മറ്റേതൊരു ബജറ്റിനെക്കാളും കര്‍ഷക ക്ഷേമത്തിന് ഏറെ പ്രാധാന്യം നല്‍കുന്നതാണ് നിര്‍മ്മല സീതാരാമന്‍ അവതരിപ്പിച്ച ഇത്തവണത്തെ കേന്ദ്ര ബജറ്റ്. പ്രധാനമന്ത്രി നരേന്ദ്രമോദിയുടെ പ്രത്യേക നിര്‍ദേശ പ്രകാരമാണ് കര്‍ഷകര്‍ക്ക് ഏറെ പ്രാധാന്യം നല്‍കിയത്. ബജറ്റിനെ അഭിനന്ദിച്ച് കേന്ദ്ര ആഭ്യന്തര മന്ത്രി അമിത്ഷായും രംഗത്തെത്തിയിട്ടുണ്ട്.

കേന്ദ്ര ബജറ്റ് കര്‍ഷകരുടെ വരുമാന വര്‍ധനവിന് സഹായകമാകുമെന്നാണ് അമിത് ഷാ പറയുന്നത്. കര്‍ഷകരുടെ ക്ഷേമത്തിനായി കേന്ദ്ര സര്‍ക്കാര്‍ ആവിഷ്‌ക്കരിച്ച വിവിധ പദ്ധതികളെ കുറിച്ചും അദ്ദേഹം ട്വിറ്ററിലൂടെ വ്യക്തമാക്കി. ജലസേചന സൗകര്യങ്ങള്‍, ധാന്യ സംഭരണ കേന്ദ്രങ്ങള്‍, കര്‍ഷകരുടെ ഉത്പന്നങ്ങള്‍ക്ക് ന്യായവില നല്‍കുക എന്നിങ്ങനെ മോദി സര്‍ക്കാരിന്റെ തീരുമാനങ്ങളെ നിറവേറ്റാന്‍ സഹായിക്കുന്ന ബജറ്റാണ് ഇന്ന് പ്രഖ്യാപിച്ചതെന്നും അദ്ദേഹം പറഞ്ഞു.

കിസാന്‍ റെയില്‍, കിസാന്‍ ഉഡാന്‍ യോജന എന്നീ പദ്ധതികളിലൂടെ കര്‍ഷക സഹോദരങ്ങള്‍ക്ക് അവരുടെ ഉത്പന്നങ്ങള്‍ ദേശീയ അന്തര്‍ ദേശീയ വിപണിയില്‍ എത്തിക്കാനും മികച്ച വിലയില്‍ വില്‍ക്കാനും കഴിഞ്ഞു. വടക്ക് കിഴക്കന്‍ മേഖലകളില്‍ പഴങ്ങളും പച്ചക്കറികളും കൃഷി ചെയ്യുന്നവര്‍ക്കും വനവാസികള്‍ക്കുമാണ് ഈ പദ്ധതിയുടെ ഗുണഫലം കൂടുതലായി ലഭിക്കുതെന്നും അദ്ദേഹം വ്യക്തമാക്കി.

രാജ്യത്തെ എല്ലാ മേഖലകളിലും ആയുഷ്മാന്‍ ഭാരത് പദ്ധതി വ്യാപിപ്പിക്കുമെന്ന പ്രഖ്യാപനത്തേയും അമിത് ഷാ പ്രശംസിച്ചു. എല്ലാവര്‍ക്കും വൈദ്യുതി, വീട്, ടോയ്‌ലെറ്റ്, ഗ്യാസ്, ശുദ്ധമായ കുടിവെള്ളം എന്നിവ ഉറപ്പു വരുത്തുന്ന പ്രധാനമന്ത്രിയുടെ തീരുമാനത്തെ സ്വാഗതം ചെയ്യുന്നതായും അദ്ദേഹം പറഞ്ഞു.

അതേസമയം രാജ്യത്തിന്റെ സമ്പദ് വ്യവസ്ഥയെ ഉത്തേജിപ്പിക്കാനുതകുന്ന ബജറ്റാണ് ധനമന്ത്രി നിര്‍മ്മല സീതാരാമന്‍ അവതരിപ്പിച്ചതെന്ന് പ്രധാനമന്ത്രി നരേന്ദ്ര മോദി വ്യക്തമാക്കി. നിക്ഷേപവും വരുമാനവും ഉയര്‍ത്താന്‍ ബജറ്റിന് കഴിയുമെന്നും അദ്ദേഹം പറഞ്ഞു. പാര്‍ലമെന്റില്‍ ധനമന്ത്രിയുടെ ബജറ്റ് അവതരണത്തിനു ശേഷം രാജ്യത്തെ അഭിസംബോധന ചെയ്ത് സംസാരിക്കവേയാണ് മോദി ഇക്കാര്യം വ്യക്തമാക്കിയത്.

രാജ്യത്തെ തൊഴിലവസരങ്ങള്‍ കൂടാന്‍ കേന്ദ്ര ബജറ്റ് സഹായിക്കും. ദര്‍ശനവും പ്രവര്‍ത്തനവും കൂടിച്ചേര്‍ന്ന ദശകത്തിലെ ആദ്യ ബജറ്റ് അവതരിപ്പിച്ചതിന് ധനമന്ത്രിയേയും സംഘത്തെയും അഭിനന്ദിക്കുന്നുവെന്നും മോദി പറഞ്ഞു. രാജ്യത്ത് തൊഴിലവസരങ്ങള്‍ കാത്തിരിക്കുന്ന ഒരു സമൂഹത്തിനു വളരെയധികം പ്രയോജനകരമാകുന്നതാണ് ബജറ്റിലെ പ്രഖ്യാപനങ്ങള്‍.

കൃഷി, അടിസ്ഥാന സൗകര്യം, ടെക്സ്റ്റയില്‍സ്, സാങ്കേതിക വിദ്യ എന്നീ മേഖലകളിലാണ് കൂടുതല്‍ തൊഴിലവസരങ്ങള്‍. ഈ മേഖലകള്‍ക്കാണ് ബജറ്റില്‍ കൂടുതല്‍ ഊന്നല്‍ നല്‍കിയിരിക്കുന്നത്. കയറ്റുമതിക്ക് ആക്കം കൂടും. ബജറ്റ് ഏറ്റവും അധികം പ്രയോജനകരമാകുന്നത് വിദ്യാര്‍ഥികള്‍ക്കാണെന്നും പ്രധാനമന്ത്രി പറഞ്ഞു.

നൂറു പുതിയ വിമാനത്താവളങ്ങള്‍ എന്ന പദ്ധതി രാജ്യത്തിന്റെ വിനോദസഞ്ചാര മേഖലയുടെ വളര്‍ച്ചയെ ലക്ഷ്യംവച്ചാണ്. നിക്ഷേപം കുറച്ചുകൊണ്ട് തൊഴിലവസരവും വരുമാനവും വര്‍ധിപ്പിക്കാന്‍ വിനോദ സഞ്ചാര മേഖലയിലൂടെ സാധിക്കും.

രാജ്യത്തിന്റെ നിലവിലുള്ള ആവശ്യങ്ങളെ പൂര്‍ത്തീകരിക്കാനും ഈ ദശാബ്ദത്തിന്റെ പ്രതീക്ഷകളെ തൃപ്തിപ്പെടുത്താനും ബജറ്റ് നിര്‍ദേശങ്ങള്‍ക്ക് കഴിയുമെന്നും മോദി വ്യക്തമാക്കി.

വലിയ പ്രതീക്ഷയോടെയാണ് ഈ ബജറ്റിനെ കര്‍ഷകര്‍ നോക്കിക്കാണുന്നത്. കര്‍ഷകര്‍ക്കായി ആവിഷ്‌ക്കരിച്ച പദ്ധതികള്‍ ഫലംകണ്ടാല്‍ കര്‍ഷകരുടെ ജീവിതം തന്നെ മാറ്റി മറിക്കും.