ഒരു പകല്‍ മുഴുവന്‍ അനന്തപുരിയെ ഭക്തിയില്‍ ലയിപ്പിച്ച് ആറ്റുകാലമ്മയ്ക്ക് ലക്ഷങ്ങള്‍ പൊങ്കാല നിവേദിച്ച് ആത്മസമര്‍പ്പണം നടത്തി. അനന്തപുരിയാകെ ആറ്റുകാലമ്മയുടെ അമ്പലമുറ്റമായി മാറിയപ്പോള്‍ ഭക്തരുടെ മനം നിറഞ്ഞുതൂവി. അനന്തപുരിയുടെ മേലാപ്പില്‍ അഭീഷ്ടദായിനിയുടെ വരപ്രസാദം വലയം ചെയ്തു. കണ്ണെത്താദൂരത്തോളം നിരന്ന പൊങ്കാലക്കലങ്ങളില്‍ ഭക്തിയുടെ നിവേദ്യം. അനന്തപുരിയുടെ ഹൃദയതാളത്തില്‍ പൊങ്കാലപുണ്യം. ഒരേ മനസ്സും ഒരേ മന്ത്രവുമായി തലസ്ഥാന നഗരി ആറ്റുകാലായി മാറിയ ദിനമായിരുന്നു ഇന്ന്.

വായ്ക്കുരവയും ദേവീസ്തുതികളും നിറഞ്ഞ അന്തരീക്ഷത്തില്‍ പൊങ്കാലയിടാന്‍ സിനിമാതാരങ്ങളും എത്തിയിരുന്നു. നടിമാരായ ചിപ്പി, ആനി, ഇനിയ, ഗായിക രാജലക്ഷ്മി എന്നിവര്‍ തുടങ്ങി നിരവധി താരങ്ങള്‍ പൊങ്കാല അര്‍പ്പിക്കാന്‍ എത്തി.

രാവിലെ 10.15ന് തന്ത്രി ചേന്നാസ് ദിനേശന്‍ നമ്പൂതിരിപ്പാട് ശ്രീകോവിലില്‍ നിന്ന് ദീപം മേല്‍ശാന്തി കണ്ണന്‍പോറ്റിക്ക് കൈമാറി. ക്ഷേത്ര തിടപ്പള്ളിയിലെ അടുപ്പില്‍ അത് തെളിച്ചു. അതേ ദീപം ക്ഷേത്രത്തിനുമുന്നിലെ പണ്ടാര അടുപ്പിലേക്ക് പകര്‍ന്നു. പിന്നീടത് ലക്ഷം ലക്ഷം അടുപ്പുകളിലേക്ക്. വായ്ക്കുരവകളുടെയും മന്ത്രോച്ചാരണങ്ങളുടെയും മുഴക്കം. ഭക്തിയുടെ പാരമത്യയില്‍ പൊങ്കാലക്കലങ്ങള്‍ തിളച്ചുതൂവി. ശര്‍ക്കരപ്പായസമായും അരവണയായും മണ്ടപ്പുറ്റായും തെരളിയായും അങ്ങനെ നിവേദ്യങ്ങള്‍ പാകമായി. ഒരാണ്ടത്തെ കാത്തിരിപ്പിന്റെ നിര്‍വൃതി.
ആറ്റുകാല്‍ ക്ഷേത്രമുറ്റത്തുനിന്ന് പൊങ്കാലയടുപ്പുകള്‍ ഇക്കുറിയും കിലോമീറ്ററുകള്‍ നീണ്ടു. ക്ഷേത്രത്തില്‍ നിന്നും പത്തുകീലോമീറ്റര്‍ ചുറ്റളവില്‍ പൊങ്കാല കലങ്ങള്‍ നീണ്ടു. നാല്‍പതു ലക്ഷത്തോളം പേര്‍ ഇക്കുറി പൊങ്കാലയിട്ടുവെന്നാണ് കണക്ക്. 3.15ഓടെ ഭക്തസാഗരത്തിലേക്ക് തീര്‍ത്ഥവുമായി പൂജാരിമാര്‍ എത്തി. തീര്‍ത്ഥകണങ്ങള്‍ നൈവേദ്യത്തിലേക്ക് പതിച്ചതോടെ കുളിരണിഞ്ഞ മനസുമായി ഭക്തര്‍ വീടുകളിലേക്കു മടങ്ങി.
രാവിലെയായതോടെ എല്ലാ വഴികളും പൊങ്കാലക്കാരെകൊണ്ട് നിറഞ്ഞു. കിട്ടിയ സ്ഥലത്തെല്ലാം ഭക്തര്‍ പൊങ്കാലയടുപ്പുകൂട്ടി. അതിന് റോഡെന്നോ, പറമ്പെന്നോ, ഫുട്പാത്തെന്നോ ഭേദമില്ലായിരുന്നു. സന്നദ്ധ സേവകര്‍ ഭക്തര്‍ക്ക് ഭക്ഷണവും ശീതളപാനീയങ്ങളും വിതരണം ചെയ്തു. എല്ലായിടത്തും അത് ലഭ്യമായതിനാല്‍ ഭക്തര്‍ക്ക് ഭക്ഷണത്തിനായി അലഞ്ഞുനടക്കേണ്ടിവന്നില്ല.
ദേശീയ പാതയില്‍ അമ്പലത്തറ കല്ലടിമുഖം മുതല്‍ ആനയറ വേള്‍ഡ് മാര്‍ക്കറ്റ് വരെ പൊങ്കാല അടുപ്പുകള്‍ നിരന്നു. മറുവശത്ത് കരമന സ്‌ക്വയര്‍ മുതല്‍ കവടിയാറും പിന്നിട്ട് കേശവദാസപുരം വരെയും. പൊങ്കാല പ്രമാണിച്ച് കെ.എസ്.ആര്‍.ടി.സി കൂടുതല്‍ സര്‍വീസുകള്‍ നടത്തി. പ്രത്യേക ട്രെയിന്‍ സര്‍വീസും ഉണ്ടായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha