട്ടുകാര്‍. ഇന്നലെ രാത്രി പത്തോടെയാണു കേരളത്തിലെ വിവിധ ജില്ലകളില്‍ തീഗോളം കണ്ടത്. എറണാകുളം ജില്ലയിലും പരിസര പ്രദേശങ്ങളിലുമാണ് ഇക്കാര്യം ആദ്യം ശ്രദ്ധയില്‍പ്പെട്ടതെങ്കിലും സംസ്ഥാനത്തെ മറ്റു ഭാഗങ്ങളിലും ഇതേ പ്രതിഭാസം തൊട്ടുപിന്നാലെ റിപ്പോര്‍ട്ട് ചെയ്യുകയായിരുന്നു. ആകാശത്തുനിന്ന് ഭൂമിയിലേക്കു തീഗോളം പതിക്കുന്ന കാഴ്ചയാണ് ദൃശ്യമായതെന്ന് ദൃക്‌സാക്ഷികള്‍ പറഞ്ഞു. പലയിടത്തും ചെറിയ ഇടിമുഴക്കവും ഉണ്ടായിരുന്നു. നേരിയ ഭൂമികുലുക്കം ഉണ്ടായെന്നും നാട്ടുകാര്‍ പറയുന്നു.
എന്നാല്‍ സംഭവത്തില്‍ ആശങ്കപ്പെടാന്‍ ഒന്നുമില്ലെന്നു മന്ത്രി അടുര്‍ പ്രകാശ് പറഞ്ഞു. സംഭവത്തെക്കുറിച്ച് അന്വേഷണം നടക്കുകയാണ്. ആറു ജില്ലകളിലെ ഭൂകമ്പമാപിനികളില്‍ ഭൂചലന സൂചനകള്‍ ലഭിച്ചിട്ടില്ലെന്ന് എറണാകുളം ജില്ലാ കലക്ടര്‍ എം.ജി. രാജമാണിക്യവും പറഞ്ഞു. ഐഎസ്ആര്‍ഒ, തിരുവനന്തപുരം കാലാവസ്ഥാ നിരീക്ഷണ കേന്ദ്രം, ദക്ഷിണ നാവികസേനാ ആസ്ഥാനത്തെ നിരീക്ഷണ സംവിധാനങ്ങള്‍ എന്നിവയിലൊന്നും ഒരു സൂചനയും ലഭിച്ചിട്ടില്ല.
ഇത്തരം പ്രതിഭാസം കാണുകയാണെങ്കില്‍ പൊലീസിനെ അറിയിക്കണമെന്നും നിര്‍ദ്ദേശമുണ്ട്. എന്നാല്‍,? ഭീതി വേണ്ടെന്നും പൊലീസ് അറിയിച്ചു.
കോഴിക്കോട്, പാലക്കാട്, തൃശൂര്‍,കൊല്ലം ജില്ലകളിലെ വിവിധ പ്രദേശങ്ങളില്‍ നിന്നാണ് ഫോണ്‍ കോളുകള്‍ എത്തിയത്. തീഗോളം പോലുള്ള പ്രതിഭാസം കഴിഞ്ഞ ദിവസം അമേരിക്കയില്‍ പല ഭാഗങ്ങളിലും ദൃശ്യമായിരുന്നു. ചൈനീസ് റോക്കറ്റിന്റെ ഭാഗങ്ങളാണ് അതെന്നായിരുന്നു നിഗമനം.
തീഗോളത്തിന്റേതായി പ്രചരിക്കുന്ന ചിത്രങ്ങളധികവും വെബ്‌സൈറ്റുകളില്‍നിന്നുള്ള പഴയ ചിത്രങ്ങളാണ്. എറണാകുളം ജില്ലയിലെ കോലഞ്ചേരി വലമ്പൂരിലും പറവൂര്‍ പട്ടണത്തും വലിയ കല്ലു പോലെ എന്തോ ഒരു വസ്തു വീണതായാണ് നാട്ടുകാര്‍ പറയുന്നത്. പത്തനംതിട്ട, കോട്ടയം, ആലപ്പുഴ, കോഴിക്കോട്, കണ്ണൂര്‍ തുടങ്ങിയ ജില്ലകളിലെ വിവിധ ഭാഗങ്ങളിലും തീഗോളം ദൃശ്യമായി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha