പോലീസ് നന്ദിയുള്ളവരാ... നിസാമിനെതിരെ കാപ്പ ചുമത്താനുള്ള നടപടി പോലീസ് വൈകിപ്പിച്ചു; ചന്ദ്രബോസ് മരിച്ചില്ലായിരുന്നെങ്കില് ജാമ്യം കിട്ടാനുള്ള തന്ത്രം ഒരുക്കിയിരുന്നു
മുഹമ്മദ് നിസാമിനെതിരെ കാപ്പാ ചുമത്താനുള്ള നടപടി പോലീസ് വൈകിപ്പിച്ചു. നിസാമിന്റെ ജാമ്യാപേക്ഷ കോടതിയില് എത്തുംവരെ പേരാമംഗലം പൊലീസാണ് വൈകിപ്പിച്ചത്. ആദ്യം വാക്കാല് റിപ്പോര്ട്ട് ആവശ്യപ്പെട്ട സിറ്റി പൊലീസ് കമ്മിഷണര് പിന്നീടു രേഖാമൂലം ഇതാവശ്യപ്പെട്ടു. ജാമ്യാപേക്ഷയ്ക്കു മുന്പു കാപ്പാ റിപ്പോര്ട്ട് ഫയല് ചെയ്യുവാനായിരുന്നു നീക്കം. എന്നാല് ജാമ്യാപേക്ഷ കോടതിയില് എത്തിയ ദിവസം ചന്ദ്രബോസ് മരിച്ചതോടെ ജാമ്യാപേക്ഷ തള്ളി. ചന്ദ്രബോസ് മരിച്ചില്ലായിരുന്നുവെങ്കില് വധശ്രമക്കേസ് മാത്രമായി നിസാം പുറത്തിറങ്ങാനുള്ള സാധ്യത ഏറെയായിരുന്നു. പേരാമംഗലം സിഐ ഇക്കാര്യത്തില് വീഴ്ച വരുത്തിയതായാണു സൂചന.
ശോഭാസിറ്റിയിലെ സെക്യൂരിറ്റി ജീവനക്കാരന് ചന്ദ്രബോസിനെ കൊലപ്പെടുത്തിയ കേസിലാണു വ്യവസായി പടിയം മുറ്റിച്ചൂര് അടയ്ക്കാപറമ്പില് മുഹമ്മദ് നിസാം അറസ്റ്റിലായത്. കാപ്പാ ചുമത്തുന്നതിനുള്ള നടപടി സ്വീകരിക്കാന് ഉത്തരമേഖലാ എഡിജിപി എന്. ശങ്കര് റെഡ്ഡി സിറ്റി പൊലീസ് മേധാവിക്ക് നിസാം അറസ്റ്റിലായ അന്നു തന്നെ നിര്ദേശം നല്കിയിരുന്നു. ഇതനുസരിച്ചാണു സിറ്റി പൊലീസ് മേധാവിയായിരുന്ന ജേക്കബ് ജോബ് പേരാമംഗലം സിഐക്ക് നിര്ദേശം നല്കിയത്. ചന്ദ്രബോസ് അന്നു മരിച്ചിരുന്നില്ല.
നിസാമിനു ജാമ്യം ലഭിക്കാന് സാധ്യതയുള്ളതിനാലാണ് കാപ്പാ ചുമത്തുന്നതിനുള്ള നടപടി സ്വീകരിക്കാന് അടിയന്തരമായി ആവശ്യപ്പെട്ടത്. എന്നാല് റിപ്പോര്ട്ട് ലഭിക്കാതിരുന്നതിനെ തുടര്ന്ന് ഫെബ്രുവരി ഏഴിനു സ്പെഷല് ബ്രാഞ്ച് മുഖേന കമ്മിഷണര് രേഖാമൂലം ആവശ്യപ്പെട്ടു. പത്തിനകം റിപ്പോര്ട്ട് ഓഫിസില് സമര്പ്പിക്കണമെന്നായിരുന്നു നിര്ദേശം നല്കിയത്. ഇതിന്റെ പകര്പ്പ് ഉത്തരമേഖലാ എഡിജിപിക്കും ഗുരുവായൂര് എസിപിക്കും അയച്ചിരുന്നു. എന്നാല് പത്തിനും റിപ്പോര്ട്ട് നല്കിയില്ല.
ജാമ്യാപേക്ഷ വരുന്നതിനു മുന്പു കാപ്പാ ചുമത്താനാകുമോ എന്നു പരിശോധിക്കാനായിരുന്നു എഡിജിപി നിര്ദേശം നല്കിയത്. 16നാണു ചന്ദ്രബോസ് മരിക്കുന്നത്. ചന്ദ്രബോസ് മരിക്കുന്ന ദിവസം തന്നെ നിസാമിന്റെ ജാമ്യാപേക്ഷ കോടതിയില് എത്തിയിരുന്നു. ചന്ദ്രബോസിന്റെ മരണത്തെ തുടര്ന്നു ജാമ്യാപേക്ഷ കോടതി തള്ളി. സിറ്റി പൊലീസ് മേധാവിയുടെ ഓഫിസില്നിന്നുള്ള നിര്ബന്ധത്തെ തുടര്ന്ന് ഒടുവില് കഴിഞ്ഞ ദിവസമാണ് പ്രാഥമിക റിപ്പോര്ട്ട് സമര്പ്പിച്ചത്. ഈ റിപ്പോര്ട്ടിന്റെ അടിസ്ഥാനത്തില് കാപ്പാ ചുമത്തണമെന്നാവശ്യപ്പെട്ട് കഴിഞ്ഞ രണ്ടിനു കലക്ടര്ക്ക് സിറ്റി പൊലീസ് മേധാവി ആര്. നിശാന്തിനി അപേക്ഷ നല്കുകയായിരുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
