നിയമസഭ കൂടുമ്പോള്‍ കാണാം പുതിയ പ്രതിപക്ഷ നേതാവിനെ... എത്ര ഉന്നതനാണ് വിഎസ്.എങ്കിലും പാര്‍ട്ടിക്ക് മുകളിലേക്ക് വളര്‍ന്നാല്‍ എന്തു ചെയ്യും
ഏതാനും ദിവസങ്ങള്‍ക്കകം പ്രതിപക്ഷനേതാവ് വിഎസ് അച്യുതാനന്ദന്‍ സിപിഎമ്മില്‍ നിന്നും ഫലത്തില്‍ പുറത്താകും. കഴിഞ്ഞ മാസം സംസ്ഥാന കമ്മിറ്റിയില്‍ നിന്നും വിട്ടു നിന്ന അച്യുതാനന്ദന്‍ താന്‍ പാര്‍ട്ടി വിരുദ്ധനാണെന്ന പ്രസ്താവന പിന്‍വലിക്കണമെന്ന ആവശ്യത്തില്‍ ഉറച്ചു നില്‍ക്കുകയാണ്. എന്നാല്‍ അച്യുതാനന്ദനെ ആരും പാര്‍ട്ടി വിരുദ്ധര്‍ എന്ന് വിളിച്ചിട്ടില്ലെന്നാണ് സിപിഎമ്മിന്റെ പക്ഷം. മാര്‍ച്ച് 20,21 തീയതികളില്‍ ചേരുന്ന പോളിറ്റ് ബ്യൂറോ യോഗം ഇക്കാര്യത്തില്‍ തീരുമാനം എടുക്കും എന്നറിയുന്നു. എന്നാല്‍ പാര്‍ട്ടി വിരുദ്ധര്‍ എന്ന് വിളിക്കാത്ത പശ്ചാത്തലത്തില്‍ അത്തരമൊരു വാക്ക് എങ്ങനെ നീക്കുമെന്നാണ് സംസ്ഥാന കമ്മിറ്റി ചോദിക്കുന്നത്.
അച്യുതാനന്ദന്‍ ഇപ്പോള്‍ പാര്‍ട്ടി സംസ്ഥാന കമ്മിറ്റി അംഗമല്ല. കേന്ദ്ര കമ്മിറ്റി അംഗം എന്ന നിലയിലാണ് അദ്ദേഹത്തെ സംസ്ഥാന കമ്മിറ്റിയിലേക്ക് ക്ഷണിച്ചത്. അദ്ദേഹം വരുമോ എന്നറിയണം എന്നുമുണ്ടായിരുന്നു. എന്നാല്‍ വന്നില്ല. പിടിവാശിയില്‍ നില്‍ക്കുന്നു. എത്ര ഉന്നതനാണ് വിഎസ്.എങ്കിലും പാര്‍ട്ടിക്ക് മുകളിലേക്ക് വളര്‍ന്നാല്‍ എന്തു ചെയ്യും എന്നാണ് ഒരു പ്രമുഖ സിപിഎം നേതാവ് മലയാളി വാര്‍ത്തയോട് ചോദിച്ചത്. ആലപ്പുഴ സംസ്ഥാന സമ്മേളനം രൂപീകരിച്ച ആദ്യത്തെ സംസ്ഥാന സമിതി യോഗമാണ് കഴിഞ്ഞ മാസം തിരുവനന്തപുരത്ത് നടന്നത്.
സംസ്ഥാന കമ്മിറ്റിയില്‍ പങ്കെടുത്തില്ലെങ്കിലും നിയമസഭയില്‍ താന്‍ പ്രതിപക്ഷനേതാവായി തുടരും എന്നാണ് വിഎസ് പറയുന്നത്. പാര്‍ട്ടി യോഗങ്ങളില്‍ നിന്നും വിട്ടു നില്‍ക്കുന്ന ഒരാളെ പ്രതിപക്ഷ നേതാവായി തുടരാന്‍ അനുവദിക്കണോ എന്ന കാതലായ ചോദ്യമാണ് ഇപ്പോള്‍ സിപിഎം ചര്‍ച്ച ചെയ്യുന്നത്. ഇല്ലാത്ത പ്രശ്‌നത്തിന്റെ പേരില്‍ പാര്‍ട്ടിയോട് യുദ്ധം പ്രഖ്യാപിച്ചിരിക്കുന്ന ഒരാള്‍ പാര്‍ട്ടി നല്‍കിയ എല്ലാ അനുഭവങ്ങളും വച്ചനുഭവിക്കുന്നതില്‍ പാര്‍ട്ടി നേതാക്കള്‍ക്കും അണികള്‍ക്കും അമര്‍ഷമുണ്ട്. ചുരുക്കത്തില്‍ ഇത്തരത്തിലാണ് മുന്നോട്ടു പോകുന്നതെങ്കില്‍ വിഎസ് പ്രതിപക്ഷ നേതാവ് സ്ഥാനത്തു നിന്നും പുറത്തായെന്നിരിക്കും.
വിഎസിന്റെ നീക്കങ്ങള്‍ സസൂക്ഷ്മം നിരീക്ഷിക്കുകയാണ് ഔദ്യോഗിക പക്ഷം. പിണറായിയാണ് ഇതിനു നേതൃത്വം നല്‍കുന്നത്. സംസ്ഥാന കമ്മിറ്റിയില്‍ പങ്കെടുക്കാത്ത വ്യക്തിയെ നിയമസഭയില്‍ തങ്ങള്‍ക്ക് വേണ്ടി സംസാരിക്കാന്‍ അനുവദിക്കണമോ എന്ന് സിപിഎം ചിന്തിക്കും. അങ്ങനെ വന്നാല്‍ വിഎസ് പ്രതിപക്ഷ നേതാവിന്റെ കസേരയിലിരിക്കുകയും തീപ്പൊരി നേതാവ് ഇ.പിജയരാജന്‍ നിയമസഭയില്‍ സിപിഎമ്മിനെ നയിക്കുകയും ചെയ്യും.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
