പിഎം സൂര്യ ഘർ: മുഫ്ത് ബിജ്‌ലി യോജനയ്ക്ക് കീഴിൽ പ്രവർത്തിക്കുന്ന ഇന്ത്യയിലെ രണ്ടാമത്തെ വലിയ റെസിഡൻഷ്യൽ റൂഫ്ടോപ്പ് സോളാർ കമ്പനിയായ ഫ്രെയർ എനർജി, ഇന്ത്യൻ ക്രിക്കറ്റ് ടീം ക്യാപ്റ്റൻ രോഹിത് ശർമയെ തങ്ങളുടെ ആദ്യ ബ്രാൻഡ് അംബാസഡറായി പ്രഖ്യാപിച്ചു. ഇതിൻ്റെ ഭാഗമായി ‘സോളാർ ഹോ, തോ ഫ്രേയർ ഹോ!’ എന്ന ദേശീയ പരസ്യ ക്യാമ്പയിനും കമ്പനി തുടക്കമിട്ടു.

റൂഫ്ടോപ്പ് സോളാർ എന്നത് 30 വർഷത്തെ ദീർഘകാല നിക്ഷേപമാണെന്നും, ദശാബ്‌ദങ്ങളോളം വിശ്വസിക്കാൻ കഴിയുന്ന ഒരു പങ്കാളിയെയാണ് കുടുംബങ്ങൾ തിരഞ്ഞെടുക്കേണ്ടതെന്നുമുള്ള സന്ദേശമാണ് ഈ ക്യാമ്പയിൻ മുന്നോട്ടുവെക്കുന്നത്. 40-ലധികം നഗരങ്ങളിലായി 20,000-ത്തിലധികം സോളാർ സിസ്റ്റങ്ങൾ സ്ഥാപിച്ച് വിപണിയിൽ തങ്ങളുടെ സാന്നിധ്യം ഉറപ്പിച്ച ഫ്രെയർ എനർജി, കസ്റ്റമർ ആപ്പ്, സെൽഫ്-ക്ലീനിംഗ് സോളാർ സിസ്റ്റങ്ങൾ, സോളാർ എക്‌സ്‌പീരിയൻസ് സെന്ററുകൾ തുടങ്ങിയ നൂതന സൗകര്യങ്ങളും അവതരിപ്പിച്ചിട്ടുണ്ട്.

പിഎം സൂര്യ ഘർ പദ്ധതി വഴി അർഹരായ കുടുംബങ്ങൾക്ക് 78,000 രൂപ വരെ സർക്കാർ സബ്‌സിഡിയും കുറഞ്ഞ പലിശ നിരക്കിലുള്ള വായ്‌പാ സൗകര്യങ്ങളും ലഭ്യമാണ്. സോളാറിലേക്ക് മാറാൻ ആഗ്രഹിക്കുന്ന വീടുകൾക്ക് സാമ്പത്തിക ഭാരം കുറയ്ക്കാൻ ഇത് സഹായിക്കും.

പരിസ്ഥിതി സംരക്ഷണം എന്നും തനിക്ക് പ്രിയപ്പെട്ട വിഷയമാണെന്നും, കുടുംബങ്ങളെ ശുദ്ധവും സുസ്ഥിരവുമായ ഊർജ്ജ രീതികളിലേക്ക് പ്രോത്സാഹിപ്പിക്കുന്ന ഇത്തരം ഒരു സംരംഭത്തിൻ്റെ ഭാഗമാകാൻ കഴിഞ്ഞതിൽ സന്തോഷമുണ്ടെന്നും രോഹിത് ശർമ പറഞ്ഞു.

ഇൻസ്റ്റലേഷൻ ദിവസത്തിൽ മാത്രമല്ല, അടുത്ത 30 വർഷത്തെ ജീവിതകാലം മുഴുവൻ ഉപഭോക്താക്കൾക്ക് മികച്ച സേവനം ഉറപ്പുനൽകുകയാണ് കമ്പനിയുടെ ലക്ഷ്യമെന്ന് ഫ്രെയർ എനർജി കോ-ഫൗണ്ടർമാരായ സൗരഭ് മർദയും രാധിക ചൗധരിയും വ്യക്തമാക്കി.