രാവിലെ സ്‌കൂളിലേക്ക് പോകാനായി അധ്യാപകന്‍ 11 കിലോമീറ്റര്‍ ബൈക്കോടിച്ച് പോയത് ഹെല്‍മറ്റിനുള്ളില്‍ വിഷപാമ്പുണ്ടെന്നറിയാതെ. രാവിലെ വീട്ടില്‍ നിന്നെടുത്ത് തലയില്‍ വെച്ച ഹെല്‍മറ്റിനുള്ളില്‍ വിഷപ്പാമ്പുണ്ടെന്നറിയാതെയാണ് അധ്യാപകന്‍ യാത്ര ചെയ്തത്.
ബുധനാഴ്ച രാവിലെ 8.30-ഓടെ വീട്ടില്‍നിന്ന് അഞ്ച് കിലോമീറ്റര്‍ അകലെയുള്ള കണ്ടനാട് സ്‌കൂളിലേയ്ക്കായിരുന്നു വിഷപാമ്പ് ഇരിക്കുന്ന ഹെല്‍മറ്റും ധരിച്ചുകൊണ്ടുളള ആദ്യ യാത്ര. പിന്നീട് തൃപ്പൂണിത്തുറ ആര്‍.എല്‍.വി. സ്‌കൂളില്‍ സംസ്‌കൃതം ക്ലാസിനായി ആറ് കിലോമീറ്ററോളം വീണ്ടും ബൈക്കോടിച്ചു. അപ്പോഴും പാമ്പിനെ കണ്ടില്ല.

11.30-ന് പുറത്തേക്ക് പോകാനായി വീണ്ടും ബൈക്കിനടുത്ത് എത്തിയപ്പോഴാണ് ഹെല്‍െമറ്റിനുള്ളില്‍ പാമ്പിന്റെ വാല്‍ കണ്ടത്. സംഭവമറിഞ്ഞ് മറ്റ് അധ്യാപകരും ഓടിയെത്തി. ഹെല്‍മറ്റ് പരിശോധിച്ചപ്പോഴാണ് ഉള്ളില്‍ ഞെരിഞ്ഞ് ചത്തനിലയില്‍ പാമ്പിനെ കണ്ടത്. ഇത് കണ്ടതോടെ രഞ്ജിത്തും മറ്റുള്ളവരും ഭയന്നു.ഉടന്‍തന്നെ രഞ്ജിത്തിനെ താലൂക്കാശുപത്രിയിലെത്തിച്ച് രക്തം പലതവണ പരിശോധിച്ചു.പാമ്പ് കടിച്ചില്ലെന്നതാണ് അത്ഭുതകരമായ കാര്യം.

മുറിവോ മറ്റൊന്നും ഇല്ലെന്നറിഞ്ഞപ്പോഴാണ് ആശ്വാസം ആയത്. കണ്ടനാട് സെയ്ന്റ് മേരീസ് ഹൈസ്‌കൂളിലെ അധ്യാപകന്‍ കെ.എ. രഞ്ജിത്തിന്റെ ഹെല്‍മറ്റിലാണ് ഇത്രയും സംഭവങ്ങള്‍ അരങ്ങേറിയത്. എന്തായാലും പാമ്പ് കയറിയ ഹെല്‍മറ്റ് അധ്യാപകന്‍ കത്തിച്ച് കളഞ്ഞു.