ഷോർട്ട് സർക്യൂട്ട് വില്ലനാകുമ്പോൾ ;തിരുവനന്തപുരത്ത് സംഭവിച്ചതെന്ത്; ഒഴിവായത് വൻ ദുരന്തം; എടുക്കാം മുൻകരുതലുകൾ
ഷോർട്ട് സർക്യൂട്ട് വില്ലനാകുന്ന വാർത്തകൾ ഇപ്പോൾ മാധ്യമങ്ങളിൽ പതിവാണ്. പലപ്പോഴും വലിയ അപകടങ്ങളിലാണ് ഇത്തരം സംഭവങ്ങൾ കലാശിക്കുന്നത്. നിരവധി പേരുടെ ജീവഹാനിക്ക് പോലും വഴിവെക്കുന്ന ഇത്തരം സംഭവങ്ങൾ വേണ്ടവിധം കൈകാര്യം ചെയ്തില്ലെങ്കിൽ നേരിടേണ്ടി വരുന്നത് വലിയ അത്യാപത്തായിരിക്കും. തിരുവനന്തപുരത്ത് ഇന്ന് നടന്ന തീപിടിത്തം അത്തരമൊരു വിപത്തിലേക്കാണ് വിരൽ ചൂണ്ടുന്നത്.
തിരുവനന്തപുരം കരമന ജംഗ്ഷന് സമീപത്തെ ബാറ്റാ ഷോറൂമിൽ വൻതീപിടിത്തം ആണ് ഉണ്ടായത് . മൂന്ന് നില കെട്ടിടത്തിന്റെ ഷോറൂമിന് ഏറ്റവും മുകളിൽ ആണ് തീപിടിത്തമുണ്ടായത്. ഷോർട്ട് സർക്യൂട്ടാണ് തീപിടിത്തത്തിന് പിന്നിലെന്നാണ് പ്രാഥമിക നിഗമനം. ഷോറൂമിലെ ഗോഡൗൺ പൂർണമായും കത്തിനശിച്ചു. ചെങ്കൽ ചൂളയിൽ നിന്ന് മൂന്ന് യൂണിറ്റ് അഗ്നിശമന സേന സ്ഥലത്തെത്തി തീയണയ്ക്കാനുള്ള ശ്രമം ഇപ്പോഴും തുടരുകയാണ്. തീ നിയന്ത്രണ വിധേയമാണെന്ന് അധികൃതർ അറിയിച്ചിട്ടുണ്ട് . കരമന പൊലീസ് സ്ഥലത്തെത്തിയാണ് സ്ഥിതിഗതികൾ നിയന്ത്രിച്ചത്.
സംഭവത്തിൽ ആളപായമില്ല എന്ന വാർത്തകളാണ് പുറത്തുവരുന്നത് . ഗോഡൗണിൽ സൂക്ഷിച്ചിരുന്ന ചെരുപ്പുകളും ബാഗുകളും മുഴുവനും കത്തിനശിച്ചു. ലക്ഷക്കണക്കിന് രൂപയുടെ നഷ്ടമുണ്ടായതായാണ് കണക്കാക്കപ്പെടുന്നത് . രാവിലെ ഒൻപതരയോടെയാണ് ഷോറൂമിൽ തീപിടിത്തം ഉണ്ടായത്. ഷോറൂമിൽ നിന്നും തീയും പുകയും ഉയരുന്നത് കണ്ട് നാട്ടുകാർ ഫയർഫോഴ്സിനെ വിവരം അറിയിക്കുകയായിരുന്നു. ഫയർഫോഴ്സ് എത്തിയതോടെ തിരക്കേറിയ റോഡിൽ ഏറെനേരം ഗതാഗതക്കുരുക്കും ഉണ്ടായി. വാഹനങ്ങൾ വഴിതിരിച്ചുവിടുകയായിരുന്നു . റോഡരികിലാണ് ഷോറും എന്നതിനാൽ തീയണയ്ക്കാൻ ഫയർഫോഴ്സിനും വലിയ ശ്രമമാണ് വേണ്ടിവരുന്നത് . ഈ ഷോറൂമിൽ നിന്നായിരുന്നു ജില്ലയിലെ മറ്റ് ഷോറൂമുകളിലേക്ക് ബാറ്റയുടെ ഉത്പന്നങ്ങൾ എത്തിച്ചിരുന്നത്.
തീപിടിത്തം നടന്ന സമയത്ത് കട തുറന്നിരുന്നില്ല . റോഡിൽ നിന്നവരാണ് കടയിൽ നിന്ന് പുക ഉയരുന്നത് കണ്ട് ഉടൻതന്നെ പൊലീസിനെ അറിയിച്ചത്. കടയ്ക്ക് സമീപമായി എ.ടി.എമ്മും എതിർവശത്തായി പെട്രോൾ പമ്പും സ്ഥിതി ചെയ്യുന്നുണ്ട്. എന്നാൽ അവിടേക്ക് തീ പടരാർത്തതുകൊണ്ട് വലിയ ദുരന്തമാണ് ഒഴിവായത്.
ഇലക്ട്രിക്കൽ സിസ്റ്റത്തിന് ഗുരുതരമായ നാശമുണ്ടാക്കുന്ന ഒരു പ്രധാന തരം വൈദ്യുത അപകടമാണ് ഷോർട്ട് സർക്യൂട്ടുകൾ. വൈദ്യുതി വഹിക്കാൻ അനുയോജ്യമല്ലാത്ത കുറഞ്ഞ പ്രതിരോധശേഷിയുള്ള ഉപകരണങ്ങളിൽ ഉയർന്ന അളവിലുള്ള വൈദ്യുത പ്രവാഹം ലഭിക്കുമ്പോൾ ആണ് ഷോർട്ട് സർക്യൂട്ട് സംഭവിക്കുന്നത്. ഇലക്ട്രിക്കൽ ഉപകരണങ്ങളുടെ കേടുപാടുകൾ, വൈദ്യുത ഷോക്ക് അല്ലെങ്കിൽ വലിയ തീപിടിത്തം എന്നിവയാണ് ഷോർട്ട് സർക്യൂട്ടിന്റെ ഫലമായി ഉണ്ടാകുന്നത്. ഇത്തരം അപകടങ്ങൾ സംഭവിക്കാതിരിക്കൻ നിരവധി പ്രതിരോധമാർഗങ്ങൾ നമുക്ക് സ്വീകരിക്കാനാകും.
തെറ്റായ വയറിംഗ്, അയഞ്ഞ ബോക്സ് കണക്ഷനുകൾ, കാലഹരണപ്പെട്ട ഔട്ട് ലെറ്റുകൾ എന്നിവയാണ് ഷോർട്ട് സർക്യൂട്ടിന്റെ പ്രധാന കാരണങ്ങൾ. ഉപയോഗിക്കുന്നതിനു മുന്പായി ഉപകാരങ്ങൾ പരിശോധിക്കുന്നതിലൂടെ ഇത്തരം അപകടങ്ങൾ ഒഴിവാക്കാനാകും. ഉപകരണങ്ങളിലെ തെറ്റായ വയറിംഗ് കാരണവും ഷോർട്ട് സർക്യൂട്ടുകൾ ഉണ്ടാകാം. ഷോർട്ട് സർക്യൂട്ട് സംഭവിക്കാവുന്ന ഏറ്റവും അപകടകരമായ മാർഗ്ഗം മിന്നലാണ്. കാരണം അമിതമായ വൈദ്യുതി ചില ഗുരുതരമായ നാശനഷ്ടങ്ങൾക്ക് കാരണമാകും. മിന്നലും കൊടുങ്കാറ്റും ഉള്ള സമയങ്ങളിൽ വൈദ്യുതി ഉപയോഗിക്കാതിരിക്കുക എന്നതാണ് ഏറ്റവും നല്ല മാർഗം. സർക്യൂട്ട് ബ്രെക്കറുകൾ ഉപയോഗിക്കുന്നതും വളരെ നല്ല പ്രതിരോധ മാർഗമാണ്. ഇലക്ട്രിക്കൽ പാനലിൽ സ്ഥിതിചെയ്യുന്ന ഈ ഘടകങ്ങൾ വൈദ്യുത പ്രവാഹങ്ങൾ അനിയന്ത്രിതമാകുമ്പോൾ സ്വയം വൈദ്യുതി പ്രവാഹം നിർത്തലാക്കുന്നു. വർഷത്തിൽ ഒരിക്കലെങ്കിലും വൈദ്യുത പരിശോധന നടത്തണം എന്നതും പ്രധാനമാണ്. ഇത്തരം മുൻകരുതലുകൾ സ്വീകരിക്കുന്നതിലൂടെ ഒരുപരിധിവരെ ഷോർട്ട് സർക്യൂട്ട് മൂലമുണ്ടാകുന്ന അപകടങ്ങൾ ഒഴിവാക്കാൻ സാധിക്കും.
https://www.facebook.com/Malayalivartha