മണ്ണന്തല ഹാഷിഷ് ഓയിൽ കള്ളക്കടത്ത് കേസിൽ പ്രതികളെ ഹാജരാക്കാൻ തിരുവനന്തപുരം രണ്ടാം അഡീഷണൽ ജില്ലാ സെഷൻസ് കോടതിയുടെ ഉത്തരവ്. അന്തർ സംസ്ഥാന ലഹരി മാഫിയ തലവൻ മൂർഖൻ ഷാജി , രാജാക്കാട് പോലീസുകാരൻ , കവടിയാർ സ്റ്റാർ ഹോട്ടൽ ഉടമ എന്നിവരടക്കം ആറു പ്രതികളെ ഹാജരാക്കാനാണ് ഉത്തരവ്. മാർച്ച് രണ്ടിന് ആറു പ്രതികളെയും ഹാജരാക്കാൻ തിരുവനന്തപുരം അസി: എക്സൈസൈസ് കമ്മീഷണർക്കാണ് കോടതി ഉത്തരവ് നൽകിയത്.

2018 മെയ് മാസത്തിലാണ് കേസിനാസ്പദമായ സംഭവം നടന്നത്. തലസ്ഥാന നഗരമദ്ധ്യത്തിലെ മണ്ണന്തല ഹോട്ടൽ അക്വാറോക്കിലെ പാർക്കിംഗ് ഏരിയയിൽ വച്ച് അന്താരാഷ്ട്ര വിപണിയിൽ ഒരു കോടി രൂപ വിലവരുന്ന 10.2 കിലോഗ്രാം ഹാഷിഷ് ഓയിലും വിലയർത്ഥത്തിലെ അഡ്വാൻസ് തുകയായ 13.5 ലക്ഷം രൂപയും കൈമാറുന്നതിനിടയിൽ എക്സൈസ് സംഘം പ്രതികളെ പിടികൂടുകയായിരുന്നു.

ഹാഷിഷ് വാങ്ങാനെത്തിയ കവടിയാർ സ്റ്റാർ ഹോട്ടലുടമ വഞ്ചിയൂർ തമ്പുരാൻമുക്ക് ഹീര അർക്കേഡിൽ ഖാലിദ് മകൻ റെനീസ് (39) , ഇടുക്കിയിൽ നിന്ന് ഹാഷിഷ് ഓയിൽ തലസ്ഥാനത്തെത്തിച്ച തൃശൂർ പീച്ചി സ്വദേശി വിനീഷ് കുമാർ (39) , കാട്ടാക്കട വീരണകാവ് എസ്.എൻ. നഗർ അനൂപ് ഭവനിൽ അനൂപ് (35) , ലഹരി മാഫിയ ബന്ധത്തിന്റെ പേരിൽ സേനയിൽ നിന്നും പിരിച്ചു വിട്ട പോലീസ്കാരനും മണ്ണന്തല ലഹരിക്കടത്തിന് വ്യാജരേഖകൾ തയ്യാറാക്കി നൽകിയയാളുമായ രാജാക്കാട് കല്ലോലിക്കൽ വീട്ടിൽ വിൻസെന്റ് (57) , മൊത്ത വിതരണക്കാരനായ അന്തർ സംസ്ഥാന ലഹരി മാഫിയ തലവൻ അടിമാലി ചാറ്റുപാറ സ്വദേശി മൂർഖൻ ഷാജി എന്ന ഷാജിമോൻ (49) , സഹായി സനീഷ് (39) എന്നിവരാണ് മണ്ണന്തല ഹാഷിഷ് കടത്തു കേസിലെ ഒന്നുമുതൽ ആറുവരെയുള്ള പ്രതികൾ.

ഹാഷിഷ്കടത്തിലൂടെ സമ്പാദിച്ച മൂർഖൻ ഷാജിയുടെ നാലു കോടി രൂപ വിലയുള്ള അടിമാലിയിലുള്ള ആഡംബര വീടും വാണിജ്യ സമുച്ചയവും കണ്ടു കെട്ടിയിട്ടുണ്ട്. ചെന്നൈയിലെ എൻ.ഡി.പി.എസ് പ്രത്യേക അധികാര സമിതിയുടെ അനുമതിയോടെയാണ് എക്സൈസ് റവന്യൂ റിക്കവറിയിലൂടെ കണ്ടു കെട്ടിയത്. എൻ ഡി പിഎസ് നിയമപ്രകാരം കുറ്റകൃത്യത്തിലൂടെ നാലു വർഷത്തിനിടെ സമ്പാദിച്ച വസ്തുവകകൾ കണ്ടു കൊട്ടാൻ വ്യവസ്ഥയുണ്ട്.