കൊറോണ വൈറസ് പ്രഭവകേന്ദ്രമായ വുഹാനില്‍നിന്ന് ഇന്ത്യക്കാരേയും വഹിച്ചുള്ള എയര്‍ഇന്ത്യയുടെ രണ്ടാമത്തെ വിമാനം ഡല്‍ഹിയിലെത്തി. ഞായറാഴ്ച രാവിലെയാണു വിമാനം ഡല്‍ഹിയിലെത്തിയത്. 323 ഇന്ത്യക്കാരും ഏഴു മാലദ്വീപ് സ്വദേശികളുമാണ് വിമാനത്തിലുള്ളത്. ഇവരെ പരിശോധനകള്‍ക്കുശേഷം നിരീക്ഷണ ക്യാന്പുകളിലേക്കു മാറ്റും.

വുഹാനില്‍ നിന്നുള്ള 324 ഇന്ത്യന്‍ വിദ്യാര്‍ഥികളുമായി എയര്‍ ഇന്ത്യയുടെ ആദ്യ വിമാനം ശനിയാഴ്ച രാവിലെ ഡല്‍ഹിയിലെത്തിയിരുന്നു. 211 വിദ്യാര്‍ഥികളും 110 മുതിര്‍ന്നവരും നാല് കുട്ടികളുമാണ് വിമാനത്തിലുണ്ടായിരുന്നത്. 42 മലയാളികള്‍ ഈ സംഘത്തിലുണ്ട്. ഈ വിമാനത്തില്‍ ഇന്ത്യയില്‍ തിരിച്ചെത്തിയ ആരില്‍ തന്നെയും രോഗ ലക്ഷണങ്ങള്‍ ഉള്ളവര്‍ ഇല്ലെന്നാണ് വിവരം.