സിപിഎം സമ്മേളനത്തില്‍ തിരഞ്ഞെടുക്കപ്പെട്ട പുതിയ സംസ്ഥാന കമ്മിറ്റിയുടെ യോഗം എകെജി സെന്ററില്‍ ആരംഭിച്ചു. വിഎസ് എത്താതെ ചേരുന്ന യോഗത്തില്‍ വിഎസിനെ വിമര്‍ശിക്കരുതെന്ന് കേന്ദ്ര നേതാക്കളുടെ കര്‍ശന നിര്‍ദ്ദേശമുണ്ട്. വിഎസ് എത്തിയില്ലെങ്കില്‍ മുതിര്‍ന്ന നേതാക്കള്‍ വിഎസുമായി ചര്‍ച്ച നടത്തണമെന്നാണ് സംസ്ഥാന സമിതിയ്ക്ക് കേന്ദ്ര നേതൃത്വം നല്‍കിയ നിര്‍ദ്ദേശം. വരുന്ന നിയമസഭാ സമ്മേളനത്തില്‍ വിഎസിനെ കൂടെ നിര്‍ത്തിയില്ലെങ്കില്‍ പാര്‍ട്ടിയ്ക്ക് വലിയ നാണക്കേട് ഉണ്ടാവുമെന്നും സംസ്ഥാന സമിതിയില്‍ ചര്‍ച്ച നടന്നതായാണ് സൂചന.
എന്നാല്‍ സി.പി.എം സംസ്ഥാന സമ്മേളനത്തില്‍ നിന്ന് ഇറങ്ങിപ്പോന്ന പ്രതിപക്ഷ നേതാവ് വി.എസ്. അച്യുതാനന്ദന്‍ സംസ്ഥാന സെക്രട്ടറിയേറ്റിന്റെ പ്രമേയം മരവിപ്പിച്ചാലേ ഇനി ഒരു നിലപാടെടുക്കൂ എന്ന വാശിയിലാണ്. വിഎസ് ഇല്ലെങ്കില്‍ നിയമസഭയില്‍ ആരെ മുന്നിട്ടിറക്കി ഭരണപക്ഷത്തിനെതിരെ സമരം നടത്തുമെന്ന ചര്‍ച്ചയും നടക്കുന്നുണ്ട്. മാണിക്കെതിരെ നടത്തുന്ന സമരവും വിഎസ് ഇല്ലെങ്കില്‍ പരാജയപ്പെടാനുള്ള സാധ്യതയും സിപിഎം നേതൃത്വം ഭയക്കുന്നുണ്ട്.
ഇന്നുംനാളെയുമാണ് പുതിയ സംസ്ഥാന കമ്മിറ്റിയുടെ ആദ്യയോഗം. സംസ്ഥാന സമ്മേളനത്തില്‍ സംസ്ഥാന കമ്മിറ്റിയില്‍ നിന്ന് വി.എസിനെ ഒഴിവാക്കിയിരുന്നു. എന്നാല്‍, കേന്ദ്ര കമ്മിറ്റിയംഗമെന്ന നിലയില്‍ അദ്ദേഹത്തിന് പങ്കെടുക്കാം. അത്തരത്തില്‍ വി.എസിനെ യോഗത്തിലേക്ക് ക്ഷണിക്കുകയും ചെയ്തിരുന്നു.
തന്റെ പരാതിയില്‍ കേന്ദ്ര നേതൃത്വം തീരുമാനമെടുത്തശേഷം ഇനിഎന്തുവേണമെന്ന് തീരുമാനിക്കാമെന്നാണത്രേ വി.എസിന്റെ നിലപാട്. ഈ മാസം 20,21 തീയതികളില്‍ പി.ബി യോഗം ചേരുന്നുണ്ട്. വി.എസിന്റെ പരാതി അതില്‍ ചര്‍ച്ച ചെയ്‌തേക്കും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha